ដោយៈ សរិទ្ធ ,មុនីរ័ត្ន/ ភ្នំពេញៈ ជនសង្ស័យចំនួន បីនាក់ ជាប់ពាក់ព័ន្ធករណី ជួញដូរគ្រឿងញៀនឆ្លងដែន ចេញពីកម្ពុជា ទៅប្រទេសនូវែលសេឡង់ និង អូស្ត្រាលី តាមរយៈកញ្ចប់បញ្ញើ ប្រៃសណីយ៍ មានទម្ងន់ជិត ៣ គីឡូក្រាម បានត្រូវសមត្ថកិច្ចនគរបាល នៃមន្ទីរប្រឆាំងគ្រឿងញៀន បញ្ជូនមកតុលាការ នៅរសៀល ថ្ងៃទី៣០ ខែវិច្ឆិកា ឆ្នាំ២០២០ ដើម្បីចាត់ការ តាមច្បាប់។
សមត្ថកិច្ចជំនាញ បានបញ្ជាក់ថាៈ កម្លាំងមន្ទីរប្រឆាំងគ្រឿងញៀន បានសហការជាមួយ សមត្ថកិច្ចគយ ប្រចាំការនៅឃ្លាំងដឹកទំនិញ ( Cargo ) នៃអាកាសយានដ្ឋាន អន្តរជាតិភ្នំពេញ ស្នងការដ្ឋាននគរបាល រាជធានីភ្នំពេញ និងខេត្តព្រះសីហនុ និងមានការសម្របសម្រួល ពីលោក សឿន មុនីរ័ត្ន ព្រះរាជអាជ្ញារង អមសាលាដំបូង រាជធានីភ្នំពេញ បានស្រាវជ្រាវ ស៊ើបអង្កេត និងឈានទៅបង្ក្រាបបាន ក្រុមជួញដូរគ្រឿងញៀន ឆ្លងដែន ចេញពីកម្ពុជា ទៅប្រទេសនូវែលសេឡង់ និងអូស្ត្រាលី ដោយលាក់បង្កប់ ក្នុងកញ្ចប់បញ្ញើប្រៃសណីយ៍ ចំនួន ៣ លើក ជាបន្តបន្ទាប់ នៅរាជធានីភ្នំពេញ និងខេត្តព្រះសីហនុ ដោយចាប់ខ្លួនជនសង្ស័យ ចំនួន បីនាក់ និងចាប់យកវត្ថុតាង គ្រឿងញៀន សរុប ២.៥៤៩,៧៧ ក្រាម ។
នគរបាល នៃមន្ទីរប្រឆាំងគ្រឿងញៀន បញ្ជូនជនសង្ស័យបីនាក់ មកតុលាការ ករណីជួញដូរគ្រឿងញៀនឆ្លងដែន ចេញពីកម្ពុជា តាមកញ្ចប់បញ្ញើប្រៃសណីយ៍
ប្រតិបត្តិការបង្ក្រាប ការជួញដូរគ្រឿងញៀនឆ្លងដែន ជាលទ្ធផល រួមមានៈ លើកទី១. នៅថ្ងៃទី២០ ខែតុលា ឆ្នាំ២០២០ នៅចំណុចឃ្លាំងទំនិញ ( Cargo ) នៃអាកាសយានដ្ឋាន អន្តរជាតិភ្នំពេញ ចាប់យកវត្ថុតាងគ្រឿងញៀន ប្រភេទមេតំហ្វេតាមីន (ICE) ទម្ងន់ ៨៥,៣២ ក្រាម ដោយលាក់បង្កប់ ក្នុងដំបង ២ កំណាត់ ។
លើកទី២. នៅថ្ងៃទី៥ ខែវិច្ឆិកា ឆ្នាំ២០២០ នៅចំណុចឃ្លាំងទំនិញ (Cargo) នៃអាកាសយានដ្ឋាន អន្តរជាតិភ្នំពេញ ចាប់យកវត្ថុតាង គ្រឿងញៀន ប្រភេទមេតំហ្វេតាមីន (ICE) ទម្ងន់ ១.២៩៥,៦៧ ក្រាម ដោយលាក់បង្កប់ ក្នុងបដិមាករ ព្រះពុទ្ធរូបឈើ ២ ព្រះអង្គ ។
លើកទី៣. នៅថ្ងៃទី២៥ វិច្ឆិកា នៅចំណុចក្រុមហ៊ុន IAL ផ្ទះលេខ១៦បេ ផ្លូវសូនី សង្កាត់ទឹកថ្លា ខណ្ឌសែនសុខ រាជធានីភ្នំពេញ ឃាត់ខ្លួនបុរស ជាជនសង្ស័យ ២ នាក់ ដែលជាអ្នកផ្ញើគ្រឿងញៀន គឺៈ ១- ឈ្មោះ លឿង សៀងហៃ អាយុ៣១ឆ្នាំ និង២-ឈ្មោះ ឈុន ម៉ារ៉ាឌី អាយុ ២៥ឆ្នាំ។
វត្ថុតាងដែលសមត្ថកិច្ច ដកហូតបានរួមមានៈ គ្រឿងញៀនប្រភេទមេតំហ្វេតាមីន (ICE) ទម្ងន់ ១.០៤៨,៤៨ ក្រាម លាក់បង្កប់ក្នុងរូបបដិមាករ ៤ អង្គ ព្រះសិរ១. ព្រហ្ម២ រូបព្រះបាទជ័យវរ្ម័ន១ ។
លុះនៅថ្ងៃទី២៧ វិច្ឆិកា សមត្ថកិច្ច បានបន្តការស្រាវជ្រាវ កំណត់បានមុខសញ្ញាមេខ្លោងម្នាក់ និងឈានទៅចាប់ខ្លួន ឈ្មោះ CHEN KEXI ភេទប្រុស ជាជនជាតិចិន អាយុ ៣៩ ឆ្នាំ ស្នាក់នៅក្នុងបន្ទប់ ២០៥ អាផាត់មិន វិមានឯករាជ្យ ផ្លូវ១២៤ សង្កាត់លេខ៣ ក្រុង-ខេត្តព្រះសីហនុ និងចាប់យកវត្ថុតាងបានគ្រឿងញៀន ប្រភេទមេតំហ្វេតាមីន (ICE) ទម្ងន់ ១២០,២៧ក្រាម បន្ថែមទៀត ដោយលាក់បង្កប់ ក្នុងចម្លាក់ឈើ រូបដំរី ២រូប និងដំបងឈើ ២ កំណាត់ ៣ គូ ៕/V
នគរបាល នៃមន្ទីរប្រឆាំងគ្រឿងញៀន បញ្ជូនជនសង្ស័យបីនាក់ មកតុលាការ ករណីជួញដូរគ្រឿងញៀនឆ្លងដែន ចេញពីកម្ពុជា តាមកញ្ចប់បញ្ញើប្រៃសណីយ៍
