Views: 1
ប្រែសម្រួល : កញ្ញាដាលីស (ដេល្លីម៉េល) ៖ មន្ត្រីរបស់ទីក្រុងវ៉ាស៊ីនតោនបាននិយាយកាលពីថ្ងៃអង្គារ ទី១៦ សីហាថា ការផ្គត់ផ្គង់ទឹកដល់រដ្ឋមួយចំនួនរបស់សហរដ្ឋអាម៉េរិកនិងម៉ិកស៊ិកនឹងត្រូវកាត់បន្ថយ ដើម្បីជៀសវាង “ការដួលរលំដ៏មហន្តរាយ” នៃទន្លេខូឡូរ៉ាដូ ខណៈគ្រោះរាំងស្ងួតជាប្រវត្តិសាស្ត្រកាន់តែមានសភាពធ្ងន់ធ្ងរ។
ទឹកភ្លៀងទាបជាងមធ្យមភាគជាងពីរទសវត្សរ៍មកនេះបានបណ្តាលឱ្យទន្លេដែលជាសរសៃឈាមនៅភាគខាងលិចសហរដ្ឋអាម៉េរិក ស្ថិតក្នុងកម្រិតទាបធ្ងន់ធ្ងរ ដោយសារបម្រែបម្រួលអាកាសធាតុ ដែលបង្កដោយមនុស្ស បានធ្វើឱ្យវដ្តនៃភាពរាំងស្ងួតកាន់តែអាក្រក់ទៅ។
ទោះបីជាមានការព្រមានជាច្រើនឆ្នាំនិងកាលបរិច្ឆេទផុតកំណត់ ដែលដាក់ចេញដោយទីក្រុងវ៉ាស៊ីនតោនក៏ដោយក៏រដ្ឋនានាដែលពឹងផ្អែកលើទន្លេនេះមិនបានយល់ព្រមលើផែនការកាត់បន្ថយការប្រើប្រាស់ទឹកនោះទេ ហើយកាលពីថ្ងៃអង្គារទី១៦សីហា រដ្ឋាភិបាលសហព័ន្ធបាននិយាយថា ខ្លួនកំពុងឈានជើងចូលធ្វើអន្តរាគមន៍។
លោកស្រី តានយ៉ា ទ្រូជីលឡូ (Tanya Trujillo) អនុរដ្ឋមន្ត្រីទទួលបន្ទុកផ្នែកទឹកនិងវិទ្យាសាស្ត្រនៅក្រសួងមហាផ្ទៃអាម៉េរិក បាននិយាយថា”ដើម្បីជៀសវាងការដួលរលំដ៏មហន្តរាយនៃប្រព័ន្ធទន្លេខូឡូរ៉ាដូនិងភាពមិនប្រាកដប្រជានិងជម្លោះនាពេលអនាគត ការប្រើប្រាស់ទឹកនៅក្នុងអាងទន្លេនេះត្រូវតែកាត់បន្ថយ”។
ការបែងចែកទឹកសម្រាប់រដ្ឋអារីហ្សូណាពីទន្លេនេះនឹងថយចុះ ២១ ភាគរយនៅឆ្នាំ ២០២៣ ខណៈរដ្ឋណេវ៉ាដានឹងទទួលបានទឹកតិចជាងមុនប្រាំបីភាគរយ។ការបែងចែកទឹកសម្រាប់ម៉ិកស៊ិកនឹងថយចុះប្រាំពីរភាគរយ។
រដ្ឋកាលីហ្វ័រញ៉ា ដែលជាអ្នកប្រើប្រាស់ទឹកទន្លេច្រើនជាងគេនិងមានប្រជាជនច្រើនជាងគេនៅរដ្ឋភាគខាងលិច នឹងមិនរងផលប៉ះពាល់នៅឆ្នាំក្រោយនោះទេ៕
ទន្លេខូឡូរ៉ាដូស្រកចុះទាបយ៉ាងធ្ងន់ធ្ងរក្នុងអំឡុងពីរទសវត្សរ៍ចុងក្រោយ
