Views: 2
ដោយៈសុវណ្ណកុម្ភៈ/ភ្នំពេញ៖ប្រធានក្រុមកង់ភ្នំជម្រើសជាតិគឺកីឡាករ ហួត លយរស្មីដែលពេលនេះ កំពុងតែបោះជំរុំហ្វឹកហាត់កីឡាកង់ភ្នំក្នុងស្រុកបន្ទាយស្រីខេត្តសៀមរាបបានបញ្ជាក់ថារូបគេមានមោទនភាពដែលក្លាយជាកីឡាករជម្រើសជាតិប្រកួតតំណាងឱ្យកម្ពុជា នាព្រឹត្តិការណ៍ស៊ីហ្គេម ឆ្នាំ២០២៣ ។
ជាកីឡាករដែលមានដើមកំណើតនៅខេត្តសៀមរាបរស្មីបាននិយាយថារូបគេជាប់ជាកីឡាករជម្រើស ជាតិកង់ភ្នំក្នុងឆ្នាំ២០១៨ក្រោយសហព័ន្ធកីឡាទោចក្រយានពិនិត្យឃើញគេមានសិទ្ធផលល្អ បន្ទាប់ពីការប្រកួតថ្នាក់ជាតិរួចត្រូវបានបញ្ចប់នោះ។រូបគេមានមោទនភាពដែលបានក្លាយជាកីឡាករជម្រើសជាតិដែលត្រូវបានសហព័ន្ធនិងគ្រូបង្វឹកជ្រើសរើសឱ្យហ្វឹកហាត់ក្នុងជំរុំត្រៀមការប្រកួតកម្រិតអន្តរជាតិជាពិសេសព្រឹត្តិការណ៍កីឡាស៊ីហ្គេម។គេបានប្តេជ្ញាចិត្តថានឹងប្រឹងប្រែងឱ្យអស់សមត្ថភាពដុសខាតចំណុចខ្វះខាត ស្វែងរកចំណុចខ្លាំង ដើម្បីឈានទៅប្រជែងមេដាយឱ្យបានពីស៊ីហ្គេម នៅកម្ពុជាពីព្រោះឆ្លងកាត់ការហ្វឹកហាត់យ៉ាងយកចិត្តទុកដាក់ពីគ្រូបង្វឹករយៈពេលជាងបីឆ្នាំនេះ និងឆ្លងកាត់បទពិសោធន៍ស៊ីហ្គេម២លើកក្នុង២០១៩នៅហ្វីលីពីននិង២០២២នៅប្រទេសវៀតណាមបានធ្វើឱ្យកីឡាករមកពីខេត្តសៀមរាបរូបនេះបង្ហាញជំនឿចិត្តយ៉ាងមុតមាំថានឹងឈានទៅដណ្តើមមេដាយអោយបានជូនកម្ពុជាពីព្រឹត្តិការណ៍ជាប្រវត្តិសាស្ត្រដំបូងរបស់ព្រះរាជាណាចក្រកម្ពុជា។កាលស៊ីហ្គេមលើកទី៣១នៅប្រទេសវៀតណាមកីឡាករហួតលយរស្មីទទួលបានចំណាត់ថ្នាក់លេខ៦ ពីព្រឹត្តិការណ៍កីឡាស៊ីហ្គេម លើកទី៣១ ឆ្នាំ២០២២ នៅប្រទេសវៀតណាម និងថ្មីៗនេះ ឈ្នះពានរង្វាន់ពីការប្រកួត King Cup ឆ្នាំ២០២២ នៅប្រទេសថៃទៀតផង។
សម្រាប់ព្រឹត្តិការណ៍ស៊ីហ្គេមលើកទី៣២ឆ្នាំ២០២៣ដែលកម្ពុជាធ្វើជាម្ចាស់ផ្ទះសហព័ន្ធកីឡាទោចក្រយាន បានត្រៀម៩វិញ្ញាសា រួមមាន៖ កង់ភ្នំ ៥វិញ្ញាសា , កង់គក់ ៤វិញ្ញាសា។សរុបកីឡាករ កីឡាការិនីជម្រើសជាតិកម្ពុជាកង់ភ្នំ និងកង់គួកមានចំនួន១២នាក់ ក្នុងនោះកីឡាករ ៨នាក់ និងកីឡាការិនី ៤នាក់ ក្រោមការបង្វឹកពីគ្រូបង្វឹក៤នាក់ ដែលកំពុងបន្តបោះជំរុំហ្វឹកហាត់ នៅតំបន់ឧទ្យានជាតិភ្នំគូលែន ស្ថិតនៅស្រុកបន្ទាយស្រី ខេត្តសៀមរាប៕សរន