Views: 1
ប្រែសម្រួល : កញ្ញាដាលីស (ស្ត្រេតថែមស៍) ៖ សហរដ្ឋអាម៉េរិកកាលពីថ្ងៃព្រហស្បតិ៍បានប្រកាសកញ្ចប់ជំនួយសន្តិសុខថ្មីចំនួន ៦០០ លានដុល្លារអាម៉េរិកសម្រាប់អ៊ុយក្រែន ដែលរួមមានគ្រាប់រំសេវនិងឧបករណ៍បោសសម្អាតមីន ព្រមទាំងគ្រាប់កាំភ្លើងធំផងដែរ។
ជំនួយនេះនឹងមិនទៅដល់សមរភូមិភ្លាមៗនោះទេ ព្រោះវាស្ថិតនៅក្រោមគំនិតផ្តួចផ្តើមជំនួយសន្តិសុខអ៊ុយក្រែន (USAI) ដែលនៅក្រោមនោះរដ្ឋាភិបាលក្រុងវ៉ាស៊ីនតោនត្រូវទិញឧបករណ៍យោធាពីឧស្សាហកម្មការពារជាតិឬដៃគូនានាជាជាងដកចេញពីឃ្លាំងអាវុធអាម៉េរិក។
មន្ទីរបញ្ចកោណបានឱ្យដឹងនៅក្នុងសេចក្តីថ្លែងការណ៍មួយថា កញ្ចប់ជំនួយនេះនឹង “គាំទ្រដល់តម្រូវការសមរភូមិរបស់អ៊ុយក្រែន” និងបង្ហាញពី “ការគាំទ្រឥតប្រែប្រួលរបស់សហរដ្ឋអាម៉េរិកសម្រាប់អ៊ុយក្រែន”។
ការប្រកាសចុងក្រោយនេះកើតឡើងមួយថ្ងៃបន្ទាប់ពីរដ្ឋាភិបាលក្រុងវ៉ាស៊ីនតោនបានសន្យាផ្តល់ជំនួយផ្នែកយោធានិងមនុស្សធម៌ជាង ១ ពាន់លានដុល្លារសម្រាប់រដ្ឋាភិបាលក្រុងគៀវ រួមទាំងគ្រាប់ផ្លោងផ្ទុកសារធាតុអ៊ុយរ៉ានីញ៉ូមរលាយ ១២០ មិល្លីម៉ែត្រសម្រាប់រថក្រោះ M1 Abrams ដែលរំពឹងប្រគល់ជូននៅមុនដំណាច់ឆ្នាំនេះ។
គ្រាប់អ៊ុយរ៉ានីញ៉ូមរលាយនេះគឺមានភាពចម្រូងចម្រាសណាស់ ដោយសារតែការផ្សារភ្ជាប់វាជាមួយនឹងបញ្ហាសុខភាពជាច្រើន ដូចជាជំងឺមហារីក និងពិការភាពពីកំណើតនៅក្នុងតំបន់ដែលពួកវាត្រូវបានប្រើប្រាស់ក្នុងជម្លោះកន្លងមក បើទោះបីជាវាមិនត្រូវបានបញ្ជាក់ច្បាស់លាស់ថាបានបង្កបញ្ហាបែបនេះក៏ដោយ។
ដង់ស៊ីតេនៃសារធាតុអ៊ុយរ៉ានីញ៉ូមរលាយ ដែលជាលទ្ធផលពាក់កណ្តាលសម្រេចនៃដំណើរការចម្រាញ់នុយក្លេអ៊ែរ គឺជួយឱ្យគ្រាប់ដែលផ្ទុកវាបុកទម្លុះឧបករណ៍ពាសដែកធុនធ្ងន់បាន ដោយធ្វើឱ្យវាល្អសម្រាប់ប្រើក្នុងគ្រាប់ផ្លោង ដែលរចនាឡើងដើម្បីតម្រង់គោលដៅកម្ទេចរថក្រោះ៕
កញ្ចប់ជំនួយសន្តិសុខថ្មីចំនួន ៦០០ លានដុល្លារអាម៉េរិកសម្រាប់អ៊ុយក្រែនរួមមានគ្រាប់រំសេវនិងឧបករណ៍បោសសម្អាតមីន ព្រមទាំងគ្រាប់កាំភ្លើងធំផងដែរ។ក្នុងរូបទាហានអ៊ុយក្រែនបាញ់កាំភ្លើងធំដាក់ទីតាំងកងកម្លាំងរុស្ស៊ី
