Views: 3
ប្រែសម្រួលៈបំណង(ស្ត្រេតថែមស៍)៖ សហរដ្ឋអាម៉េរិកបានបដិសេធការសុំទិញយន្តហោះបំបាំងកាយទំនើបធុនF-35ពីថៃដោយសារតែមានបញ្ហាបង្ហាត់និងតំរូវការបច្ចេកទេស នេះបើតាមការបញ្ជាក់ពីកងទ័ពអាកាសថៃកាលពីថ្ងៃព្រហស្បតិ៍។
ថៃ នៅឆ្នាំ២០២២បានលៃថវិកាចំនួន១៣,៨ពាន់លានបាត(៤០០លានដុល្លារ)សំរាប់ទិញយន្តហោះប្រយុទ្ធថ្មីជំនួសយន្តហោះចាស់ៗ ដែលភាគច្រើនជាយន្តហោះF-15 និង F-16ផលិតនៅអាម៉េរិក។
តាមរយៈថវិកានេះថៃប្រុងទិញF-35A ចំនួនប្រាំបីគ្រឿង។តែការលក់យន្តហោះជំនាន់ទីប្រាំនេះស្ថិតក្រោមលក្ខខណ្ឌមួយចំនួន រួមមានបញ្ហាពេលវេលា បច្ចេកទេសនិងការថែទាំជួសជុល។
អ្នកនាំពាក្យកងទ័ពអាកាសលោក ប្រាផាស សនឆៃឌី( Prapas Sornchaidee)បាននិយាយនៅក្នុងសេចក្តីថ្លែងការណ៍មួយថា« អាម៉េរិកមិនអាចលក់អោយយើងទេ»។
យន្តហោះ F-35ជាយន្តហោះប្រយុទ្ធទំនើបបំផុតមួយនៅក្នុងលោក និងត្រូវគេគិតថាជាការលក់ចេញក្រោមការគិតគូរខ្លាំងបំផុត គឺសំរាប់តែសម្ពន្ធមិត្តជិតដិតបំផុតរបស់អាម៉េរិកតែប៉ុណ្ណោះនៅតំបន់ឥណ្ឌូប៉ាស៊ីហ្វិក រួមមានអូស្ត្រាលី ជប៉ុន កូរ៉េខាងត្បូងនិងសិង្ហបុរី។
ថៃបច្ចុប្បន្នមានយន្តហោះប្រយុទ្ធទំនើបJAS-39 Gripenចំនួន១២គ្រឿងទិញមកពីក្រុមហ៊ុនស៊ុយអែតSaabបន្ថែមលើយន្តហោះចាស់ៗផលិតនៅអាម៉េរិក។
យោធាថៃបានប្រើបច្ចេកវិទ្យាអាម៉េរិកតាំងពីសម័យសង្គ្រាមវៀតណាម នៅពេលខ្លួនទទួលអោយកងទ័ពអាកាសអាម៉េរិកប្រើប្រាស់មូលដ្ឋានរបស់ខ្លួន។ថៃក៏ទទួលធ្វើជាម្ចាស់ផ្ទះសមយុទ្ធពស់វែកមាសជាមួយអាម៉េរិកអស់ពេលរាប់សិបឆ្នាំមកហើយដែរ តែទំនាក់ទំនងរវាងប្រទេសទាំងពីរហាក់មិនសូវល្អនឹងគ្នាដោយសារតែយោធាថៃធ្វើរដ្ឋប្រហារបន្តបន្ទាប់និងការព្រួយបារម្ភថា រដ្ឋាភិបាលគាំទ្រដោយយោធានៅថៃបានងាកទៅរកគូប្រជែងចិន។
ទោះជាមិនលក់យន្តហោះF-35អោយតែភាគីអាម៉េរិកបានសន្យាកែកុនធ្វើអោយប្រសើរឡើងយន្តហោះF-15 និង F-16របស់ថៃ៕
ថៃមានបំណងទិញ F-35Aចំនួនប្រាំបីគ្រឿង តែអាម៉េរិកបដិសេធ