Views: 7
ប្រែសម្រួល : កញ្ញាដាលីស (ស្ត្រេតថែមស៍) ៖ រដ្ឋមន្ត្រីស្តីទីនៃក្រសួងពាណិជ្ជកម្មនិងឧស្សាហកម្មអាហ្វហ្គានីស្ថាន លោក ហាជី នូរូដឌីន អាហ្ស៊ីហ្ស៊ី (Haji Nooruddin Azizi)បានប្រាប់ទីភ្នាក់ងារសារព័ត៌មានរ៉យទ័រថា អាហ្វហ្គានីស្ថានបានចុះហត្ថលេខាលើកិច្ចព្រមព្រៀងបណ្តោះអាសន្នជាមួយរុស្ស៊ីដើម្បីផ្គត់ផ្គង់ប្រេងសាំង ប្រេងម៉ាស៊ូត ឧស្ម័ន និងស្រូវសាលីដល់អាហ្វហ្គានីស្ថាន។
លោកអាហ្ស៊ីហ្ស៊ីបាននិយាយថា ក្រសួងរបស់លោកកំពុងធ្វើការដើម្បីធ្វើពិពិធកម្មដៃគូពាណិជ្ជកម្មរបស់ខ្លួនហើយថារុស្ស៊ីបានផ្តល់ជូនរដ្ឋបាលតាលីបង់នូវការបញ្ចុះតម្លៃដល់តម្លៃទំនិញប្រើប្រាស់ទូទៅទាំងនេះ។
ចំណាត់ការនេះ ដែលជាកិច្ចព្រមព្រៀងសេដ្ឋកិច្ចអន្តរជាតិដ៏សំខាន់ដំបូងគេដែលធ្វើឡើងដោយពួកតាលីបង់ចាប់តាំងពីពួកគេវិលចូលកាន់អំណាចវិញកាលពីជាងមួយឆ្នាំមុនអាចជួយបន្ធូរបន្ថយភាពឯកោរបស់ចលនាអ៊ីស្លាមនេះ ដែលត្រូវបានកាត់ផ្តាច់ចេញពីប្រព័ន្ធធនាគារពិភពលោកជាធរមាន។
គ្មានប្រទេសណាមួយទទួលស្គាល់ជាផ្លូវការនូវក្រុមនេះទេ ដែលបានប្រយុទ្ធក្នុងការបះបោររយៈពេល ២០ ឆ្នាំប្រឆាំងនឹងកងកម្លាំងលោកខាងលិច និងសម្ពន្ធមិត្តអាហ្វហ្គានីស្ថានក្នុងស្រុករបស់ពួកគេ មុនពេលវាយលុកចូលទីក្រុងកាប៊ុល នៅពេលដែលទាហានអាម៉េរិកបានដកចេញក្នុងឆ្នាំ ២០២១។
អ្នកការទូតលោកខាងលិចបាននិយាយថា ពួកតាលីបង់ចាំបាច់ត្រូវផ្លាស់ប្តូរទិសដៅរបស់ខ្លួនលើសិទ្ធិមនុស្ស ជាពិសេសស្ត្រីនិងបង្ហាញថាខ្លួនបានកាត់ផ្តាច់ទំនាក់ទំនងជាមួយក្រុមសកម្មប្រយុទ្ធអន្តរជាតិទាំងអស់ ដើម្បីទទួលបានការទទួលស្គាល់ជាផ្លូវការ។
រុស្ស៊ីមិនទទួលស្គាល់រដ្ឋាភិបាលរបស់តាលីបង់ជាផ្លូវការទេ ប៉ុន្តែរដ្ឋាភិបាលក្រុងមូស្គូបានទទួលស្វាគមន៍ចលនាតាលីបង់នៅមុនពេលការដួលរលំទីក្រុងកាប៊ុលហើយស្ថានទូតរបស់ខ្លួនគឺជាផ្នែកមួយនៃស្ថានទូតមួយចំនួនតូចប៉ុណ្ណោះដែលនៅតែបើកនៅក្នុងរដ្ឋធានីអាហ្វហ្គានីស្ថាន។
លោកអាហ្ស៊ីហ្ស៊ីបាននិយាយថា កិច្ចព្រមព្រៀងនេះនឹងពាក់ព័ន្ធនឹងរុស្ស៊ីផ្គត់ផ្គង់ប្រេងសាំងប្រហែលមួយលានតោន ប្រេងម៉ាស៊ូតមួយលានតោន ឧស្ម័នរាវ (LPG) ៥០០.០០០ តោននិងស្រូវសាលីពីរលានតោនជារៀងរាល់ឆ្នាំ៕
ធុងសម្រាប់ផ្ទុកសាំងកំពុងដាក់លក់លើដងផ្លូវក្នុងទីក្រុងកាប៊ុល