Views: 1
ប្រែសម្រួលៈបំណង(ដេល្លីម៉េល)៖ ពួកមន្ត្រីអ៊ុយក្រែនបាននិយាយកាលពីថ្ងៃសុក្រទី២៦ឧសភាថា អ៊ុយក្រែនបានបាញ់ទម្លាក់កាំជ្រួចរុស្ស៊ីចំនួនដប់ដើមនិងដ្រូនជាង២០គ្រឿងលើរដ្ឋធានីគៀវ លើទីក្រុងដ្នីប្រូ(Dnipro)និងតំបន់ខាងកើតប្រទេស។
ការិយាល័យប្រធានាធិបតី ហ្សេឡេនស្គី បាននិយាយនៅក្នុងសេចក្តីថ្លែងការណ៍មួយថា អគ្គិភ័យមួយបានកើតមាននៅជាយក្រុងខាគីវ ក្រោយឃ្លាំងប្រេងមួយរងការវាយប្រហារ។
រុស្ស៊ីបាននិងកំពុងបង្កើនការវាយប្រហារដោយកាំជ្រួចនិងដ្រូនលើអ៊ុយក្រែននៅខែនេះ ភាគច្រើនលើឃ្លាំងភស្តុភានិងទីតាំងហេដ្ឋារចនាសម្ពន្ធនៅមុនការវាយបករបស់កងកម្លាំងអ៊ុយក្រែនដែលគេរំពឹងទុក។
កងទ័ពអាកាសអ៊ុយក្រែនបាននិយាយថា ខ្លួនបានបាញ់ទម្លាក់កាំជ្រួចដប់ដើមដែលត្រូវរុស្ស៊ីបាញ់ចេញមកពីសមុទ្រកាសព្យែន និងដ្រូនអត្តឃាតShahedចំនួន២៣គ្រឿង និងដ្រូនឈ្លបយកការណ៍ចំនួនពីរកាលពីយប់មិញ។សរុបកាំជ្រួច១៧ដើម និងដ្រូន៣១គ្រឿងត្រូវបានបាញ់បង្ហោះនៅក្នុងការវាយប្រហារនេះ។
ចំណែកមន្ត្រីរុស្ស៊ីបានអះអាងថា អ៊ុយក្រែនបានវាយប្រហារចូលតំបន់ពីរនៅរុស្ស៊ីខាងត្បូង ដោយប្រើរ៉ុក្កែតនិងដ្រូន តែត្រូវបានបាញ់ទម្លាក់ដោយកងការពារដែនអាកាសរបស់ខ្លួន៕
