Views: 7
ប្រែសម្រួលៈបំណង(ស្ត្រេតថែមស៍)៖ ពួកមន្ត្រីប៉ូឡូញបាននិយាយកាលពីថ្ងៃសុក្រទី៣០កញ្ញាថា អាជ្ញាធរបានចែកថ្នាំប្រឆាំងជាតិវិទ្យុសកម្មទៅកាន់នាយកដ្ឋានអគ្គិភ័យនៅទូទាំងប្រទេស ដើម្បីត្រៀមករណីរងសារធាតុបំផ្លាញសុខភាពបង្កឡើងដោយសង្គ្រាមនៅក្នុងប្រទេសក្បែរខាងអ៊ុយក្រែន តែបាននិយាយថាវាមិនជាហេតុផលត្រូវប្រកាសអាសន្នទេ។
ចំណាត់ការនេះធ្វើឡើងក្នុងការឆ្លើយតបនឹងការប្រយុទ្ធគ្នានៅម្តុំរោងចក្រអគ្គិសនីដើរដោយថាមពលនុយក្លេអ៊ែរហ្សាប៉ូរីហ្ស៍យ៉ារបស់អ៊ុយក្រែន ដែលបានបង្កការភ័យខ្លាចអំពីការកើតមានមហន្តរាយនុយក្លេអ៊ែរ។
អនុរដ្ឋមន្ត្រីមហាផ្ទៃលោក ប្លាហ្សេ ប៉ូបូហ្ស៊ី(Blazej Pobozy)បានប្រាប់អ្នកយកព័ត៌មានថា «យើងបានសំរេចចាត់វិធានការបង្ការទុកជាមុនដោយចាប់ផ្តើមចែកថ្នាំគ្រាប់ប៉ូតាស្យូម៉ាយអូដាយ(potassium iodide)ទៅកាន់បណ្តានាយកដ្ឋានអគ្គិភ័យ»។
ថ្នាំគ្រាប់នេះនៅពេលបន្ទាប់មកនឹងចែកទៅកាន់ចំណុចចែកចាយ រួមមានសាលារៀន ដោយអ្នកស្រុកអាចទៅយកពីទីនោះ។
តំណាងវេជ្ជសាស្ត្រក្នុងពេលជាមួយគ្នាបានព្រមានកុំអោយលេបថ្នាំនេះផ្តេសផ្តាសក្នុងករណីមិនចាំបាច់។ក្មេង យុវជន ស្ត្រីមានផ្ទៃពោះ និងម្តាយបំបៅកូនប្រឈមកើតមហារីកបន្ទាប់ពីរងជាតិវិទ្យុសកម្ម។ថ្នាំគ្រាប់ប៉ូតាស្យូម៉ាយអូដាយនេះ ជាវិធានការបង្ការក្នុងករណីមានឧបទ្ទវហេតុនុយក្លេអ៊ែរណាមួយ តែវាមិនធានាសំរាប់ការវាយប្រហារដោយសព្វាវុធនុយក្លេអ៊ែរទេ៕
ថ្នាំគ្រាប់ប៉ូតាស្យូម៉ាយអូដាយ អាចជួយការពារបានក្នុងករណីឧបទ្ទវហេតុនុយក្លេអ៊ែរប៉ុណ្ណោះ តែមិនធានាចំពោះគ្រាប់បែកនុយក្លេអ៊ែរទេ
