Views: 1
ប្រែសម្រួល : កញ្ញាដាលីស (ដេល្លីម៉េល) ៖ មេដឹកនាំបង់ក្លាដែសបានប្រាប់មន្ត្រីអង្គការសហប្រជាជាតិដែលកំពុងបំពេញទស្សនកិច្ចកាលពីថ្ងៃពុធទី១៧សីហាថាជនភៀសខ្លួនជនជាតិភាគតិចរ៉ូហ៊ីងយ៉ារាប់សែននាក់ដែលរស់នៅក្នុងជំរំចង្អៀតក្នុងប្រទេសបង់ក្លាដែស ត្រូវតែត្រឡប់ទៅមីយ៉ាន់ម៉ាវិញ ជាកន្លែងដែលពួកគេបានភៀសខ្លួនចេញពីរលកនៃការធ្វើទុក្ខបុកម្នេញដោយហិង្សា។
នាយករដ្ឋមន្ត្រីលោកស្រី សេក ហាស៊ីណា (Sheikh Hasina) បានធ្វើអត្ថាធិប្បាយបែបនេះទៅកាន់ឧត្តមស្នងការអ.ស.បទទួលបន្ទុកសិទ្ធិមនុស្សលោកស្រី មីសែល បាឆេឡេត (Michelle Bachelet) នៅរដ្ឋធានីដាក្ការបស់បង់ក្លាដែស។ លោកស្រីបាឆាឡេតបានមកដល់កាលពីថ្ងៃអាទិត្យ ហើយបានទៅមើលជំរំជនជាតិរ៉ូហ៊ីងយ៉ានៅស្រុកខុកស្បាហ្សា (Cox’s Bazar)ក្បែរព្រំដែនជាមួយមីយ៉ាន់ម៉ា។
លោកស្រីហាស៊ីណាត្រូវបានដកស្រង់សម្តីដោយលេខាធិការព័ត៌មានរបស់គាត់ ឈ្មោះ អ៊ីសានុល ការីម (Ihsanul Karim) យ៉ាងដូច្នេះថា “ជនជាតិរ៉ូហ៊ីងយ៉ា គឺជាជនជាតិមីយ៉ាន់ម៉ា ហើយពួកគេត្រូវតែនាំយកត្រឡប់ទៅវិញ”។
ជនមូស្លីមរ៉ូហ៊ីងយ៉ាប្រឈមមុខនឹងការរើសអើងយ៉ាងទូលំទូលាយនៅក្នុងប្រទេសមីយ៉ាន់ម៉ា ដែលកាន់ពុទ្ធសាសនាភាគច្រើនជាកន្លែងដែលពួកគេភាគច្រើនត្រូវបានបដិសេធសញ្ជាតិនិងសិទ្ធិជាច្រើនទៀត។ មនុស្សជាង ៧០០.០០០ នាក់បានភៀសខ្លួនទៅកាន់ប្រទេសបង់ក្លាដែស ដោយចាប់ផ្តើមនៅចុងខែសីហាឆ្នាំ ២០១៧ នៅពេលដែលយោធាមីយ៉ាន់ម៉ាបានចាប់ផ្តើម “ប្រតិបត្តិការបោសសម្អាត” ប្រឆាំងនឹងពួកគេ បន្ទាប់ពីការវាយប្រហារដោយក្រុមឧទ្ទាម។ ស្ថានភាពសុវត្ថិភាពក្នុងប្រទេសមីយ៉ាន់ម៉ាកាន់តែអាក្រក់ទៅបន្ទាប់ពីការចូលកាន់កាប់អំណាចដោយយោធាកាលពីឆ្នាំមុន។
បច្ចុប្បន្ន បង់ក្លាដែសកំពុងទទួលជនភៀសខ្លួនរ៉ូហ៊ីងយ៉ាជាង១លាននាក់។
