Views: 19
ប្រែសម្រួល : កញ្ញាដាលីស (ដេល្លីម៉េល) ៖ ជាង៨០ភាគរយនៃចំនួនប្រជាជនរបស់តំបន់ណាហ្គ័រណូ-ការ៉ាបាក់ (Nagorno-Karabakh) បានភៀសខ្លួនទៅកាន់ប្រទេសអាមេនី ខណៈដែលរដ្ឋាភិបាលផ្តាច់ខ្លួនក្នុងតំបន់បាននិយាយថា ខ្លួននឹងរំលាយ ហើយសាធារណរដ្ឋដែលមិនទទួលស្គាល់នៅក្នុងប្រទេសអាស៊ែរបៃហ្សង់នឹងឈប់មានតទៅទៀតនៅដំណាច់ឆ្នាំនេះ។
រដ្ឋាភិបាលអាមេនីបាននិយាយកាលពីល្ងាចថ្ងៃសុក្រថា មនុស្សជាង ៩៧.៧០០ នាក់ពីប្រជាជនប្រហែល ១២០.០០០ នាក់បានភៀសខ្លួនទៅកាន់ប្រទេសអាមេនីចាប់តាំងពីអាស៊ែរបៃហ្សង់បានវាយប្រហារនិងបញ្ជាឱ្យពួកសកម្មប្រយុទ្ធក្នុងតំបន់ទម្លាក់អាវុធចុះ។
ចំណាត់ការនេះបានធ្វើឡើងបន្ទាប់ពីអាស៊ែរបៃហ្សង់បានបើកការវាយប្រហារដូចផ្លេកបន្ទោរកាលពីសប្តាហ៍មុន ដើម្បីដណ្តើមបានការគ្រប់គ្រងពេញលេញលើតំបន់ផ្តាច់ខ្លួននេះ និងទាមទារឱ្យកងទ័ពអាមេនីនៅតំបន់ណាហ្គ័រណូ-ការ៉ាបាក់ទម្លាក់អាវុធនិងរំសាយរដ្ឋាភិបាលផ្តាច់ខ្លួន។
ក្រឹត្យមួយ ដែលបានចុះហត្ថលេខាដោយប្រធានាធិបតីផ្តាច់ខ្លួនក្នុងតំបន់លោក សាមវែល សាក់រ៉ាម៉ាន់យ៉ាន (Samvel Shakhramanyan) បានយោងលើកិច្ចព្រមព្រៀងថ្ងៃទី ២០ ខែកញ្ញា ដើម្បីបញ្ចប់ការប្រយុទ្ធ ដែលក្នុងនោះអាស៊ែរបៃហ្សង់នឹងអនុញ្ញាតឱ្យមាន “ការចល័តទីដោយសេរី ស្ម័គ្រចិត្ត និងគ្មានការរារាំង” របស់អ្នកស្រុកណាហ្គ័រណូ-ការ៉ាបាក់ទៅកាន់ប្រទេសអាមេនី។
អ្នកខ្លះ ដែលបានភៀសខ្លួនចេញពីរដ្ឋធានីក្នុងតំបន់ ឈ្មោះ ស្តេផាណាកឺត (Stepanakert) បាននិយាយថា ពួកគេគ្មានសង្ឃឹមសម្រាប់អនាគតទេ។
និស្សិតឈ្មោះ អានី អាបាកយ៉ាន (Ani Abaghyan) អាយុ ២១ ឆ្នាំបានប្រាប់ទីភ្នាក់ងារសារព័ត៌មាន Associated Press កាលពីថ្ងៃព្រហស្បតិ៍ថា “ខ្ញុំបានចាកចេញពីទីក្រុងស្តេផាណាកឺត ដោយក្តីសង្ឃឹមបន្តិចបន្តួចថាប្រហែលជាមានអ្វីមួយនឹងផ្លាស់ប្តូរហើយខ្ញុំនឹងត្រឡប់មកវិញឆាប់ៗ ហើយក្តីសង្ឃឹមទាំងនេះត្រូវបានបំផ្លាញបន្ទាប់ពីអានអំពីការរំលាយរដ្ឋាភិបាលរបស់យើង”។
ក្នុងអំឡុងពេលបីទសវត្សរ៍នៃជម្លោះក្នុងតំបន់នេះ អាស៊ែរបៃហ្សង់និងជនផ្តាច់ខ្លួននៅក្នុងតំបន់ណាហ្គ័រណូ-ការ៉ាបាក់ រួមជាមួយនឹងសម្ពន្ធមិត្តក្នុងប្រទេសអាមេនី បានចោទប្រកាន់ភាគីម្ខាងទៀតអំពីការវាយប្រហារដែលផ្តោតគោលដៅ ការសម្លាប់រង្គាល និងអំពើឃោរឃៅផ្សេងទៀត ដែលធ្វើឱ្យប្រជាជនទាំងសងខាងមានការសង្ស័យ និងភ័យខ្លាចយ៉ាងខ្លាំង។
ខណៈអាស៊ែរបៃហ្សង់សន្យាគោរពសិទ្ធិជនជាតិភាគតិចអាមេនីនៅក្នុងតំបន់ ឥឡូវនេះពួកគេភាគច្រើនកំពុងភៀសខ្លួនចេញ ដោយសារតែពួកគេមិនជឿថាអាជ្ញាធរអាស៊ែរបៃហ្សង់នឹងប្រព្រឹត្តចំពោះពួកគេដោយយុត្តិធម៌និងមនុស្សធម៌ ឬធានារក្សាទុកភាសា សាសនា និងវប្បធម៌របស់ពួកគេ៕
ប្រជាជនជាង៨០ភាគរយនៅតំបន់ណាហ្គ័រណូ-ការ៉ាបាក់ចាកចេញទៅអាមេនី
