Views: 12
ដោយ:បូកគោ/កំពត: ទឹកឈូជាស្រុកមួយក្នុងចំណោមក្រុងស្រុកទាំង៩របស់ខេត្តកំពតដែលបានប្រកាសជូនដំណឹងអំពីការបើកបម្រើសេវាអត្រានុកូលដ្ឋានតាមរយៈទំព័រហ្វេកប៊ុក និងតេឡេក្រាមនៃរដ្ឋបាលស្រុក។ នេះជាសេវាកម្មថ្មីដែលនឹងផ្តល់ភាពងាយស្រួលមួយកម្រិតបន្ថែមទៀត ពិសេសសម្រាប់ប្រជាពលរដ្ឋទៅបំពេញការងារនៅខេត្តឆ្ងាយ។
លោកអ៊ឹម ច័ន្ទសោធន អភិបាលស្រុកទឹកឈូបានប្រាប់ឲ្យដឹងថាផ្អែកតាមគោលនយោបាយដឹកនាំរបស់រាជរដ្ឋាភិបាល ស្រុកទឹកឈូបានយកចិត្តទុកដាក់យ៉ាងខ្លាំងចំពោះការផ្តល់សេវាផ្សេងៗតាមការិយាល័យច្រកចេញចូលតែមួយរបស់រដ្ឋបាលស្រុក។ កន្លងមកការផ្តល់សេវាមិនមានបញ្ហារាំងស្ទះ ឬយឺតយ៉ាវនោះទេ។
លោកអភិបាលស្រុកបានបន្តថាដើម្បីបង្កភាពងាយស្រួលជូនប្រជាពលរដ្ឋបន្ថែមទៀត រដ្ឋបាលស្រុកបានសម្រេចបើកបម្រើសេវាអត្រានុកូលដ្ឋានតាមបណ្តាញទំនាក់ទំនងសង្គមតែម្តង។ ក្នុងករណីបងប្អូនប្រជាពលរដ្ឋត្រូវការសេវា ឬមានភាពមន្ទិលសង្ស័យអ្វីមួយ សូមទំនាក់ទំនងតាមលេខទូរសព្ទ ឬតេឡេក្រាមរបស់រដ្ឋបាលស្រុក ០១២ ៤២៤ ៣៨៩។
លោកមូល សុធា ប្រធានការិយាល័យច្រកចេញចូលតែមួយស្រុកទឹកឈូបានបញ្ជាក់ថាមន្ត្រីនៅការិយាល័យច្រកចេញចូលតែមួយ មានចំនួន១៣រូបដោយពួកគាត់ខិតខំប្រឹងប្រែងបំពេញការងារមិនដែលអវត្តមានឡើយ។ ជាលទ្ធផល សម្រាប់រយៈពេល១០ខែកន្លងទៅ ស្រុកបានផ្តល់សេវាជាង១ម៉ឺនករណី ពោលគឺមានចំនួនច្រើនជាងគេក្នុងចំណោមក្រុងស្រុកទាំងអស់នៃខេត្តកំពត។
លោកប្រធានការិយាល័យបានបន្តថាក្រោយចាប់បើកបម្រើសេវាតាមបណ្តាញទំនាក់ទំនងសង្គមបន្ថែមទៀតនេះ ប្រជាពលរដ្ឋនឹងកាន់តែមានភាពងាយស្រួលជាងមុន៕
