Views: 7
ប្រែសម្រួល : កញ្ញាដាលីស (ដេល្លីម៉េល) ៖ អង់គ្លេសបានឡើងវគ្គ៨ក្រុមចុងក្រោយវើលខាប់ប៉ះជាមួយក្រុមការពារតំណែងជើងឯកបារាំង ខណៈក្រុមរបស់លោក ហ្គារ៉េត សៅហ្គេត (Gareth Southgate) បានយកឈ្នះសេណេហ្គាល់ ៣-០ ដោយកីឡាករចូដាន់ ហិនឌឺសុន (Jordan Henderson) ហារី ឃេន (Harry Kane) និង ប៊ូកាយ៉ូ សាកា (Bukayo Saka) ជាអ្នកស៊ុតបញ្ចូលទី។
មាន់គកបារាំងបានកក់កៅអី៨ក្រុមចុងក្រោយមុនអង់គ្លេស ជាមួយនឹងជ័យជម្នះ ៣-១ លើប៉ូឡូញ ដោយកីឡាករ ខាយលៀន អឹមបាហ្វេ (Kylian Mbappe) ស៊ុតបានពីរគ្រាប់ និងបញ្ជូនបាល់ឱ្យខ្សែប្រយុទ្ធជីរូដស៊ុតមួយគ្រាប់ផ្សេងទៀត។
តង់ទី ១ នៅកីឡដ្ឋាន Al Bayt បានធ្វើឱ្យអ្នកគាំទ្រអង់គ្លេសមានការភ័យព្រួយរហូតដល់កីឡាករហិនឌឺសុនបើកការនាំមុខមុននៅនាទីទី ៣៨ ដោយស៊ុតផុតដៃអ្នកចាំទី អេឌូអាត មែនឌី (Edouard Mendy) ពីការបញ្ជូនបាល់រ៉ាពីកីឡាករ ជូដេ ប៊ែលលីងហ៊ែម (Jude Bellingham)។
ក្រោយមក អង់គ្លេសបានបើកការនាំមុខ២គ្រាប់មុនចប់តង់ទី១ ដែលក្នុងនោះកីឡាករប៊ែលលីងហ៊ែមដណ្តើមបាល់ពីតំបន់ការពាររួចបញ្ជូនឱ្យហ្វីល ហ្វូដិន (Phil Foden) ដែលបញ្ជូនឱ្យឃេនស៊ុតចូលយ៉ាងស្អាត។ វាជាគ្រាប់ទី ៥២ របស់ឃេនសម្រាប់ជម្រើសជាតិអង់គ្លេស ដោយចាញ់កំណត់ត្រារបស់វេន រូនី (Wayne Rooney) តែ១គ្រាប់ប៉ុណ្ណោះ។
បន្ទាប់មក សាកា (Saka) ស៊ុតគ្រាប់ជ័យជម្នះ ៣-០ នៅតង់ទីពីរ ដែលហ្វូដិនជាថ្មីម្តងទៀតជាអ្នកបញ្ជូនបាល់ឱ្យស៊ុត៕
ឃេនស៊ុតចូលគ្រាប់ទី៥២ឱ្យអង់គ្លេសកាលពីយប់មិញ