Views: 14
ដោយៈ ភ្នំសន្ទុក / កំពង់ធំ៖ នៅរសៀលថ្ងៃទី ២៥ ខែតុលា ឆ្នាំ២០២៣ លោកងួន រាសី អភិបាលរងខេត្តកំពង់ធំ បានជំរុញឱ្យបង្កើនការដាំដុះដើមស្វាយចន្ទី និងនាំចេញ ផលិតផល គ្រាប់ស្វាយចន្ទី ទៅកាន់ទីផ្សារអន្តរជាតិ ឱ្យកាន់តែច្រើន។
លោកបានឱ្យដឹងថា ការបង្កើនលទ្ធភាព ក្នុងការនាំចេញគ្រាប់ស្វាយចន្ទីកែច្នៃ ពីសំណាក់សិប្បកម្មកែច្នៃស្វាយចន្ទី ជ័យសំបូរនេះ គឺដើរស្របតាមគោលនយោបាយ ជាតិ ស្តីពីស្វាយចន្ទី ដើម្បីបង្កើនការដាំដុះ និងនាំចេញផលិតផលគ្រាប់ស្វាយចន្ទី ទៅកាន់ទីផ្សារអន្តរជាតិ ឱ្យកាន់តែច្រើន ដែលក្រសួងពាណិជ្ជកម្ម ក៏ដូចជា រាជរដ្ឋាភិបាលកម្ពុជា ដឹកនាំដោយសម្តេចធិបតី ហ៊ុន ម៉ាណែត ជានាយករដ្ឋមន្ត្រីនៃ កម្ពុជា។
ការលើកឡើងនេះ នាឱកាសលោកអភិបាលរងខេត្តកំពង់ធំ អមដំណើរដោយលោក ស្រី គង់ សិទ្ធិកា អនុរដ្ឋលេខាធិការ ក្រសួងពាណិជ្ជកម្ម អញ្ជើញទស្សនកិច្ចសិប្បកម្ម កែច្នៃគ្រាប់ស្វាយចន្ទី ជ័យសំបូរ ស្រុកប្រាសាទសំបូរ ខេត្តកំពង់ធំ ។
លោកអភិបាលរងខេត្តកំពង់ធំ បានបន្តថា បច្ចុប្បន្ន សេចក្តីព្រាងច្បាប់ នៃគោលនយោ បាយជាតិ ស្តីពីស្វាយចន្ទីនេះ បានដល់ដំណាក់កាល ចុងក្រោយហើយ ដែលយើង ត្រូវបញ្ជូលធាតុចូលសំខាន់មួយចំនួន ពីក្រសួង-ស្ថាប័ន និងគ្រប់ពីតួអង្គពាក់ព័ន្ធ ជាពិសេសពីសំណាក់អ្នកដាំដុះ អ្នកកែច្នៃ អ្នកនាំចេញ ដើម្បីឱ្យគោលនយោបាយនេះ ដើរដោយរលូត មានប្រសិទ្ធភាព ប្រកបដោយនិរន្តរភាព។
អ្នកស្រី អ៊ិន ឡៃហួត ម្ចាស់សិប្បកម្មកែច្នៃគ្រាប់ស្វាយចន្ទី ជ័យសំបូរ មានទីតាំង ក្នុងភូមិអារក្ស ឃុំជ័យ ស្រុកកំពង់ស្វាយ ខេត្តកំពង់ធំ បានឱ្យដឹងថា សិប្បកម្មផ្តើមដំណើរការ តាំងពីឆ្នាំ២០២០ ដោយផ្តើមចេញពីការប្រកបអាជីវកម្ម ជាលក្ខណៈ គ្រួសារប៉ុណ្ណោះ ប៉ុន្តែរហូតមកដល់ពេលនេះ បានចុះបញ្ជីដំណើរការនាំចេញ រយៈពេលជិត ៤ ឆ្នាំហើយ។
អ្នកស្រី បានបន្តថា ខ្សែសង្វាក់ក្នុងការផលិត របស់សិប្បកម្ម មានសមត្ថភាពក្នុងការ ផលិតគ្រាប់ស្វាយចន្ទី បានចំនួន ២ តោន ក្នុងមួយថ្ងៃ នៃផលិតផលវត្ថុធាតុដើមមិនទាន់កែច្នៃ។ ផលិតផលសម្រេចរបស់សិប្បកម្មបាននាំចេញទៅលក់នៅទីផ្សារ ទំនើបជាច្រើន ទូទាំងប្រទេសកម្ពុជា និងបាននាំចេញទៅកាន់ទីផ្សារ និងបង្កើនការនាំ ចេញទៅកាន់ទីផ្សារអឺរ៉ុប សហរដ្ឋអាមេរិក កាណាដា ចិន និងអូស្រ្តាលីផងដែរ៕/V/r
