Views: 1
ប្រែសម្រួលៈបំណង(ដេល្លីម៉េល)៖ ប្រធានាធិបតីអាម៉េរិកលោកចូ បៃដិន និងសម្ពន្ធមិត្តរបស់លោកកាលពីថ្ងៃសៅរ៍ទី៩កញ្ញាបានដាក់ចេញផែនការសំរាប់ផ្លូវដែកនិងរបៀងដឹកជញ្ជូនមួយដែលនឹងភ្ជាប់ឥណ្ឌាទៅមជ្ឈិមបូព៌ានិងអឺរ៉ុប ជាការផ្លាស់ប្តូរល្បែងមួយសំរាប់ពាណិជ្ជកម្មសកល។
គំរោងនេះនឹងរួមមានអាម៉េរិក ឥណ្ឌា អារ៉ាប៊ីសាអូឌីត សហភាពអារ៉ាប់រួម សហភាពអឺរ៉ុប(អ៊ីយូ)និងប្រទេសដទៃទៀតនៅក្នុងក្រុមG20 នេះបើតាម លោកហ្សុន ហ្វីនឺ( Jon Finer)ទីប្រឹក្សាសន្តិសុខរងរបស់លោកបៃដិន។
លោកបៃដិន នាយករដ្ឋមន្ត្រីឥណ្ឌា ណារ៉េនដ្រា ម៉ូឌី និងប្រធានគណៈកម្មាធិការសហភាពអឺរ៉ុបលោកស្រី អឺស៊ូឡា វ៉ុន ដឺ ឡេយេន មានផែនការប្រកាសគំរោងនេះ ជាផ្នែកនៃផែនការមួយហៅថា«ភាពជាដៃគូសំរាប់ការវិនិយោគហេដ្ឋារចនាសម្ពន្ធសកល(Partnership for Global Infrastructure Investment)»។
ផ្លូវដែកនិងរបៀងដឹកជញ្ជូននេះនឹងអាចអោយមានការធ្វើពាណិជ្ជកម្មកាន់តែធំឡើងក្នុងចំណោមប្រទេស រួមមានផលិតផលថាមពល។វាក៏ជាផែនការមួយសំរាប់ទប់ទល់នឹងកម្មវិធីហេដ្ឋារចនាសម្ពន្ធយក្សរបស់ចិន នៅពេលមហាអំណាចអាស៊ីមួយនេះព្យាយាមភ្ជាប់សេដ្ឋកិច្ចរបស់ខ្លួនទៅកាន់ប្រទេសជាច្រើននៅអាស៊ីនិងអឺរ៉ុប។
បើតាមលោកហ្សុន ហ្វីនឺ ផ្លូវនេះនឹងបង្កើនភាពសំបូរសប្បាយក្នុងប្រទេសពាក់ព័ន្ធ ដោយសារតែលំហូរថាមពលនិងទូរគមនាគមន៍ឌីជីថល។វាក៏នឹងជួយដោះស្រាយកង្វះហេដ្ឋារចនាសម្ពន្ធដែលត្រូវការចាំបាច់សំរាប់កំណើននៅក្នុងបណ្តាប្រទេសមានចំណូលទាបនិងមធ្យម និងជួយបន្ថយ«ភាពវឹកវរនិងអសន្តិសុខ»នៅមជ្ឈិមបូព៌ា។
នាយករដ្ឋមន្ត្រីឥណ្ឌា ស្វាគមន៍ប្រធានាធិបតីអាម៉េរិកនិងប្រធានគណៈកម្មាធិការសហភាពអឺរ៉ុបនៅជំនួបG20នៅក្រុងដែលីកាលពីថ្ងៃ៩កញ្ញា
ប្រធានគណៈកម្មាធិការសហភាពអឺរ៉ុបលោកស្រី វ៉ុន ដឺ ឡេយេនបានពណ៌នាគំរោងនេះថា«សំខាន់ជាប្រវត្តិសាស្ត្រ»ជា«របៀងសេដ្ឋកិច្ចឥណ្ឌា-មជ្ឈិមបូព៌ា-អឺរ៉ុប»មួយដែលនឹងធ្វើអោយពាណិជ្ជកម្មរវាងឥណ្ឌានិងអឺរ៉ុបមានភាពលឿនឡើង៤០ភាគរយ។
គំរោងនេះរួមមាន ផ្លូវដែកមួយព្រមទាំងខ្សែក្លាប្លិ៍អគ្គិសនីមួយ បំពងបង្ហូរអ៊ីដ្រូហ្សែនមួយ និងខ្សែកាប្លិ៍ទិន្នន័យល្បឿនលឿនមួយ ៕
