Views: 3
ប្រែសម្រួល : កញ្ញាដាលីស (ដេល្លីម៉េល) ៖ រដ្ឋមន្ត្រីការពារជាតិដាណឺម៉ាកលោក ម៉ូធិន បូតស្កូវ (Morten Bodskov) បាននិយាយថាប្រទេសលោកខាងលិចកាលពីថ្ងៃព្រហស្បតិ៍ទី១១សីហាបានសន្យាផ្តល់ប្រាក់ជាង ១,៥ ពាន់លានអឺរ៉ូ (១,៥៥ ពាន់លានដុល្លារ) ជាសាច់ប្រាក់ សម្ភារៈ និងការបណ្តុះបណ្តាលដើម្បីបង្កើនសមត្ថភាពយោធារបស់អ៊ុយក្រែនក្នុងសង្គ្រាមរបស់ខ្លួនប្រឆាំងនឹងរុស្ស៊ី។
ប្រាក់ ដែលត្រូវបានសន្យាដោយក្រុមប្រទេសចំនួន ២៦ ក្នុងសន្និសីទនៅទីក្រុងកូប៉ិនហាក នឹងត្រូវប្រើប្រាស់សម្រាប់ផ្គត់ផ្គង់ឡើងវិញនូវសព្វាវុធ កាំជ្រួច និងគ្រាប់យុទ្ធភ័ណ្ឌដែលមានស្រាប់បង្កើនការផលិតអាវុធសម្រាប់អ៊ុយក្រែន បណ្តុះបណ្តាលទាហានអ៊ុយក្រែន និងដោះមីនចេញពីតំបន់ដែលហែកហួរដោយសង្គ្រាមនៅអ៊ុយក្រែន។
លោកបូតស្កូវបានប្រាប់អ្នកសារព័ត៌មាននៅចុងបញ្ចប់នៃសន្និសីទដែលប្រមូលផ្តុំរដ្ឋមន្ត្រីការពារជាតិអឺរ៉ុបដើម្បីពិភាក្សាអំពីការគាំទ្ររយៈពេលវែងសម្រាប់ការការពាររបស់អ៊ុយក្រែនប្រឆាំងនឹងការឈ្លានពានរបស់រុស្ស៊ីថា “យើងនឹងបន្តជួយអ៊ុយក្រែនក្នុងតម្រូវការយោធារបស់ខ្លួន”។
លោកបូតស្កូវបាននិយាយថា រដ្ឋមន្ត្រីការពារជាតិនៃប្រទេសប៉ូឡូញ ស្លូវ៉ាគី និងសាធារណរដ្ឋឆែក បានបង្ហាញពីឆន្ទៈក្នុងការពង្រីកការផលិតប្រព័ន្ធកាំភ្លើងធំគ្រាប់យុទ្ធភ័ណ្ឌនិងឧបករណ៍យោធាផ្សេងទៀតទៅកាន់អ៊ុយក្រែន។
ចក្រភពអង់គ្លេស ដែលបានបរិច្ចាគប្រព័ន្ធសព្វាវុធទំនើបៗរួចហើយដល់អ៊ុយក្រែននិងផ្តល់ការហ្វឹកហ្វឺនដល់ទាហានរាប់ពាន់នាក់ កាលពីថ្ងៃព្រហស្បតិ៍បានសន្យាផ្តល់ប្រាក់បន្ថែម ៣០០ លានអឺរ៉ូរួមទាំងប្រព័ន្ធបាញ់គ្រាប់រ៉ុក្កែតចម្រុះ និងកាំជ្រួច M31A1 ដែលអាចវាយប្រហារចំៗគោលដៅនៅចម្ងាយរហូតដល់ ៨០ គីឡូម៉ែត្រ។
រដ្ឋមន្ត្រីការពារជាតិអង់គ្លេស លោក បិន វ៉ាល់ឡេស (Ben Wallace) បាននិយាយថា “ប្រធានាធិបតីពូទីនប្រហែលជាភ្នាល់ថាពេលខែសីហាចូលមកដល់…យើងទាំងអស់គ្នានឹងធុញទ្រាន់នឹងជម្លោះនេះ ហើយសហគមន៍អន្តរជាតិនឹងចាកចេញទៅទិសដៅផ្សេងៗគ្នា។ ថ្ងៃនេះគឺជាភស្តុតាងបង្ហាញពីភាពផ្ទុយគ្នាស្រឡះពីការគិតរបស់គាត់”។
ការប្តេជ្ញាចិត្តនេះបានកើតឡើងបន្ទាប់ពីរដ្ឋាភិបាលនៅទីក្រុងគៀវបានធ្វើការអំពាវនាវម្តងហើយម្តងទៀតទៅកាន់លោកខាងលិចឱ្យបញ្ជូនអាវុធបន្ថែមទៀត រួមទាំងកាំភ្លើងធំរយៈចម្ងាយឆ្ងាយ ខណៈខ្លួនព្យាយាមបង្វែរប្រៀបឈ្នះមកវិញលើការឈ្លានពានរបស់រុស្ស៊ីកាលពីថ្ងៃទី ២៤ ខែកុម្ភៈ៕
ទាហានអ៊ុយក្រែនប្រើកាំភ្លើងធំផ្តល់ដោយលោកខាងលិចវាយបកលើទីតាំងរុស្ស៊ីនៅខាគីវ
