Views: 1
ប្រែសម្រួល : កញ្ញាដាលីស (ដេល្លីម៉េល) ៖ ប្រមុខនុយក្លេអ៊ែររបស់អង្គការសហប្រជាជាតិបានព្រមានកាលពីថ្ងៃព្រហស្បតិ៍ទី១១សីហាថា សកម្មភាពយោធា “ដ៏គួរឱ្យព្រួយបារម្ភ”នៅឯរោងចក្រនុយក្លេអ៊ែរធំបំផុតរបស់អឺរ៉ុបនៅភាគអាគ្នេយ៍អ៊ុយក្រែនអាចនាំឱ្យមានផលវិបាកដ៏គ្រោះថ្នាក់សម្រាប់តំបន់ ហើយអំពាវនាវឱ្យបញ្ចប់ការវាយប្រហារនៅរោងចក្រក្នុងទីក្រុងហ្សាផូរីហ្សហ្សា (Zaporizhzhia)ដែលគ្រប់គ្រងដោយរុស្ស៊ី។
លោក រ៉ាហ្វាអែល ហ្គ្រោសស៊ី (Rafael Grossi) បានជំរុញឱ្យរុស្ស៊ីនិងអ៊ុយក្រែន ដែលស្តីបន្ទោសគ្នាទៅវិញទៅមកចំពោះការវាយប្រហារនៅរោងចក្រនេះអនុញ្ញាតភ្លាមៗឱ្យអ្នកជំនាញនុយក្លេអ៊ែរចូលវាយតម្លៃការខូចខាតនិងសុវត្ថិភាពនិងសន្តិសុខនៅឯបរិវេណនុយក្លេអ៊ែរដ៏ធំធេងនេះ ជាទីដែលស្ថានភាព “កំពុងធ្លាក់ចុះយ៉ាប់យ៉ឺនយ៉ាងឆាប់រហ័ស”។
លោកបានចង្អុលទៅការបាញ់ផ្លោងនិងការផ្ទុះជាច្រើននៅទីក្រុងហ្សាផូរីហ្សហ្សាកាលពីថ្ងៃសុក្រសប្តាហ៍មុន ដែលបង្ខំឱ្យបិទម៉ាស៊ីនបំលែងថាមពលអគ្គិសនី និងម៉ាស៊ីនបំលែងបម្រុងចំនួនពីរជាហេតុបង្ខំឱ្យបិទម៉ាស៊ីនរ៉េអាក់ទ័រនុយក្លេអ៊ែរមួយ។
កាលពីសប្តាហ៍មុន លោកហ្គ្រោសស៊ីបាននិយាយនៅក្នុងបទសម្ភាសន៍របស់ទីភ្នាក់ងារសារព័ត៌មាន Associated Pressថា ស្ថានភាពនៅទីក្រុងហ្សាផូរីហ្សហ្សា គឺ “មិនអាចគ្រប់គ្រងបានទាំងស្រុង”។
កាលពីថ្ងៃព្រហស្បតិ៍ លោកបានទាមទារឱ្យបញ្ឈប់សកម្មភាពយោធា “ដែលមានសូម្បីតែលទ្ធភាពតូចបំផុតក្នុងការបង្កឱ្យប៉ះពាល់ដល់សុវត្ថិភាពនុយក្លេអ៊ែរ” នៅក្នុងរោងចក្រដ៏សំខាន់បែបនេះ។លោកបាននិយាយថា ខណៈការវាយតម្លៃបឋមដោយអ្នកជំនាញបានរកឃើញថា “មិនមានការគំរាមកំហែងភ្លាមៗចំពោះសុវត្ថិភាពនុយក្លេអ៊ែរ” នៅរោងចក្រពីការបាញ់ផ្លោងនិងសកម្មភាពយោធា”វាអាចប្រែប្រួលគ្រប់ពេលវេលា”។
ការអំពាវនាវរបស់លោកហ្គ្រោសស៊ីគឺបន្ទរតាមការអំពាវនាវរបស់អគ្គលេខាធិការអ.ស.បលោក អង់តូនីញ៉ូ គូថេរ៉េសកាលពីព្រឹកថ្ងៃព្រហស្បតិ៍ដើម្បីឱ្យបញ្ចប់សកម្មភាពយោធាទាំងអស់នៅជុំវិញរោងចក្រហ្សាផូរីហ្សហ្សា ដោយព្រមានថា ការខូចខាតណាមួយអាចនាំឱ្យមាន “ផលវិបាកដ៏មហន្តរាយ” នៅក្នុងបរិវេណ តំបន់ និងហួសពីតំបន់៕
ទាហានរុស្ស៊ីឈរយាមក្នុងរោនុយក្លេអ៊ែរក្នុងទីក្រុងហ្សាផូរីហ្សហ្សា