Views: 13
ប្រែសម្រួល : កញ្ញាដាលីស (ដេល្លីម៉េល) ៖ អតីតជំទាវទីមួយរបស់បារាំង លោកស្រី ខាឡា ព្រុយនី (Carla Bruni)បានចម្អកឱ្យអភិបាលក្រុងប៉ារីស ដោយថតកាច់រាងលើគំនរសំរាមដ៏ធំខណៈការតវ៉ាជុំវិញកំណែទម្រង់សោធននិវត្តន៍នៅតែបន្ត។
ជុំចុងក្រោយនៃការតវ៉ាប្រឆាំងនឹងច្បាប់ដែលបានអនុម័តដោយសភារបស់បារាំង ដែលបង្កើនអាយុចូលនិវត្តន៍ពី ៦២ ទៅ ៦៤ ឆ្នាំ បានដំណើរការចាប់តាំងពីថ្ងៃព្រហស្បតិ៍សប្តាហ៍មុនហើយបាននាំឱ្យមានការចាប់ខ្លួនមនុស្សរាប់រយនាក់នៅទូទាំងប្រទេស។
ប៉ូលិសក្រុងប៉ារីសបាននិយាយកាលពីថ្ងៃអង្គារទី២១មីនាថា មនុស្ស ២៣៤ នាក់ត្រូវបានចាប់ខ្លួនកាលពីពេលយប់នៅក្នុងរដ្ឋធានី ដែលភាគច្រើនគឺសម្រាប់ការដុតសំរាមនៅតាមដងផ្លូវ។ ការធ្វើកូដកម្មរបស់អ្នកប្រមូលសំរាមក្រុងប៉ារីសបានចាប់ផ្តើមថ្ងៃទី ១៦ របស់ខ្លួនកាលពីថ្ងៃអង្គារ។
នៅក្នុងសាររបង្ហោះលើ Instagram កាលពីថ្ងៃអង្គារទៅកាន់អ្នកតាមដានជាង ៧៧២.០០០ របស់លោកស្រី តារាចម្រៀងនិងជាតារាបង្ហាញម៉ូតព្រុយនី អាយុ ៥៥ ឆ្នាំ បានសរសេរថា”និទាឃរដូវមកដល់ហើយ! សូមអរគុណ អានណេ ហ៊ីដាល់ហ្គោ”។
លោកស្រី អានណេ ហ៊ីដាល់ហ្គោ (Anne Hidalgo) ជាអភិបាលក្រុងសង្គមនិយម បាននិយាយថា លោកស្រីគាំទ្រកូដករទាំងស្រុង ហើយបដិសេធមិនជួយប៉ូលិសទេ។
លោកស្រីព្រុយនី ជាភរិយារបស់អតីតប្រធានាធិបតី នីកូឡាស សាកូហ្ស៊ី តែងតែល្បីរឿងបង្ហោះសារនយោបាយតាមរយៈគណនីបណ្តាញសង្គមរបស់លោកស្រីនាពេលកន្លងមក។
ក្នុងខែមេសា ឆ្នាំ២០២១ លោកស្រីបានវាយប្រហារវប្បធម៌វ៉ូក (Woke) ដែលបានលុកលុយពេញប្រទេសបារាំង នៅក្នុងសារបង្ហោះដ៏វែងអន្លាយ៕
លោកស្រីព្រុយនីថតលើគំនរសំរាមក្នុងក្រុងប៉ារីសដើម្បីចម្អកលោកស្រីអានណេ អភិបាលក្រុងប៉ារីស
