Views: 14
ប្រែសម្រួល : កញ្ញាដាលីស (ដេល្លីម៉េល) ៖ បវរកញ្ញាមីយ៉ាន់ម៉ា ដែលនិយាយប្រឆាំងរដ្ឋប្រហារយោធានៅក្នុងប្រទេសកំណើតរបស់នាង បានទៅដល់កាណាដាកាលពីថ្ងៃពុធទី២៨កញ្ញាកន្លែងដែលនាងត្រូវបានផ្តល់សិទ្ធិជ្រកកោន បន្ទាប់ពីជាប់គាំងនៅអាកាសយានដ្ឋានក្នុងប្រទេសថៃអស់រយៈពេលជិតមួយសប្តាហ៍។
លោក ធីន មួង ធូ (Tin Maung Htoo) មកពីបណ្តាញសកម្មភាពកាណាដាភូមា បានប្រាប់ទីភ្នាក់ងារសារព័ត៌មាន AFPថា នាង ថរ ណាន់ដា អ៊ុង (Thaw Nanda Aung) ហៅ ហាន់ ឡេ (Han Lay) “បានមកដល់ទីក្រុងតូរ៉ុនតូដោយសុវត្ថិភាព”។
លោកបាននិយាយថា “ឥឡូវនេះនាងកំពុងរង់ចាំការហោះហើរ (តភ្ជាប់) ទៅកាន់ទីក្រុងឆាឡូតថោន (Charlottetown)” នៅភាគខាងកើតកាណាដាកន្លែងដែលនាងគ្រោងនឹងតាំងទីលំនៅនិងបន្តសកម្មភាពរបស់នាងប្រឆាំងនឹងរដ្ឋប្រហារដែលបានទម្លាក់រដ្ឋាភិបាលស៊ីវិលរបស់មីយ៉ាន់ម៉ា ដែលដឹកនាំដោយលោកស្រី អ៊ុងសាន ស៊ូជី។
លោក ធីន មួង ធូ ក៏បានបញ្ជាក់ដែរថា ការទាមទារសិទ្ធិជ្រកកោននយោបាយរបស់នាងក្នុងប្រទេសកាណាដាត្រូវបានទទួលយក។
បវរកញ្ញារូបនេះត្រូវបានឃាត់ខ្លួននៅអាកាសយានដ្ឋានអន្តរជាតិសំខាន់មួយក្នុងទីក្រុងបាងកកតាំងពីថ្ងៃព្រហស្បតិ៍សប្តាហ៍មុន បន្ទាប់ពីបានមកដល់តាមជើងហោះហើរពីវៀតណាមជុំវិញអ្វីដែលមន្ត្រីអន្តោប្រវេសន៍ថៃនិយាយថាជាបញ្ហាលិខិតឆ្លងដែនរបស់នាង។ នាងបានមករស់នៅក្នុងប្រទេសថៃចាប់តាំងពីបានភៀសខ្លួនពីមីយ៉ាន់ម៉ាកាលពីឆ្នាំមុន។
នៅក្នុងសារបង្ហោះនៅលើទំព័រហ្វេសប៊ុករបស់នាង នាងហាន់ឡេបាននិយាយថា នាងខ្លាចប៉ូលិសមីយ៉ាន់ម៉ានឹងមកយកនាងនៅអាកាសយានដ្ឋានហើយបានទាក់ទងទៅទីភ្នាក់ងារជនភៀសខ្លួនរបស់អង្គការសហប្រជាជាតិ។
លោក ហ្វីល រ៉ូបឺតសុន (Phil Robertson) នៃអង្គការឃ្លាំមើលសិទ្ធិមនុស្ស បានចោទប្រកាន់អ្នកគ្រប់គ្រងនៅមីយ៉ាន់ម៉ាថាបានប្រើប្រាស់លិខិតឆ្លងដែន “ជាអាវុធប្រឆាំងនឹងប្រជាជនរបស់ពួកគេ” និងបានដាក់ “អន្ទាក់ដើម្បីព្យាយាមបង្ខំនាងហាន់ឡេឱ្យត្រឡប់ទៅមីយ៉ាន់ម៉ាវិញ កន្លែងដែលនាងនឹងត្រូវប្រឈមមុខនឹងការចាប់ខ្លួនភ្លាមៗ»៕
លោកបានហៅវាថាជា “សកម្មភាពនយោបាយដោយចេតនាដោយរបបយោធាដើម្បីធ្វើឱ្យនាងគ្មានរដ្ឋ”៕
នាងហាន់ឡេមកដល់កាណាដាដោយសុវត្ថិភាព
នាងទូរស័ព្ទប្រាប់មិត្តភ័ក្តិនិងសហការីថា «ខ្ញុំមានសុវត្ថិភាពហើយ»
