Views: 8
ប្រែសម្រួល : កញ្ញាដាលីស (ស្ត្រេតថែមស៍) ៖ សហរដ្ឋអាម៉េរិកកាលពីថ្ងៃសុក្រទី៣០កញ្ញាបានដាក់ទណ្ឌកម្មយ៉ាងទូលំទូលាយលើរុស្ស៊ី ជុំវិញការប្រកាសកាត់យកផ្នែកខ្លះនៃអ៊ុយក្រែនដោយផ្តោតលើមនុស្សនិងក្រុមហ៊ុនរាប់រយ រួមទាំងអ្នកនៅក្នុងវិស័យឧស្សាហកម្មយោធា និងសមាជិកសភារបស់រុស្ស៊ី។
រដ្ឋាភិបាលក្រុងវ៉ាស៊ីនតោនបានធ្វើសកម្មភាព បន្ទាប់ពីប្រធានាធិបតីរុស្ស៊ីលោក វ្ល៉ាឌីមៀ ពូទីន កាលពីថ្ងៃសុក្របានប្រកាសការកាត់យកទឹកដីធំបំផុតនៅក្នុងទ្វីបអឺរ៉ុបចាប់តាំងពីសង្គ្រាមលោកលើកទី២ ដោយប្រកាសការគ្រប់គ្រងរបស់រុស្ស៊ីលើទឹកដីអ៊ុយក្រែន ១៥ ភាគរយ ដែលកាន់កាប់ដោយកងកម្លាំងរុស្ស៊ី។
លោកប្រធានាធិបតីចូ បៃដិនបាននិយាយនៅក្នុងសេចក្តីថ្លែងការណ៍មួយ “យើងនឹងប្រមូលផ្តុំសហគមន៍អន្តរជាតិឱ្យថ្កោលទោសទង្វើទាំងនេះនិងចាប់រុស្ស៊ីឱ្យទទួលខុសត្រូវ។យើងនឹងបន្តផ្តល់ឱ្យអ៊ុយក្រែននូវឧបករណ៍ដែលខ្លួនត្រូវការដើម្បីការពារខ្លួន ដោយមិនខ្វល់នឹងកិច្ចខិតខំប្រឹងប្រែងដ៏ក្លាហានរបស់រុស្ស៊ីក្នុងការគូសវាសខ្សែបន្ទាត់ព្រំដែនរបស់ប្រទេសជិតខាង”។
ការដាក់ទណ្ឌកម្មចុងក្រោយបំផុតនេះធ្វើឡើងបន្ទាប់ពីមានវិធានការណ៍ដ៏ធំទូលាយដែលបានដាក់រួចហើយដោយសហរដ្ឋអាម៉េរិកនិងសម្ពន្ធមិត្តនៅឆ្នាំនេះដែលបានធ្វើឱ្យខូចពាណិជ្ជកម្មអន្តរជាតិនិងសេដ្ឋកិច្ចក្នុងស្រុករបស់រុស្ស៊ី។ ប៉ុន្តែទណ្ឌកម្មមិនបានសំពងធ្ងន់ធ្ងរលើឧស្សាហកម្មថាមពលរបស់រុស្ស៊ី ដែលជាប្រភពរូបិយវត្ថុរឹងធំបំផុតរបស់ប្រទេសនោះទេ។
នៅក្នុងសុន្ទរកថាមួយកាលពីថ្ងៃសុក្រ លោកពូទីនបានរិះគន់លោកខាងលិចថាជាអាណានិគមនិយមនិងជាពួកសាតាំង (បិសាច)។ អ៊ុយក្រែនបាននិយាយថា ខ្លួននឹងប្រញាប់ដាក់ពាក្យសុំចូលរួមជាមួយណាតូ ដែលជាសម្ពន្ធយោធាលោកខាងលិចដឹកនាំដោយអាម៉េរិក៕
ពូទីនអបអរការកាត់យកទឹកដីអ៊ុយក្រែន ១៥ ភាគរយកាលពីថ្ងៃសុក្រ
