Views: 1
ប្រែសម្រួល : កញ្ញាដាលីស (ដេល្លីម៉េល) ៖ អនុរដ្ឋមន្ត្រីការបរទេសរុស្ស៊ីលោក សឺហ្គេ រីយ៉ាបកូវ (Sergei Ryabkov) បាននិយាយកាលពីថ្ងៃពុធទី២២មីនាថាហានិភ័យនៃការប៉ះទង្គិចដោយអាវុធនុយក្លេអ៊ែរគឺស្ថិតក្នុងកម្រិតខ្ពស់បំផុតក្នុងរយៈពេលជាច្រើនទសវត្សរ៍មកនេះ ដោយព្រមានថា រដ្ឋាភិបាលក្រុងមូស្គូកំពុងស្ថិតក្នុងជម្លោះបើកចំហ “តាមការជាក់ស្តែង”ជាមួយរដ្ឋាភិបាលក្រុងវ៉ាស៊ីនតោនជុំវិញសង្គ្រាមនៅអ៊ុយក្រែន។
ទំនាក់ទំនងដែលតែងតែតានតឹងរវាងរុស្ស៊ីនិងអាម៉េរិក មានសភាពកាន់តែអាក្រក់ទៅៗ ចាប់តាំងពីរុស្ស៊ីបានឈ្លានពានអ៊ុយក្រែនកាលពីឆ្នាំមុន។ កាលពីខែកុម្ភៈរដ្ឋាភិបាលក្រុងមូស្គូបានដកខ្លួនចេញពីសន្ធិសញ្ញាកាត់បន្ថយអាវុធនុយក្លេអ៊ែរ New START ជាមួយរដ្ឋាភិបាលក្រុងវ៉ាស៊ីនតោន។
ថ្លែងនៅក្នុងព្រឹត្តិការណ៍មួយ ដែលមានចំណងជើងថា “ពិភពលោកដែលគ្មានសន្ធិសញ្ញា START៖ តើមានអ្វីកើតឡើងបន្ទាប់ទៀត” លោករីយ៉ាបកូវបាននិយាយថា “គ្មានសំណួរ”អំពីរុស្ស៊ីស្ដារឡើងវិញនូវសន្ធិសញ្ញានាពេលនេះទេ ដោយបានរិះគន់អ្វីដែលលោកហៅថា “ផ្លូវអរិភាព” របស់រដ្ឋាភិបាលក្រុងវ៉ាស៊ីនតោនចំពោះរដ្ឋាភិបាលក្រុងមូស្គូ។
ទីភ្នាក់ងារសារព័ត៌មាន Interfax បានដកស្រង់សម្តីលោកដោយនិយាយថា “ខ្ញុំមិនចង់ពិភាក្សាអំពីថាតើលទ្ធភាពនៃជម្លោះនុយក្លេអ៊ែរមានកម្រិតខ្ពស់នៅថ្ងៃនេះទេប៉ុន្តែវាខ្ពស់ជាងអ្វីដែលយើងធ្លាប់មានសម្រាប់ប៉ុន្មានទសវត្សរ៍កន្លងមកនេះ សូមនិយាយបែបហ្នឹងទៅចុះ”។
លោករីយ៉ាបកូវបាននិយាយថា រុស្ស៊ីបានប្តេជ្ញាចិត្តរក្សាពិភពលោកឱ្យ “មានសុវត្ថិភាពនិងសេរីភាព” ពីការគំរាមកំហែងនៃសង្គ្រាមនុយក្លេអ៊ែរ ប៉ុន្តែបានបន្ថែមថា អ្វីៗមិនអាចបន្តដូចធម្មតាបានទេ ដោយសារតែរដ្ឋាភិបាលក្រុងមូស្គូឥឡូវនេះ “បានស្ថិតក្នុងស្ថានភាពជាក់ស្តែងនៃជម្លោះបើកចំហជាមួយសហរដ្ឋអាម៉េរិក”៕
រដ្ឋាភិបាលក្រុងមូស្គូកំពុងស្ថិតក្នុងជម្លោះបើកចំហ “តាមការជាក់ស្តែង” ជាមួយរដ្ឋាភិបាលក្រុងវ៉ាស៊ីនតោនជុំវិញសង្គ្រាមនៅអ៊ុយក្រែន
