Views: 10
ប្រែសម្រួល : កញ្ញាដាលីស (ស្ត្រេតថែមស៍) ៖ សហរដ្ឋអាម៉េរិកនិងជប៉ុនបាននិយាយកាលពីថ្ងៃសុក្រថាពួកគេនឹងជំរុញកិច្ចសហប្រតិបត្តិការក្នុងការស្រាវជ្រាវនិងការអភិវឌ្ឍបន្ទះឈីបកម្រិតខ្ពស់និងបច្ចេកវិជ្ជាផ្សេងទៀត ជាសញ្ញាចុងក្រោយបង្អស់បង្ហាញថាសម្ពន្ធមិត្តទាំងពីរកំពុងពង្រឹងទំនាក់ទំនងខាងផ្នែកបន្ទះឈីប។
ចំណាត់ការ ដែលរួមបញ្ចូលផងដែរនូវកិច្ចសហការលើ Quantum Computing និងការពិភាក្សាលើបញ្ញាសិប្បនិមិត្ត បានកើតឡើងខណៈរដ្ឋាភិបាលក្រុងវ៉ាស៊ីនតោននិងតូក្យូព្យាយាមកាត់បន្ថយការប៉ះពាល់ជាមួយចិន និង ធ្វើការរួមគ្នាដើម្បីពង្រីកការផលិតបន្ទះឈីប និងធានានូវសមាសធាតុកម្រិតខ្ពស់ដែលចាំបាច់សម្រាប់កំណើនសេដ្ឋកិច្ច។
សហរដ្ឋអាម៉េរិក ជប៉ុន និងសមាជិកដទៃទៀតនៃក្រុមប្រទេសជឿនលឿនទាំងប្រាំពីរ (G-7)កាលពីសប្តាហ៍មុនបានព្រមព្រៀងគ្នាដើម្បី “លុបបំបាត់ហានិភ័យ” ប៉ុន្តែមិនមែនដើម្បីធ្វើបាបចិននោះទេ ដោយបញ្ជាក់ពីការព្រួយបារម្ភយ៉ាងខ្លាំងក្នុងចំណោមប្រទេសប្រជាធិបតេយ្យជឿនលឿនអំពីការកើនឡើងនៃអំណាចបច្ចេកវិជ្ជារបស់ចិន និងការកាន់កូនសោរបស់ចិនលើខ្សែសង្វាក់ផ្គត់ផ្គង់បច្ចេកវិជ្ជា។
នៅក្នុងសេចក្តីថ្លែងការណ៍រួម ប្រទេសទាំងពីរបានព្រមព្រៀងគ្នាក្នុងការបង្កើនកិច្ចសហប្រតិបត្តិការរវាងមជ្ឈមណ្ឌលស្រាវជ្រាវនិងអភិវឌ្ឍន៍របស់ពួកគេខណៈពួកគេបានគូសវាសផែនទីកិច្ចសហប្រតិបត្តិការបច្ចេកវិជ្ជាអនាគត។
សេចក្តីថ្លែងការណ៍នេះបានធ្វើឡើងបន្ទាប់ពីរដ្ឋមន្ត្រីក្រសួងសេដ្ឋកិច្ច ពាណិជ្ជកម្ម និងឧស្សាហកម្មរបស់ជប៉ុន លោក យ៉ាស៊ូតូស៊ី នីស៊ីមូរ៉ា (Yasutoshi Nishimura)បានជួបប្រជុំគ្នានៅទីក្រុងដេត្រយ (Detroit) ជាមួយរដ្ឋមន្ត្រីក្រសួងពាណិជ្ជកម្មអាម៉េរិក លោកស្រី ជីណា រ៉ៃម៉ុនដូ (Gina Raimondo)។
ប្រទេសទាំងពីរបានយល់ព្រមធ្វើការជាមួយគ្នា “ដើម្បីកំណត់និងដោះស្រាយការប្រមូលផ្តុំភូមិសាស្ត្រនៃផលិតកម្មដែលបំផ្លាញភាពធន់នៃខ្សែសង្វាក់ផ្គត់ផ្គង់បន្ទះឈីប”។ អ្នកទាំងពីរក៏បានប្តេជ្ញាចិត្តក្នុងការពង្រឹងខ្សែសង្វាក់ផ្គត់ផ្គង់ផងដែរដោយសហការជាមួយប្រទេសកំពុងរីកចម្រើននិងកំពុងអភិវឌ្ឍ។
ជប៉ុនបានបង្កើតក្រុមហ៊ុនផលិតបន្ទះឈីបថ្មី Rapidus ដែលកំពុងធ្វើការជាមួយក្រុមហ៊ុន International Business Machines (IBM) ដើម្បីបង្កើតឧបករណ៍បន្ទះឈីបកម្រិតខ្ពស់ ហើយកំពុងផ្តល់ការឧបត្ថម្ភធនដល់ក្រុមហ៊ុនផលិតអង្គចងចាំអាម៉េរិក Micron Technology ដើម្បីឱ្យខ្លួនអាចពង្រីកផលិតកម្មនៅទីនោះ។
ជប៉ុន រួមជាមួយនឹងហូឡង់ ក៏បានយល់ព្រមស្របតាមការត្រួតពិនិត្យការនាំចេញរបស់សហរដ្ឋអាម៉េរិកផងដែរ ដែលនឹងរឹតត្បិតការលក់ឧបករណ៍ផលិតបន្ទះឈីបមួយចំនួនទៅកាន់ប្រទេសចិន។
លោកស្រីរ៉ៃម៉ុនដូកាលពីថ្ងៃព្រហស្បតិ៍បានជួបជាមួយរដ្ឋមន្ត្រីក្រសួងពាណិជ្ជកម្មចិនលោក វ៉ាង វិនតាវ (Wang Wentao) នៅទីក្រុងវ៉ាស៊ីនតោន កន្លែងដែលអ្នកទាំងពីរបានផ្លាស់ប្តូរទស្សនៈស្តីពីពាណិជ្ជកម្ម ការវិនិយោគ និងគោលនយោបាយនាំចេញ៕
អាម៉េរិកនិងជប៉ុននឹងសហការក្នុងការស្រាវជ្រាវនិងការអភិវឌ្ឍបន្ទះឈីបកម្រិតខ្ពស់និងបច្ចេកវិជ្ជាផ្សេងទៀត