Views: 8
ប្រែសម្រួលៈបំណង(NATION/ASIA NEWS NETWORK)៖ សារធាតុវិទ្យុសកម្មដ៏គ្រោះថ្នាក់មួយធុងដែលបានបាត់ចេញពីរោងចក្រអគ្គិសនីថៃមួយនៅក្នុងខេត្តប្រាជីនប៊ូរី (Prachinburi)ទំនងជាចប់ត្រឹមរោងចក្រស្លដែកនៅក្នុងខេត្តភាគខាងកើតថៃមួយនេះ ។
ពួកមន្ត្រីបានចូលត្រួតពិនិត្យបណ្តារោងចក្រដែកនៅក្នុងខេត្ត ដែលស្ថិតនៅចម្ងាយប្រមាណ១៥០គីឡូម៉ែត្រពីក្រុងបាងកកចាប់តាំងពីសារធាតុ សេស្យូម-១៣៧(Caesium-137)មួយធុងទម្ងន់២៥គីឡូក្រាមបានបាត់ចេញពីរោងចក្រអគ្គិសនីដើរដោយធ្យូងថ្មមួយកាលពីថ្ងៃ១០មីនា។កាលពីថ្ងៃអាទិត្យទី១៩មីនាពួកគេបានរកឃើញសញ្ញានៃសារធាតុវិទ្យុសកម្មនៅរោងស្មិតឬរោងចក្រស្លដែកធំបំផុតនៅក្នុងខេត្ត។
សញ្ញានៃចំហាយសារធាតុវិទ្យុសកម្មនេះកើតចេញគំនរដែកអេតចាយមួយដែលត្រូវបានគាបចេញជាគូបៗ ដើម្បីត្រៀមរំលាយកាលពីល្ងាចថ្ងៃអាទិត្យ។
ពួកមន្ត្រីបានបញ្ជាអោយរោងចក្រផ្អាកដំណើរការដើម្បីកុំអោយដែកវិទ្យុសកម្មត្រូវកំទេចហើយចែកជាបំណែកទីនៅក្នុងដុំដែកជាច្រើន។និយោជិតទាំងអស់ត្រូវបានបញ្ជាអោយចេញពីរោងចក្រហើយខ្សែត្រូវបានចងនៅជុំវិញរោងចក្រដើម្បីកុំអោយអ្នកក្រៅចូល។
ការស៊ើបអង្កេតជំហានដំបូងលើលោហៈដែលត្រូវបានរំលាយបានរកឃើញសារធាតុសេស្យូម-១៣៧នៅក្នុងធូលីខ្យល់កនុងរោងចក្រ។
អភិបាលខេត្តលោក រ៉ុនណារ៉ុង ណាខនជីនដា(Ronnarong Nakornjinda)បាននិយាយថា ធុងផ្ទុកវិទ្យុសកម្មនេះអាចត្រូវគេលួចមកលក់អោយឃ្លាំងអេតចាយណាមួយ។
បណ្ឌិតជូឡាពង់ តាវីស្រ៊ី(Julapong Taweesri)អគ្គនាយកនៃនាយកដ្ឋានការងារឧស្សាហកម្មថៃ បាននិយាយក្នុងកិច្ចសម្ភាសន៍មួយថា ធុងវិទ្យុសកម្មដែលបាត់អាចត្រូវរំលាយទៅជា«ធូលីពណ៌ក្រហម»អស់ទៅហើយ ក្រោយពីពួកមន្ត្រីបានចាប់បានសារធាតុវិទ្យុសកម្មសេស្យូមនៅក្នុងភាគតូចល្អិតៗនៃធូលីក្នុងរោងចក្រតែមិនរកឃើញធាតុវិទ្យុសកម្មនៅក្នុងលោហធាតុដែកនៅក្នងរោងចក្រនោះទេ។
លោក រ៉ុនណារ៉ុង បានព្រមានថា ការប៉ះសារធាតុវិទ្យុសកម្មនៃអាចគ្រោះថ្នាក់ដល់ស្បែក ថ្លើមនិងខួរឆ្អឹងខ្នងដែលនាំដល់ការកើតមហារីក។
មន្ត្រីសុខាភិបាលខេត្តកាលពីសប្តាហ៍មុនបានបង្កើតមជ្ឈមណ្ឌលមួយដើម្បីស្វែងរកធុងដែលបាត់និងត្រៀមដោះស្រាយផលកើតចេញពីឧបទ្ទវហេតុវិទ្យុសកម្មនេះ។ខេត្តក៏ប្រកាសជូនរង្វាន់៥០.០០០បាតចំពោះអ្នកផ្តល់ព័ត៌មាននាំដល់ការរកឃើញធុងវិទ្យុសកម្មនេះ៕
សញ្ញានៃសារធាតុវិទ្យុសកម្មសេស្យូម-១៣៧ត្រូវបានរកឃើញនៅរោងចក្រស្លដែលមួយក្នុងខេត្តប្រាជីនប៊ូរី តែធុងផ្ទុកវិទ្យុសកម្មអត់ឃើញទំនងជាត្រូវគាបអោយកំពិតទៅជាដែលអេតចាយមុនរំលាយ ឬក៏ត្រូវរំលាយក្លាយជាធូលីអស់ទៅហើយ
ខេត្តប្រកាសជូនរង្វាន់៥០.០០០បាតចំពោះអ្នកផ្តល់ព័ត៌មាននាំដល់ការរកឃើញធុងវិទ្យុសកម្មនេះ
