Views: 3
ប្រែសម្រួលៈបំណង(ដេល្លីម៉េល)៖ ប្រធានាធិបតីអាម៉េរិកលោក ចូ បៃដិន បានវាយប្រហារការធ្វើចំណាកស្រុកខុសច្បាប់នៅក្នុងសុន្ទរកថានៅជំនួបកំពូលអាម៉េរិកកន្លែងដែលលោកនិងមេដឹកនាំដទៃទៀតប្តេជ្ញាបង្ក្រាបការរត់ពន្ធនិងជួញដូរមនុស្ស នៅពេលពួកលោកបានប្រកាសកិច្ចព្រមព្រៀងថ្មីមួយ។
លោកបាននិយាយខ្លាំងៗចំពេលមានការហូរចូលជនចំណាកស្រុកខុសច្បាប់កើនឡើងខ្លាំងបំផុត ជាបញ្ហាដែលបង្កជាបញ្ហានយោបាយសំរាប់រដ្ឋាភិបាលរបស់លោកចាប់តាំងពីថ្ងៃចូលកាន់តំណែងដំបូងមកម្ល៉េះ។
លោកបាននិយាយដូច្នេះថា «យើងត្រូវបញ្ឈប់វិធីដែលមនុស្សធ្វើចំណាកស្រុកខុសច្បាប់ដ៏គ្រោះថ្នាក់នេះ។ទេសន្តរប្រវេសន៍ខុសច្បាប់មិនអាចទទួលយកបានឡើយ»។
លោកក៏បានចេញការព្រមានដ៏ខ្លាំងដល់ពួករត់ពន្ធនិងជួញដូរមនុស្សថា «យើងនឹងតាមរកអ្នកឯង។បើអ្នករកស៊ីកេងរកផលចំណេញពីជនអន្តោប្រវេសន៍ដ៏អស់សង្ឃឹមនិងងាយរងគ្រោះ យើងនឹងតាមប្រមាញ់អ្នកឯង»។
តែលោកបានព្យាយាមបង្ហាញកិច្ចសហការ ក្រោយពីអ្នកកាន់តំណែងមុនរបស់លោកគឺលោកដូណាល់ ត្រាំ បានឈ្លោះជាមួយប្រទេសក្បែរខាងរឿងសង់ជញ្ជាំងព្រំដែន ។លោកបាននិយាយដូច្នេះថា «យើងនឹងធានាសន្តិសុខព្រំដែនរបស់យើង បូករួមទាំងសកម្មភាពបែបសម្របសម្រួលគ្នាជាមួយដៃគូតំបន់របស់យើង។យើងត្រូវបញ្ឈប់វិធីធ្វើចំណាកស្រុកដ៏គ្រោះថ្នាក់និងខុសច្បាប់នេះ»។
បៃដិននិយាយអំពីក្បួនជនចំណាកស្រុកមួយទៀតតម្រង់មកកាន់អាម៉េរិក ចំពេលមានបញ្ហាបន្តនៅព្រំដែនខាងត្បូង
ប្រជាជាតិដែលចូលរួមក្នុងជំនួបកំពូលនេះ ភាគច្រើនមកពីក្រុមត្រីកោណខាងជើង បានប្រកាសការសន្យាដោះស្រាយលំហូរជនចំណាកស្រុកនេះ។ម៉ិកស៊ិច ក្វាតេម៉ាឡា កាណាដា និងអេស្ប៉ាញក៏បានប្តេជ្ញាពង្រីកផ្លូវចូលសំរាប់ជនចំណាកស្រុកប្រភេទនេះផងដែរ។
រដ្ឋាភិបាលអាម៉េរិកដែលកំពុងជួបបញ្ហាជនចំណាកស្រុកខុសច្បាប់នៅព្រំដែនខាងត្បូងរបស់ខ្លួន បានសន្យាជួយប្រាក់រាប់រយលានដុល្លារដល់ជនចំណាកស្រុកវេនេស៊ុយអេឡានៅទូទាំងតំបន់ បន្តដំណើរការផ្តល់ទិដ្ឋាការសំរាប់ជនជាតិគុយបានិងហៃទី ព្រមទាំងបន្ធូរបន្ថយការជួលកម្មករទៅពីអាម៉េរិកកណ្តាល៕