Views: 3
ដោយ:សុខសុភ័ណ្ឌ/កំពង់ស្ពឺ: នៅព្រឹកថ្ងៃចន្ទទី៥ ខែធ្នូ ឆ្នាំ២០២២នេះ លោក វ៉ី សំណាង អភិបាលខេត្តកំពង់ស្ពឺ បានអញ្ជើញជាអធិបតីភាពកាត់វិញ្ញាសាប្រឡងសញ្ញាបត្រមធ្យមសិក្សាទុតិយភូមិ សម្រាប់ឆ្នាំសិក្សា២០២១-២០២២ សម័យប្រឡងថ្ងៃទី០៥-០៦ ខែធ្នូ នៅមណ្ឌលវិឡាល័យកំពង់ស្ពឺ។
លោក ថន ថារិន ប្រធានមន្ទីរអប់រំយុវជននិងកីឡាខេត្តកំពង់ស្ពឺបានប្រាប់ឱ្យដឹងថា បេក្ខជនប្រឡងសញ្ញាបត្រមធ្យមសិក្សាទុតិយភូមិឆ្នាំ២០២២នេះមានចំនួន៤.៦៩៥នាក់ ស្រី២.៥១៨នាក់ ដែលនឹងប្រឡងនៅថ្ងៃទី០៥-០៦ ខែធ្នូ ព្រឹកនេះតែម្តង។ ចំពោះមណ្ឌលប្រឡងចំនួន១១មណ្ឌលនិងមានបន្ទប់ប្រឡង១៨៨បន្ទប់។
លោក ថន ថារិន បានបន្ថែមថា បេក្ខជនប្រឡងទាំងអស់ត្រូវតែគោរពតាមគោលការណ៍ប្រឡង ព្រោះឆ្នាំនេះមានវិន័យតឹងរឹងដើម្បីធានាដល់ការប្រឡងឱ្យមានស្តង់ដារ គុណភាពខ្ពស់ ដូច្នេះបេក្ខជន បេក្ខនារី ប្រឡងត្រូវគោរពពេលវេលា វិន័យ ហាមយកសំណៅឯកសារចម្លើយនានា ក៏ដូចឧបករណ៍ អេឡិចត្រូនិច ពោលគឺត្រូវគោរពតាមបទបញ្ជា បទបញ្ញត្តិដែលក្រសួងបានដាក់ចេញ។ការរឹតបន្តឹងនេះធានាថា អ្នកចេះ គឺជាប់។ហើយបើក្នុងករណីរកឃើញថាបេក្ខជននិងបេក្ខនារីបានប្រព្រឹត្តសកម្មភាពផ្ទុយនិងបទបញ្ញត្តិនិងកម្រិតវិន័យបេក្ខជននិងបេក្ខនារីនោះត្រូវបានកំណត់ឱ្យធ្លាក់ជាស្វ័យប្រវត្តិ។ក្នុងពេលប្រឡងបេក្ខជនទាំងអស់ត្រូវអនុវត្តឱ្យបានខ្ជាប់ខ្ជួននូវវិធានការសុខភាពនិងសុវត្ថិភាព សម្រាប់ការប្រឡង ត្រូវរក្សាគម្លាតសុវត្ថិភាព និងពាក់ម៉ាសឱ្យបានត្រឹមត្រូវ ជាប្រចាំនៅក្នុងមណ្ឌលប្រឡងរហូតដល់បញ្ចប់ការប្រឡង។
ជាមួយនិងពាក្យស្លោក ចេះគឺជាប់ អភិបាលខេត្តកំពង់ស្ពឺបានក្រើនរំលឹកដល់បេក្ខភាពប្រឡងទាំងអស់ ត្រូវតែខិតខំប្រឹងប្រែង យកអស់ចំណេះវិជ្ជាដែលបានរៀនចេះចាំមកធ្វើឱ្យត្រូវនូវវិញ្ញាសាប្រឡង ហើយអ្នកដែលដណ្តើមបាននិទ្ទេស A ក្នុងសម័យប្រឡងឆ្នាំនេះ នឹងទទួលបានរង្វាន់ម៉ូតូម្នាក់មួយគ្រឿងពីរដ្ឋបាលខេត្ត៕/R