Views: 4
ប្រែសម្រួល : កញ្ញាដាលីស (ដេល្លីម៉េល) ៖ ប៉ូលិសបានបាញ់ឧស្ម័នបង្ហូរទឹកភ្នែកដើម្បីបំបែកក្រុមនិស្សិតរាប់ពាន់នាក់ ដែលព្យាយាមសម្រុកចូលផ្ទះរបស់ប្រធានាធិបតីស្រីលង្កាកាលពីថ្ងៃអាទិត្យទី២៩ឧសភា ខណៈរដ្ឋាភិបាលបានផ្តល់ជូនការសម្របសម្រួលដល់ក្រុមបាតុករ ដែលទាមទារឱ្យលោកលាលែងពីតំណែង។
ក្រុមប៉ូលិសប្រឆាំងកុបកម្មបានប្រើកាណុងបាញ់ទឹកអមដោយឧស្ម័នបង្ហូរទឹកភ្នែកខណៈក្រុមបាតុករខឹងសម្បាបានទាញចេញនូវរបាំងដែកពណ៌លឿងឆ្លងកាត់ផ្លូវឆ្ពោះទៅកាន់លំនៅដ្ឋានផ្លូវការរបស់ប្រធានាធិបតី ហ្គោតាបាយ៉ា រ៉ាចាប៉ាក់សា (Gotabaya Rajapaksa) នៅទីក្រុងកូឡុំបូ។
នៅក្បែរនោះ បុរសនិងស្ត្រីរាប់ពាន់នាក់បានធ្វើបាតុកម្មនៅថ្ងៃទី ៥១ជាប់គ្នានៅខាងក្រៅការិយាល័យមាត់សមុទ្ររបស់លោករ៉ាចាប៉ាក់សាដោយទាមទារឱ្យគាត់ចុះចេញពីតំណែងជុំវិញវិបត្តិសេដ្ឋកិច្ចដ៏អាក្រក់បំផុតរបស់ប្រទេសចាប់តាំងពីទទួលបានឯករាជ្យ។
នាយករដ្ឋមន្ត្រី រ៉ានីល វីកក្រេមេស៊ីងហេ (Ranil Wickremesinghe)បាននិយាយនៅលើកញ្ចក់ទូរទស្សន៍ជាតិកាលពីល្ងាចថ្ងៃអាទិត្យលោកផ្តល់ឱ្យអ្នកតវ៉ាវ័យក្មេងនូវការបញ្ចេញមតិកាន់តែច្រើននៅក្នុងរបៀបគ្រប់គ្រងប្រទេស។
ដោយដាក់ចេញផែនការសម្រាប់គណៈកម្មាធិការចំនួន ១៥ ដែលនឹងធ្វើការជាមួយសភាដើម្បីសម្រេចគោលនយោបាយជាតិ លោកវីកក្រេមេស៊ីងហេបាននិយាយថា”យុវជនកំពុងអំពាវនាវឱ្យមានការផ្លាស់ប្តូរនៅក្នុងប្រព័ន្ធដែលមានស្រាប់”។
លោកបាននិយាយថា “ខ្ញុំស្នើឱ្យតែងតាំងតំណាងយុវជនបួនរូបក្នុងចំណោមគណៈកម្មាធិកាទាំង១៥” ដោយបន្ថែមថា ពួកគេអាចត្រូវបានជ្រើសចេញពីបាតុករបច្ចុប្បន្ន។
បាតុកម្មបាននាំឱ្យមានទិដ្ឋភាពតានតឹងក្នុងទីក្រុងកូឡុំបូ ជាកន្លែងដែលអាជ្ញាធរព្យាយាមបំបែកហ្វូងមនុស្សដ៏ច្រើននិងសារធាតុគីមីពីឧស្ម័នបង្ហូរទឹកភ្នែកបានប្រឡាក់ពេញផ្លូវ។
បុរសជាច្រើននាក់ត្រូវគេមើលឃើញយកកំប៉ុងឧស្ម័នបង្ហូរទឹកភ្នែកគប់ទៅលើប៉ូលិសវិញ ដែលបាញ់ពួកវាមក។
និស្សិតពេទ្យនិងវិទ្យាសាស្ត្រស្រីជាច្រើនរូបបានចូលរួមការតវ៉ា ដែលភាគច្រើនបានរត់រកកន្លែងជ្រក នៅពេលដែលអាជ្ញាធរបញ្ចេញកាណុងបាញ់ទឹក៕
បាតុកររាប់ពាន់នាក់បានធ្វើបាតុកម្មនៅថ្ងៃទី ៥១ ជាប់គ្នានៅខាងក្រៅការិយាល័យមាត់សមុទ្ររបស់លោករ៉ាចាប៉ាក់សា