ជនភៀសខ្លួននឹងប្រារព្ធខួបលើកទីប្រាំនៃការហូរចូលចុងក្រោយបំផុតរបស់ពួកគេនៅក្នុងប្រទេសបង់ក្លាដែស ចំពេលមានការប៉ុនប៉ងបរាជ័យក្នុងការបញ្ជូនពួកគេត្រឡប់ទៅស្រុកវិញ។ កាលពីដើមខែនេះ បង់ក្លាដែសបានស្វែងរកកិច្ចសហប្រតិបត្តិការពីប្រទេសចិនក្នុងការធ្វើមាតុភូមិនិវត្តន៍ជនជាតិរ៉ូហ៊ីងយ៉ាទៅកាន់មីយ៉ាន់ម៉ាក្នុងអំឡុងដំណើរទស្សនកិច្ចរបស់រដ្ឋមន្ត្រីការបរទេសលោក វ៉ាង យី។ ចិនបានចុះហត្ថលេខាលើកិច្ចព្រមព្រៀងខែវិច្ឆិកា ឆ្នាំ ២០១៧ ជាមួយមីយ៉ាន់ម៉ា ក្នុងគោលបំណងបញ្ជូនពួកគេត្រឡប់ទៅវិញ។
លោកស្រីហាស៊ីណានិងរដ្ឋមន្ត្រីខុទ្ទកាល័យមួយចំនួនមុននេះបានសម្តែងការខកចិត្តចំពោះអ្វីដែលពួកគេហៅថាភាពអសកម្មរបស់មីយ៉ាន់ម៉ាក្នុងការយកពួកគេត្រឡប់ទៅវិញនៅក្រោមកិច្ចព្រមព្រៀងនេះ។ អាជ្ញាធរអ.ស.បនិងបង់ក្លាដែសបានព្យាយាមយ៉ាងហោចណាស់ពីរដង ដើម្បីចាប់ផ្តើមធ្វើមាតុភូមិនិវត្តន៍ ប៉ុន្តែជនភៀសខ្លួនបានបដិសេធមិនព្រមទៅ ដោយលើកឡើងពីការព្រួយបារម្ភអំពីសុវត្ថិភាពនៅក្នុងប្រទេសមីយ៉ាន់ម៉ា។
នៅពេលដែលលោកស្រីបាឆេឡេតចុះទៅមើលជំរំកាលពីថ្ងៃពុធ ជនភៀសខ្លួនបានជំរុញឱ្យអ.ស.បជួយកែលម្អសុវត្ថិភាពនៅក្នុងប្រទេសមីយ៉ាន់ម៉ា ដូច្នេះទើបពួកគេអាចត្រឡប់ទៅវិញបាន។
អ.ស.បបាននិយាយនៅក្នុងសេចក្តីថ្លែងការណ៍មួយថា ជនភៀសខ្លួនបានពណ៌នាអំពី “ការសោកសៅ និងការឈឺចាប់របស់ពួកគេ” ដល់លោកស្រីបាឆេឡេត។
អ.ស.បបានដកស្រង់សម្តីជនភៀសខ្លួនប្រាប់ទៅលោកស្រីយ៉ាងដូច្នេះថា “នៅពេលដែលសិទ្ធិរបស់យើងត្រូវបានគោរព យើងអាចមានជីវភាពរស់នៅរបស់យើងម្តងទៀត ហើយយើងអាចមានដី ហើយយើងអាចមានអារម្មណ៍ថាយើងជាផ្នែកមួយនៃប្រទេស”៕
ឧត្តមស្នងការអ.ស.បទទួលបន្ទុកសិទ្ធិមនុស្សលោកស្រី មីសែល បាឆេឡេត ថ្លែងក្រោយបានទៅមើលជំរំជនជាតិរ៉ូហ៊ីងយ៉ានៅស្រុកខុកស្បាហ្សា (Cox’s Bazar)ក្បែរព្រំដែនជាមួយមីយ៉ាន់ម៉ា