Views: 1
ប្រែសម្រួល : កញ្ញាដាលីស (ដេល្លីម៉េល) ៖ ក្រុមអ្នកវិទ្យាសាស្ត្រសមុទ្របានថ្លឹងថ្លែងអំពីអត្តសញ្ញាណរបស់វត្ថុពណ៌មាសដ៏ចម្លែក ដែលត្រូវបានយកចេញពីបាតមហាសមុទ្រនៅក្បែរឆ្នេរសមុទ្ររដ្ឋអាឡាស្កា។
វត្ថុ ដែលមានពន្លឺចែងចាំងនេះ គឺមានភាពទន់ពេលប៉ះ គឺដូច ជាលិកាស្បែកយ៉ាងអ៊ីចឹង នេះបើយោងតាមរដ្ឋបាលមហាសមុទ្រនិងបរិយាកាសជាតិ (NOAA)។
វាអាចជាសំបកស៊ុត ឬ សំណល់អេប៉ុងសមុទ្រ ប៉ុន្តែការធ្វើតេស្តិ៍ DNA នៅក្នុងបន្ទប់ពិសោធន៍ អាចបង្ហាញពីសត្វថ្មីទាំងស្រុង ដែលវិទ្យាសាស្ត្រមិនស្គាល់។
អ្នកជំនាញរបស់ NOAA បានប្រៀបធៀបវាទៅនឹងសត្វចម្លែក “ពីខ្សែភាពយន្តភ័យរន្ធត់” គឺសំដៅលើឈុតឆាកមួយនៅក្នុងរឿង Alien ដែលតួអង្គ John Hurt រកឃើញ មឹកស៊ីមុខមនុស្ស (facehugger) នៅលើភពមួយផ្សេងទៀត។
លោកស្រីបណ្ឌិត ថមមី ហតតុន (Tammy Horton) នៅឯមជ្ឈមណ្ឌលមហាសមុទ្រវិទ្យាជាតិ (National Oceanography Center) ក្នុងទីក្រុងសៅថែមតុន (Southampton) មិនអាចនិយាយបានថាវត្ថុអាថ៌កំបាំងនោះជាអ្វីនោះទេ ប៉ុន្តែបានយល់ស្របថាវា “អាចមានលទ្ធភាពខ្ពស់ជាប្រភេទសត្វថ្មី”។
លោកស្រីបានប្រាប់ MailOnline ថា “វាមិនមែនជារឿងចម្លែកទេក្នុងការរកឃើញសត្វមិនស្គាល់នៅក្នុងបាតសមុទ្រជ្រៅ យើងមានរឿងជាច្រើនដែលត្រូវរុករក”។
“ពួកវាមានសំណាក ហើយនឹងអាចសិក្សាវាឱ្យកាន់តែដិតដល់ ហើយប្រហែលជានឹងធ្វើការវិភាគហ្សែនមួយចំនួនដើម្បីកំណត់យ៉ាងហោចណាស់ថាតើសត្វប្រភេទណា ដែលវាបានកើតចេញពី”៕
រដ្ឋបាលមហាសមុទ្រនិងបរិយាកាសជាតិបញ្ជូនឧបករណ៍ចាប់យកវត្ថុចម្លែកពណ៌មាសនៅបាតសមុទ្រក្បែររដ្ឋអាឡាស្កា
