Views: 2
ប្រែសម្រួល : កញ្ញាដាលីស (ដេល្លីម៉េល) ៖ រុស្ស៊ីនិងចិនកាលពីថ្ងៃពុធបានវេតូការជំរុញរបស់សហរដ្ឋអាម៉េរិកដើម្បីឱ្យក្រុមប្រឹក្សាសន្តិសុខអង្គការសហប្រជាជាតិធ្វើសកម្មភាពលើជម្លោះអ៊ីស្រាអែលនិងក្រុមហាម៉ាស ដោយអំពាវនាវឱ្យមានការផ្អាកការប្រយុទ្ធដើម្បីអនុញ្ញាតឱ្យជំនួយមនុស្សធម៌ហូរចូល ការការពារជនស៊ីវិល និងការបញ្ឈប់ការបំពាក់អាវុធដល់ក្រុមហាម៉ាសនិងពួកសកម្មប្រយុទ្ធដទៃទៀតនៅក្នុងតំបន់ហ្កាហ្សាស្ទ្រីប។
សហរដ្ឋអាម៉េរិកបានដាក់ចេញសេចក្តីព្រាងសេចក្តីសម្រេចចិត្តមួយកាលពីថ្ងៃសៅរ៍ ខណៈដែលការតវ៉ាជាសកលបានកើនឡើងជុំវិញវិបត្តិមនុស្សធម៌កាន់តែអាក្រក់ និងការកើនឡើងចំនួនអ្នកស្លាប់ជាជនស៊ីវិលនៅតំបន់ហ្កាហ្សា។ អាម៉េរិកបានធ្វើចំណាត់ការនេះត្រឹមតែប៉ុន្មានថ្ងៃបន្ទាប់ពីខ្លួនបានវេតូលើសេចក្តីព្រាងដែលផ្តោតលើមនុស្សធម៌ពីប្រេស៊ីល ដោយលើកហេតុផលថាត្រូវការពេលវេលាបន្ថែមទៀតសម្រាប់ការទូតដែលដឹកនាំដោយសហរដ្ឋអាម៉េរិក។
អត្ថបទបឋមរបស់សហរដ្ឋអាម៉េរិកបានធ្វើឱ្យអ្នកការទូតជាច្រើនភ្ញាក់ផ្អើលជាមួយនឹងភាពមិនច្បាស់លាស់របស់ខ្លួនក្នុងការបញ្ជាក់ថា អ៊ីស្រាអែលមានសិទ្ធិការពារខ្លួននិងទាមទារឱ្យអ៊ីរ៉ង់បញ្ឈប់ការនាំចេញអាវុធទៅក្រុមសកម្មប្រយុទ្ធនេះ។ វាមិនរួមបញ្ចូលការអំពាវនាវឱ្យផ្អាកបាញ់ដើម្បីមនុស្សធម៌សម្រាប់ឱ្យជំនួយហូរចូលនោះទេ។ ប៉ុន្តែអាម៉េរិកបានបន្ទន់សម្តីយ៉ាងច្រើនទៅលើអត្ថបទចុងក្រោយ ដែលដាក់ឱ្យក្រុមប្រឹក្សាបោះឆ្នោត។
ឯកអគ្គរដ្ឋទូតអាម៉េរិកប្រចាំអ.ស.ប លោកស្រី លីនដា ថូម៉ាស-ហ្គ្រីនហ្វៀល (Linda Thomas-Greenfield) បានប្រាប់ក្រុមប្រឹក្សាសន្តិសុខដែលមានសមាជិក ១៥ ប្រទេសបន្ទាប់ពីការវេតូដល់ទៅពីរ ដែលលោកស្រីពណ៌នាថាខកចិត្ត យ៉ាងដូច្នេះថា “យើងពិតជាបានស្តាប់អ្នកទាំងអស់គ្នា។ បើទោះបីជាការបោះឆ្នោតថ្ងៃនេះបរាជ័យក៏ដោយ ក៏ប៉ុន្តែយើងមិនត្រូវឱ្យគេរារាំងឡើយ”។
វាជាសកម្មភាពដ៏កម្ររបស់សហរដ្ឋអាម៉េរិកក្នុងការស្នើឱ្យមានចំណាត់ការរបស់ក្រុមប្រឹក្សាសន្តិសុខ។ ជាប្រពៃណី រដ្ឋាភិបាលក្រុងវ៉ាស៊ីនតោនតែងការពារអ៊ីស្រាអែល ដែលជាសម្ពន្ធមិត្តរបស់ខ្លួន នៅក្នុងស្ថាប័នពិភពលោកមួយនេះ។
សមាជិកដប់បានបោះឆ្នោតគាំទ្រអត្ថបទរបស់សហរដ្ឋអាម៉េរិក ខណៈអារ៉ាប់រួមអេមីរ៉ាតបោះឆ្នោតបដិសេធ ហើយប្រេស៊ីលនិងម៉ូសំប៊ិកបោះអនុប្បវាទ។
លោក ចាង ជុន (Zhang Jun) ឯកអគ្គរដ្ឋទូតចិនប្រចាំអ.ស.បបានប្រាប់ក្រុមប្រឹក្សាបន្ទាប់ពីការបោះឆ្នោតថា “សេចក្តីព្រាងនេះមិនឆ្លុះបញ្ចាំងពីការអំពាវនាវខ្លាំងបំផុតរបស់ពិភពលោកឱ្យមានបទឈប់បាញ់និងការបញ្ចប់ការប្រយុទ្ធគ្នាទេ ហើយវាមិនអាចជួយដោះស្រាយបញ្ហាបានទេ។ នៅពេលនេះ បទឈប់បាញ់មិនមែនគ្រាន់តែជាពាក្យការទូតប៉ុណ្ណោះទេ វាមានន័យថា ជីវិតនិងការស្លាប់របស់ជនស៊ីវិលជាច្រើននាក់។”
អគ្គលេខាធិការអ.ស.ប លោក អង់តូនីញ៉ូ គូថេរ៉េស បានអំពាវនាវឱ្យមានបទឈប់បាញ់ដើម្បីមនុស្សធម៌។
បន្ទាប់ពីការជាប់គាំងនៃក្រុមប្រឹក្សាសន្តិសុខ មហាសន្និបាតអ.ស.ប ដែលមានសមាជិក១៩៣ប្រទេសនឹងបោះឆ្នោតនៅថ្ងៃសុក្រលើសេចក្តីព្រាងសេចក្តីសម្រេចចិត្តដែលដាក់ចេញដោយបណ្តារដ្ឋអារ៉ាប់ដែលអំពាវនាវឱ្យមានបទឈប់បាញ់។ គ្មានប្រទេសណាមួយមានសិទ្ធិវេតូនៅក្នុងមហាសន្និបាតទេ។ សេចក្តីសម្រេចចិត្តមិនចងដោយច្បាប់ទេ ប៉ុន្តែមានទម្ងន់នយោបាយ៕
រុស្ស៊ីនិងចិនវេតូលើសេចក្តីព្រាងសេចក្តីសម្រេចចិត្តរបស់អាម៉េរិក ដោយសារវាមិនឆ្លុះបញ្ចាំងពីការអំពាវនាវខ្លាំងបំផុតរបស់ពិភពលោក
