Views: 9
ប្រែសម្រួលៈបំណង(euronews,ដេល្លីម៉េល)៖ ការលើកឡើងរបស់ប្រធានាធិបតីបារាំងលោក អេមម៉ានុយអែល ម៉ាក្រុង ដែលថាលោកខាងលិចគួរពិចារណាអំពីតំរូវការរបស់រុស្ស៊ីសំរាប់ការធានាសន្តិសុខរបស់រុស្ស៊ី បើសិនជារដ្ឋាភិបាលទីក្រុងមូស្គូយល់ព្រមចរចាបញ្ចប់សង្គ្រាមនៅអ៊ុយក្រែននោះ បានបង្កព្យុះរិះគន់មួយនៅទីក្រុងគៀវនិងបណ្តារដ្ឋជាសម្ពន្ធមិត្តក្នុងតំបន់បាល់ទិច(Baltic)កាលពីចុងសប្តាហ៍។
ក្នុងកិច្ចសម្ភាសន៍មួយជាមួយទូរទស្សន៍បារាំងTF1 លោកម៉ាក្រុងបាននិយាយថា អឺរ៉ុបត្រូវត្រៀមទំរង់សន្តិសុខនាពេលអនាគតរបស់ខ្លួននិងក៏គិតអំពី«របៀបផ្តល់ការធានាសន្តិសុខដល់រុស្ស៊ី នៅពេលដែលប្រទេសនេះវិលមកកាន់តុចរចា»។
លោកម៉ាក្រុងរងការរិះគន់ភ្លាមក្រោយនិយាយថា រដ្ឋាភិបាលទីក្រុងមូស្គូចាំបាច់ត្រូវការការធានាសន្តិសុខដើម្បីបញ្ចប់សង្គ្រាមអ៊ុយក្រែន
ជំនួយការជាន់ខ្ពស់របស់ប្រធានាធិបតីអ៊ុយក្រែនលោក មីខាអ៊ីឡូ ប៉ូដូលយ៉ាក(Mykhailo Podolyak)បាននិយាយថា គឺ«ពិភពលោកទេដែលត្រូវបានការធានាសន្តិសុខពីរុស្ស៊ីមិនមែនបញ្ច្រាសដូចនេះទេ»។
ចំណែកលោក អូឡេកស៊ី ដានីឡូវ(Oleksiy Danilov)លេខានៃក្រុមប្រឹក្សាយោធានិងសន្តិសុខជាតិអ៊ុយក្រែន បាននិយាយថារុស្ស៊ីមួយ«គ្មាននុយក្លេអ៊ែរនិងរំសាយចោលយោធា»នឹងជាការធានាល្អបំផុតដោយមិនត្រឹមតែសម្រាប់អ៊ុយក្រែន តែពិភពលោកទាំងមូល។«មាននរណាដែលចង់ផ្តល់ការធានាសន្តិសុខដល់រដ្ឋភេរវកម្មនិងឃាតករ?។ជំនួសអោយទីក្រុងញូរែមប៊ែរ( Nuremberg)តើត្រូវចុះហត្ថលេខានិងចាប់ដៃរុស្ស៊ីឬ?»។
រំលឹកថា សវនាការនៅទីក្រុងNurembergនៅឆ្នាំ១៩៤៧ដើម្បីកាត់ទោសឧក្រិដ្ឋជនសង្គ្រាមណាស៊ីបន្ទាប់ពីសង្គ្រាមលោកលើកទីពីរ។ឥឡូវវាត្រូវបានគេមើលឃើញថាជាព្រឹត្តិការណ៍នាំមុខមួយសំរាប់តុលាការនានា ដូចជាតុលាការឧក្រិដ្ឋកម្មអន្តរជាតិនៅទីក្រុងឡាអេ។ រដ្ឋាភិបាលទីក្រុងមូស្គូ បានបដិសេធថា កងកម្លាំងរបស់ខ្លួនមិនបានប្រព្រឹត្តឧក្រិដកម្មសង្គ្រាមណានៅអ៊ុយក្រែនទេ។
ក្រោយកិច្ចពិភាក្សាជាច្រើនជុំរវាងមន្ត្រីរុស្ស៊ីនិងអ៊ុយក្រែន ទាំងរដ្ឋាភិបាលទីក្រុងមូស្គូនិងគៀវមិនបានជួបចរចាគ្នាអស់ពេលរាប់ខែមកហើយដើម្បីបញ្ចប់សង្គ្រាម។រដ្ឋាភិបាលទីក្រុងគៀវបាននិយាយថាកិច្ចពិភាក្សាអាចធ្វើទៅបានដរាបណារុស្ស៊ីបញ្ឈប់ការវាយប្រហារខ្លួន ហើយដកកងកម្លាំងទាំងអស់ចេញពីទឹកដីអ៊ុយក្រែនដែលរុស្ស៊ីកំពុងកាន់កាប់។
តែវិមានក្រឹមឡាំងបាននិយាយថា លោកខាងលិចត្រូវតែទទួលស្គាល់ការប្រកាសកាត់ដីអ៊ុយក្រែនមួយចំនួនកាលពីខែកញ្ញាជារបស់រុស្ស៊ី មុនពេលការពិភាក្សាណាមួយជាមួយលោកពូទីន។
លោកម៉ាក្រុងកាលពីសប្តាហ៍មុនបានជួបពិភាក្សាជាមួយសមភាគីអាម៉េរិកចូ បៃដិន នៅទីក្រុងវ៉ាស៊ីនតោនអំពីសង្គ្រាមនៅអ៊ុយក្រែន។ក្រោយមកលោកបៃដិនបាននិយាយថា មិនមានលក្ខខណ្ឌសំរាប់កិច្ចពិភាក្សារវាងអាម៉េរិកនិងរុស្ស៊ីស្តីពីការបញ្ចប់ជម្លោះនេះទេតែអាម៉េរិកត្រៀមចរចាជាមួយពូទីន៕