Views: 1
ប្រែសម្រួល : កញ្ញាដាលីស (ដេល្លីម៉េល) ៖ លោកប្រធានាធិបតី ចូ បៃដិន បានប្រកាសព័ត៌មានកីឡាដ៏ធំមួយទៅកាន់ហ្វូងមនុស្សក្នុងរដ្ឋមីស៊ីហ្គែន បន្ទាប់ពីសុន្ទរកថារបស់គាត់កាលពីថ្ងៃអង្គារទី២៩វិច្ឆិកា ដោយផ្សាយថាក្រុមអាម៉េរិកឈ្នះលើអ៊ីរ៉ង់ក្នុងការប្រកួតវើលខាប់ ជាហេតុនាំឱ្យហ្វូងមនុស្សស្រែកច្រៀងថា U.S.A!។
លោកប្រធានាធិបតីទើបតែបញ្ចប់សុន្ទរកថារបស់គាត់នៅទីក្រុងបេស៊ីធី (Bay City) រដ្ឋមីស៊ីហ្គែន ដែលផ្តោតលើសេដ្ឋកិច្ច តម្លៃឧស្ម័ន និងការវិនិយោគបរទេសក្នុងការផលិតបន្ទះឈីប។ គាត់ពិតជារីករាយជាមួយនឹងហ្វូងមនុស្សជាមួយនឹងបទចម្រៀងជាតិ Stars and Stripes Forever នៅពេលដែលជំនួយការម្នាក់ចេញមកខ្សឹបប្រាប់ព័ត៌មានកីឡានេះ។
នោះបានជំរុញឱ្យលោកបៃដិនឡើងលើឆាកវិញ ហើយប្រកាសពីការឡើងវគ្គ១៦ក្រុមចុងក្រោយរបស់ក្រុមជម្រើសជាតិអាម៉េរិក។
លោកបៃដិននិយាយថា “សហរដ្ឋអាម៉េរិក ១ អ៊ីរ៉ង់ ០” បន្ទាប់ពីក្រុមអាម៉េរិកបានទប់អ៊ីរ៉ង់ដល់ចប់ការប្រកួត បន្ទាប់ពីការស៊ុតបញ្ចូលទីក្នុងតង់ទីមួយ។
លោកប្រធានាធិបតីបាននិយាយទាំងរំភើបញាប់ញ័រថា “ហេហេហេហេ! សហរដ្ឋអាម៉េរិក។ សហរដ្ឋអាម៉េរិក!”។
គាត់បានបន្តទាំងញញឹមថា “នោះជាការប្រកួតដ៏ធំ”។
លោកបៃដិននិយាយថា “ខ្ញុំបាននិយាយទៅកាន់គ្រូបង្វឹកនិងកីឡាករ។ ខ្ញុំបាននិយាយថា អ្នកអាចធ្វើវាបាន” ដោយលើកឡើងថា ក្រុមអាម៉េរិកមានមន្ទិលសង្ស័យលើខ្លួនឯងអំពីការលេងទល់នឹងអ៊ីរ៉ង់ ដែលជាក្រុមមានចំណាត់ថ្នាក់កំពូលនៅអាស៊ី”។
គាត់និយាយថាទៀតថា “ពួកគេធ្វើវាបានហើយ! ព្រះស្រឡាញ់ពួកគេ។ យ៉ាងណាមិញ គ្រាន់តែគិតថាអ្នកទាំងអស់គ្នាប្រហែលជាចង់ស្តាប់រឿងនេះ”។ បន្ទាប់មកគាត់បានដើរចេញពីឆាកយ៉ាងលឿន បន្ទាប់ពីអ្នកថតរូបដែលធ្វើដំណើរជាមួយគាត់បានផ្តិតយករូបភាពមិនធម្មតានេះ៕
លោកបៃដិនត្រឡប់មកឆាកវិញដើម្បីប្រកាសជ័យជម្នះរបស់អាម៉េរិកលើអ៊ីរ៉ង់ក្នុងវើលខាប់