Views: 1
ប្រែសម្រួល : កញ្ញាដាលីស (ដេល្លីម៉េល) ៖ បេសកជនពិសេសរបស់អ.ស.បសម្រាប់មីយ៉ាន់ម៉ា លោកស្រី ណូអ៊ីលីន ហ៊ីហ្សឺ (Noeleen Heyzer)កាលពីថ្ងៃពុធទី១៧សីហាបានជួបជាមួយប្រមុខរដ្ឋាភិបាលបន្តុបដោយយោធារបស់ខ្លួន ហើយបានអំពាវនាវឱ្យគាត់បញ្ឈប់ជាបន្ទាន់នូវរាល់អំពើហិង្សា គាំទ្រផ្លូវនយោបាយត្រឡប់ទៅការគ្រប់គ្រងបែបស៊ីវិលនិងលទ្ធិប្រជាធិបតេយ្យវិញ និងអនុញ្ញាតឱ្យអតីតមេដឹកនាំដែលកំពុងជាប់ពន្ធនាគារ លោកស្រី អ៊ុងសាន ស៊ូជី ត្រឡប់មកផ្ទះវិញ និងបានសុំជួបជាមួយលោកស្រី។
នៅក្នុងបេសកកម្មលើកដំបូងរបស់លោកស្រីទៅកាន់ប្រទេសហែកហួរដោយជម្លោះនេះ លោកស្រីហេហ្សឺក៏បានរំលឹកឡើងវិញដែរនូវការព្រួយបារម្ភយ៉ាងខ្លាំងរបស់អគ្គលេខាធិការ លោក អង់តូនីញ៉ូ គូថេរ៉េស អំពីវិបត្តិមនុស្សធម៌ សន្តិសុខ សេដ្ឋកិច្ច និងនយោបាយរបស់មីយ៉ាន់ម៉ា ហើយបានរំលឹកឡើងវិញនូវការអំពាវនាវរបស់ប្រមុខអ.ស.បឱ្យដោះលែងអ្នកទោសនយោបាយទាំងអស់។ លោកស្រីក៏បានជំរុញឱ្យឧត្តមសេនីយ៍ មីន អ៊ុងហ្លាំង ផ្អាកការប្រហារជីវិតនាពេលខាងមុខផងដែរ បន្ទាប់ពីការប្រហារជីវិតសកម្មជននយោបាយបួននាក់នាពេលថ្មីៗនេះដែលទាក់ទាញការថ្កោលទោសទូទាំងពិភពលោក។
អ្នកនាំពាក្យរងរបស់អ.ស.ប លោក ហ្វាហាន ហាក់ (Farhan Haq)បាននិយាយថា សេចក្តីថ្លែងការណ៍របស់លោកស្រីហ៊ីហ្សឺក្នុងដំណើរទស្សនកិច្ចរយៈពេលពីរថ្ងៃរបស់ខ្លួនត្រូវបានចេញផ្សាយខណៈលោកស្រីចាកចេញពីប្រទេស ហើយលោកស្រីមិនអាចជួបលោកស្រីស៊ូជីបានទេ ប៉ុន្តែសង្ឃឹមថាពួកគេនឹងជួបគ្នានៅពេលអនាគត។
លោកហាក់បាននិយាយថា លោកស្រីហ៊ីហ្សឺនិងឧត្តមសេនីយ៍មាន “ការពិភាក្សាល្អ” ហើយអ.ស.បនឹងមើលថាតើការទាមទារសំខាន់ៗរបស់លោកស្រីនឹងត្រូវបានអនុវត្តដែរឬយ៉ាងណា។ លោកបាននិយាយថា អ.ស.បនឹង “បន្តជំរុញលើចំណុចទាំងនោះ”។
បន្ទាប់មកទៀត សេចក្តីថ្លែងការណ៍របស់លោកស្រីហ៊ីហ្សឺបាននិយាយថា លោកស្រីនិងឧត្តមសេនីយ៍ហ្លាំង “បានយល់ព្រមចូលរួមក្នុងការសន្ទនាដោយស្មោះត្រង់ដោយផ្តោតលើតម្រូវការសម្រាប់ដំណោះស្រាយរួមបញ្ចូលគ្នាចំពោះមីយ៉ាន់ម៉ាដែលមានសន្តិភាពនិងប្រជាធិបតេយ្យ ដែលឆ្លុះបញ្ចាំងពីឆន្ទៈរបស់ប្រជាជន”។
ទូរទស្សន៍ MRTV ដែលគ្រប់គ្រងដោយរដ្ឋបាននិយាយថា លោកស្រីហេហ្សឺនិងលោកមីន អ៊ុងហ្លាំងបានផ្លាស់ប្តូរទស្សនៈស្តីពីការលើកកម្ពស់ទំនុកចិត្តនិងកិច្ចសហប្រតិបត្តិការរវាងមីយ៉ាន់ម៉ានិងអង្គការសហប្រជាជាតិ។ ទូរទស្សន៍មិនបានផ្តល់ព័ត៌មានលម្អិតណាមួយអំពីកិច្ចពិភាក្សានៅក្នុងរដ្ឋធានីណៃពិដោរបស់មីយ៉ាន់ម៉ានោះទេ៕
បេសកជនពិសេសរបស់អ.ស.បសម្រាប់មីយ៉ាន់ម៉ា លោកស្រី ណូលីន ហេហ្សឺ ជួបលោក មីន អ៊ុងហ្លាំងក្នុងទីក្រុងណៃពិដោកាលពីថ្ងៃពុធ
