Views: 14
ដោយ៖ សុវណ្ណកុម្ភៈ / ភ្នំពេញ៖ សម្រាប់កម្ពុជា ចំបាប់ជាប្រភេទកីឡា ដែលមានសក្ដានុពលមួយ ដែលស្ទើរតែគ្រប់ស៊ីហ្គេម ប្រភេទកីឡាមួយនេះ តែងតែប្រជែងបានមេដាយ ដែលមានកម្រិតខ្ពស់ ។
សម្រាប់ស៊ីហ្គេមលើកទី៣១ នៅទីក្រុងហាណូយ ដែលទើបតែបញ្ចប់ទៅនេះ ចំបាប់រកបាន មេដាយមាស ១គ្រឿង ប្រាក់១គ្រឿង និងសំរិទ្ធ៤គ្រឿង គឺឈរនៅចំណាត់ថ្នាក់លេខ៣ លើ ១៥ ប្រភេទកីឡា ដែលប្រជែងបានមេដាយ។
អនុប្រធានសហព័ន្ធកីឡាចំបាប់កម្ពុជា គឺលោក Cassey Barnett បានថ្លែងថាៈ សហព័ន្ធកីឡាចំបាប់កម្ពុជា បានដាក់ចេញ នូវយុទ្ធសាស្ត្រ បង្កើនឲ្យមានការប្រកួតទាំងក្នុងស្រុក និងក្រៅស្រុក ដើម្បីទទួលបានបទពិសោធន៍ បច្ចេកទេស និងដើម្បីពង្រឹងស្មារតីកីឡាករ កីឡាការិនី សម្រាប់ត្រៀមដណ្ដើម មេដាយឲ្យបានច្រើនជាងនេះ នាឆ្នាំ២០២៣ ដែលកម្ពុជា ធ្វើជាម្ចាស់ផ្ទះ ជាលើកដំបូង ។
សហព័ន្ធ នឹងបង្កើននូវការហ្វឹកហាត់ ឲ្យកាន់តែខ្លាំងថែមទៀត ដើម្បីបង្កើនសិទ្ធផល ឲ្យកាន់តែខ្ពស់ ពិសេសការបញ្ជូនពួកគេ ទៅហ្វឹកហាត់ នៅក្រៅប្រទេស និងការចូលរួមប្រកួតកម្រិតអន្តរជាតិនានា ដើម្បីទទួលបានបទពិសោធន៍ ឆ្ពោះទៅដណ្ដើមមេដាយ ក្នុងឋានៈជា ម្ចាស់ផ្ទះបន្តវេន ទី៣២ ឆ្នាំ២០២៣ ។
សម្រាប់ចុងឆ្នាំ២០២២នេះ កម្ពុជា គ្រោងធ្វើជាម្ចាស់ផ្ទះ រៀបចំការប្រកួតចំបាប់ជើងឯកអាស៊ីអាគ្នេយ៍ ដើម្បីពង្រឹងស្មារតីកីឡាករ កីឡាការិនី ដែលនេះ ក៏ជាការត្រៀមខ្លួនមួយ សម្រាប់ស៊ីហ្គេម ឆ្នាំ២០២៣ដែរ ៕/V