Views: 1
ប្រែសម្រួល : កញ្ញាដាលីស (ដេល្លីម៉េល) ៖ ការសិក្សាបែកធ្លាយថ្មីមួយបានបង្ហាញថា មនុស្សនឹងផុតពូជនៅលើផែនដីក្នុងរយៈពេល ២៥០ លានឆ្នាំទៀត ប៉ុន្តែកាលរិច្ឆេទនេះនឹងកើតឡើងលុះត្រាតែយើងឈប់ដុតចំហេះឥន្ធនៈហ្វូស៊ីលចាប់ពីឥឡូវនេះទៅ។
ការធ្វើគំរូតាមកុំព្យូទ័របានបង្ហាញថា ភពផែនដីរបស់យើងនឹងប្រឈមមុខនឹងការផុតពូជ ដែលនឹងបំផ្លាញថនិកសត្វទាំងអស់ នេះបើយោងទៅតាមរបាយការណ៍របស់អ្នកជំនាញនៅសាកលវិទ្យាល័យប្រ៊ីស្តុល (Bristol) ។
ពួកគេនិយាយថា រាល់ទម្រង់នៃជីវិត ដែលនៅមានអាយុជីវិតនៅលើផែនដីនៅពេលនេះ នឹងត្រូវទប់ទល់នឹងសីតុណ្ហភាពចន្លោះពី ១០៤ ដល់ ១៥៨ អង្សាហ្វារិនហៃ (៤០ អង្សាសេ ដល់ ៧០ អង្សាសេ)។
ប៉ុន្តែការគណនារបស់ពួកគេមិនគិតពីឧស្ម័នផ្ទះកញ្ចក់ដែលបញ្ចេញដោយការដុតឥន្ធនៈហ្វូស៊ីលនិងប្រភពចំហេះផ្សេងទៀតដែលបង្កឡើងដោយមនុស្សនោះទេ ដូច្នេះកាលបរិច្ឆេទនៃការស្លាប់របស់យើងទំនងជានឹងកាន់តែឆាប់កើតឡើងជាងនេះ។
វានឹងក្លាយជាការផុតពូជដ៏ធំបំផុតលើកដំបូងចាប់តាំងពីដាយណូស័របានងាប់អស់ប្រហែល ៦៦ លានឆ្នាំមុន នៅពេលដែលផែនដីត្រូវបានវាយប្រហារដោយផ្កាយព្រះគ្រោះដ៏ធំមួយ។
ការសិក្សាថ្មីនេះត្រូវបានដឹកនាំដោយលោកបណ្ឌិត អាឡិចសាន់ឌឺ ហ្វានស៍វ៉ត (Alexander Farnsworth) ជាជំនួយការស្រាវជ្រាវជាន់ខ្ពស់នៅសាលាជំនាញវិទ្យាសាស្ត្រភូមិសាស្ត្រនៃសាកលវិទ្យាល័យប្រ៊ីស្តុល។
លោកបណ្ឌិតហ្វានស៍វ៉តបាននិយាយថា “ទស្សនវិស័យនៅពេលអនាគតដ៏សែនឆ្ងាយហាក់អាក្រក់ខ្លាំងណាស់។ កម្រិតកាបូនឌីអុកស៊ីតអាចនឹងមានកម្រិតស្មើបច្ចុប្បន្នពីរដង”។
“មនុស្ស រួមជាមួយនឹងប្រភេទសត្វជាច្រើនទៀត នឹងផុតពូជដោយសារតែអសមត្ថភាពក្នុងការទប់កម្តៅនេះតាមរយៈការបញ្ចេញញើស ដែលធ្វើឱ្យរាងកាយរបស់ពួកគេត្រជាក់”។
យោងតាមក្រុមអ្នកស្រាវជ្រាវបានឱ្យដឹងថា ក្នុងរយៈពេល ២៥០ លានឆ្នាំទៀត ទ្វីបទាំងអស់នៃផែនដីនឹងផ្លាស់ទីរួមបញ្ចូលគ្នាដើម្បីបង្កើតជាមហាទ្វីបដែលគេស្គាល់ថា ផានហ្គី អ៊ុលធីម៉ា (Pangea Ultima)។
ដីរបស់ផែនដីនឹងបង្កើតជារាងនំដូណាត់ ដែលមានសមុទ្រទឹកជ្រៅនៅចំកណ្តាល ពោលគឺមហាសមុទ្រអាត្លង់ទិកបច្ចុប្បន្ន។
ទន្ទឹមនឹងនោះ មហាសមុទ្រប៉ាស៊ីហ្វិកជុំវិញនឹងក្លាយជាផ្ទៃដីភាគច្រើន៕
ផែនដីនឹងរលាយនៅ២៥០លានឆ្នាំទៀត
