Views: 2
ប្រែសម្រួលៈបំណង(ដេល្លីម៉េល)៖អ៊ុយក្រែនព្រមានអំពីស្ថានភាពអាសន្នអគ្គិសនីជាថ្មីនៅក្នុងតំបន់ជាច្រើននៅពេលខ្លួនកំពុងជួសជុលការខូចខាតបង្កឡើងដោយការវាយប្រហារដោយកាំជ្រួចរុស្ស៊ីដែលបានបំផ្លាញផ្ទះនិងផ្តាច់ចរន្តអគ្គិសនី នៅពេលរដ្ឋាភិបាលទីក្រុងមូស្គូចោទប្រកាន់រដ្ឋាភិបាលទីក្រុងគៀវថាវាយប្រហារចូលជ្រៅទៅក្នុងប្រទេសរុស្ស៊ីដោយប្រើដ្រូន។
ការវាយប្រហារដោយកាំជ្រួចរុស្ស៊ីមួយប្រាវត្រូវបានរំពឹងទុកជាមុននៅអ៊ុយក្រែននិងវាបានកើតឡើងនៅពេលស្ថានភាពគ្រាអាសន្នអគ្គិសនីនៅអ៊ុយក្រែនប្រុងនឹងចប់។ការវាយប្រហារថ្មីបានរុញទម្លាក់ផ្នែកជាច្រើននៃប្រទេសអោយធ្លាក់ក្នុងភាពងងឹងជាមួយនឹងសីតុណ្ហភាពត្រជាក់ដល់សូន្យ។
យ៉ាងហោចណាស់មនុស្ស៤នាក់ត្រូវបានសម្លាប់ដោយការវាយប្រហាររបស់រុស្ស៊ី នេះបើតាមប្រធានាធិបតីអ៊ុយក្រែនលោក វ៉ូឡូឌីមៀ ហ្សេឡេនស្គី និងថាកាំជ្រួចប្រមាណ៧០គ្រាប់ត្រូវបានបាញ់ទម្លាក់។លោកប្រធានាធិបតីបាននិយាយថា« នៅតំបន់ជាច្រើន មានការដាច់ភ្លើងក្នុងស្ថានភាពគ្រាអាសន្ន។យើងនឹងធ្វើអ្វីគ្រប់យ៉ាងដើម្បីស្តារវាឡើងវិញ»។
ក្នុងពេលជាមួយគ្នា សហរដ្ឋអាម៉េរិកបាននិយាយថាខ្លួននឹងបើកកិច្ចប្រជុំមួយនៅថ្ងៃព្រហស្បតិ៍ជាមួយនឹងនាយកក្រុមហ៊ុនប្រេងនិងហ្គាសដើម្បីពិភាក្សារកវិធីគាំទ្រហេដ្ឋារចនាសម្ពន្ធថាមពលអ៊ុយក្រែន។
សូមបញ្ជាក់ថា ហេដ្ឋារចនាសម្ពន្ធថាមពលអ៊ុយក្រែនបានរងការវាយប្រហារជាខ្លាំងពីសំណាក់កាំជ្រួចរុស្ស៊ីចាប់តាំងពីដើមខែតុលា នៅពេលកងកម្លាំងរុស្ស៊ីត្រូវបង្ខំដកចេញពីទឹកដីដែលខ្លួនវាយកាន់កាប់ខ្លះ៕
បើតាមក្រសួងមហាផ្ទៃអ៊ុយក្រែន ទីតាំងជាង៥០០នៅអ៊ុយក្រែនគ្មានអគ្គិសនីប្រើទេកាលពីថ្ងៃអាទិត្យ