Views: 10
ដោយ: កាំពី/ក្រចេះ: នគរបាលស្រុកស្នួលបានឃាត់ខ្លួនបុរសម្នាក់ជាប់សង្ស័យពាក់ពន្ធ័ករណីហិង្សាដោយចេតនាដោយយកកូនកាំបិតតចាក់ទៅលើម្ដាយក្មេក និងប្រើប្រាស់អាវុធកែឆ្នៃខុសច្បាប់កាលពីយប់ថ្ងៃទី២៥ ខែឧសភា ឆ្នាំ២០២២ នៅចំណុចដំណាក់ស្តេច ស្ថិតនៅភូមិព្រែកក្តី ឃុំស្នួល ស្រុកស្នួល។
នគរបាលស្រុកស្នួលបានបញ្ជាក់ថា ជនសង្ស័យជាកូនប្រសា ឈ្មោះ រឹម សុផា(ហៅជាងម៉ៅ) អាយុ៣៦ឆ្នាំ រស់នៅភូមិឃុំកើតហេតុខាងលើ បានធ្វើសកម្មភាពយកកាំភ្លើងខ្លីកែឆ្នៃ(បាញ់គ្រាប់វាំងឡុង) គម្រាមបាញ់ទៅលើជនរងគ្រោះជាម្តាយក្មេកឈ្មោះ លឹម រ៉េត អាយុ៥៣ឆ្នាំ រស់នៅភូមិឃុំជាមួយគ្នា។ ឃើញដូចនេះ ជនរងគ្រោះជាម្តាយក្មេកបានយកកូនកាំបិតបម្រុង ចាក់ទៅលើកូនប្រសាមុន តែត្រូវ រឹម សុផា ដណ្តើមកូនកាំបិតបាន ក៏ចាក់ទៅលើម្តាយក្មេកឈ្មោះ លឹម រ៉េត វិញ ត្រូវចំភ្នែកខាងស្តាំរងរបួសចេញឈាម។ ឃើញដូចនេះឈ្មោះ ដា ឌីណា ភេទប្រុស អាយុ២៦ឆ្នាំ(ជាកូនប្រសារឈ្មោះ លឹម រ៉េត) បាន ស្ទុះចូលទៅជួយម្តាយក្មេក ដោយបានយកឈើច្រត់ដែក វាយទៅលើ ឈ្មោះ រឹម សុផា(ត្រូវជាបងថ្លៃ) ត្រូវចំក្បាលខាងក្រោយបណ្តាលឱ្យមានស្នាមដាច់ចេញឈាម។ បន្ទាប់មកឈ្មោះ លឹម រ៉េត ជាម្តាយក្មេក ត្រូវបានក្រុមគ្រួសារ ដឹកយកទៅព្យាបាលរបួសនៅមន្ទីរពេទ្យបង្អែកខេត្ត ។
តាមរបាយការណ៍បញ្ជាក់ទៀតថា មូលហេតុនៃជម្លោះឈាន ដល់អំពើហិង្សាខាងលើ ដោយសារជនសង្ស័យជាកូនប្រសាឈ្មោះ រឹម សុផា(ហៅជាងម៉ៅ) ខឹងនឹងម្តាយក្មេកឈ្មោះ លឹម រ៉េត ចង់បំបែកប្រពន្ឋរបស់ខ្លួន ចេញពីរូបខ្លួនទៅយកប្តីថ្មី។
ក្រោយហេតុការន៍សមត្ថកិច្ចជំនាញសហការជាមួយកម្លាំងប៉ុស្តិ៍រដ្ឋបាលស្នួល បានចុះទៅដល់កន្លែងកើតហេតុធ្វើការពិនិត្យ ស្រាវជ្រាវឃាត់ខ្លួនជនសង្ស័យ ឈ្មោះ រឹម សុផានិង កាំភ្លើងជ័រកែឆ្នៃមួយដើម គ្រាប់ំនួនមួយ និង កូនកាំបិតដងឈើមួយ។
អធិការដ្ឋាននគរបាលស្រុកស្នួលកំពុងចាត់ការសំណុំរឿងនេះតាមនីតិវិធី៕សរន
