Views: 1
ដោយៈ ទេពកង្រី / កំពង់ឆ្នាំងៈ កូនឈើផ្កា ប្រភេដើមក្ងោក ផ្កាពណ៌លឿង និង ពណ៌ក្រហម ជាង ២.០០០ ដើម ជាអំណោយរបស់លោក សាយ សំអាល់ រដ្ឋមន្ត្រីក្រសួងបរិស្ថាន ផ្តល់តាមរយៈលោក ស៊ុន សុវណ្ណារិទ្ធិ អភិបាលខេត្តកំពង់ឆ្នាំង ត្រូវបានរដ្ឋបាលក្រុងកំពង់ឆ្នាំង និងមន្ទីរបរិស្ថាន យកមកដាំតាមសួនច្បារ និងផ្លូវនានា ក្នុងក្រុងកំពង់ឆ្នាំង ។
ពិធីដាំកូនឈើប្រភេទផ្ការនេះ បានធ្វើឡើងកាលពីព្រឹកថ្ងៃទី១១ ខែសីហា ឆ្នាំ២០២២ ដោយមានការអញ្ជើញចូលរួមពីសំណាក់ លោក ម៉ន ផល្លា ប្រធានមន្ទីរបរិស្ថាន ខេត្តកំពង់ឆ្នាំង និងលោក យិន សាវ៉េន អភិបាលក្រុងកំពង់ឆ្នាំង និង លោកគ្រូអ្នកគ្រួ សិស្សានុសិស្ស អាជ្ញាធរសង្កាត់ទាំង៤ របស់ក្រុងកំពង់ឆ្នាំង ។
លោក យិន សាវ៉េន បានឱ្យដឹងថាៈ គឺដើម្បីសោភ័ណភាព នៃគម្របពណ៌បៃតង ព្រោះដើមក្ងោកនេះ វានឹងធ្វើឱ្យតំបន់នេះ មានសោភ័ណភាព ពណ៌បៃតងស្រស់បំព្រង ក្នុងរដូវវស្សា និងភាគច្រើននៅរដូវប្រាំង តែងចេញផ្កា ផ្តល់សោភ័ណភាព ក្នុងការទាក់ទាញ ភ្ញៀវជាតិ និងអន្តរជាតិ មកកម្សាន្តក្នុងខេត្ត កាន់តែច្រើន និងបានចូលរួមចំណែកលើកស្ទួយ ជីវភាពប្រជាពលរដ្ឋយើង តាមការលក់ដូរ ជូនដល់ភ្ញៀវទេសចរផងដែរ។ អាជ្ញាធរក្រុង បានរៀបចំដាំដើមក្ងោក នៅតាមចិញ្ចើមផ្លូវនានា និង សួនច្បារក្នុងក្រុងកំពង់ឆ្នាំង ។
លោកអភិបាលក្រុងកំពង់ឆ្នាំង បានធ្វើការអំពាវនាវ ដល់ប្រជាពលរដ្ឋទាំងអស់ នៅក្នុងក្រុងកំពង់ឆ្នាំង ចូលរួមជួយថែទាំកូនឈើ ដែលបានដាំហើយ នាពេលនេះ ឱ្យបានល្អប្រសើរផង ។
សិស្សានុសិស្ស ដែលបានចូលរួមដាំដើមឈើនោះ បានសំដែងនូវការចាប់អារម្មយ៉ាងខ្លាំង ចំពោះការដាំដើមក្ងោក នាពេលនេះ ព្រោះបានផ្តល់ផលប្រយោជន៍ជាច្រើន សម្រាប់ប្រជាពលរដ្ឋយើងទាំងអស់ ដែលនឹងបានឃើញផ្កាក្ងោក និងផ្កាពាសពេញដងផ្លូវ នៅក្រុងកំពង់ឆ្នាំង ។
សូមបញ្ជាក់ថា នេះមិនមែនជាលើកទីមួយនោះទេ ដែលអាជ្ញាធរក្រុងកំពង់ឆ្នាំង បានដាំដើមឈើអមតាមផ្លូវនានា ក្នុងក្រុងកំពង់ឆ្នាំង និងតាមសួនច្បារ ។ កន្លងមក អាជ្ញាធរក្រុង ក៏ធ្លាប់បានដាំដើមឈើផងដែរ ដូចជាដើមត្របែកព្រៃ ដើមធ្នង់ និង ដើមឈើផ្សេងៗទៀត ដែលធ្វើឱ្យក្រុងកំពង់ឆ្នាំង មានសោភ័ណភាព និង បរិស្ថានស្រស់បំព្រង នាគ្រប់រដូវកាល ។
ចំពោះដើមក្ងោកដែលបានដាំនាពេលនេះ នឹងកែប្រែមុខមាត់ក្រុងកំពង់ឆ្នាំង កាន់តែមានសភាពស្រស់ស្អាតបន្ថែមទៀត នៅពេលដែលផ្កាក្ងោកចាប់ផ្ដើមផ្កា ៕/V