Views: 12
ប្រែសម្រួលៈបំណង(ដេល្លីម៉េល)៖ រុស្ស៊ីកាលពីថ្ងៃសុក្រទី៣០កញ្ញាបានបោះឆ្នោតវ៉េតូប្រឆាំងនឹងសេចក្តីសំរេចចិត្តមួយរបស់ក្រុមប្រឹក្សាសន្តិសុខអង្គការសហប្រជាជាតិចេញដោយអាម៉េរិកនិងអាល់បាលីដែលថ្កោលទោសការកាត់យកទឹកដីអ៊ុយក្រែនមួយផ្នែកទៅជាចំណែកមួយរបស់រុស្ស៊ី នៅពេលដៃគូយុទ្ធសាស្ត្ររបស់រដ្ឋាភិបាលទីក្រុងមូស្គូគឺចិន បានបោះអនុប្បវាទ។
មុននេះ ប្រធានាធិបតីរុស្ស៊ីលោក វ្ល៉ាឌីមៀ ពូទីន បានប្រកាសការគ្រប់គ្រងលើតំបន់បួនដែលស្មើនឹងទឹកដីអ៊ុយក្រែន១៥ភាគរយ ក្នុងការធ្វើឧបសម្ពន្ធ(បន្ថែមបញ្ចូលទឹកដី)ធំបំផុតនៅអឺរ៉ុបចាប់តាំងពីសង្គ្រាមលើកលើកទីពីរមក។ចំណាត់ការនេះបង្កការប្រឆាំងជំទាស់ដាច់ខាតពីបណ្តាប្រទេសលោកខាងលិចនិងសូម្បីតែសម្ពន្ធមិត្តជិតដិតខ្លះរបស់រដ្ឋាភិបាលទីក្រុងមូស្គូ។
ឯកអគ្គរដ្ឋទូតអាម៉េរិកប្រចាំអង្គការសហប្រជាជាតិ លីនដា ថូម៉ាស-ហ្គ្រីនហ្វៀលដ៍(Linda Thomas-Greenfield)បានដាក់ចេញសេចក្តីសំរេចចិត្តនេះដែលអំពាវនាវអោយរដ្ឋជាសមាជិកកុំទទួលស្គាល់ឋានៈផ្លាស់ប្តូររបស់ប្រទេសអ៊ុយក្រែន និងតំរូវអោយរុស្ស៊ីដកទាហានរបស់ខ្លួនចេញពីអ៊ុយក្រែន។
ប្រទេសចំនួនដប់ក្នុងក្រុមប្រឹក្សាបានបោះឆ្នោតគាំទ្រវា នៅពេលចិន ហ្កាបុង ឥណ្ឌានិងប្រេស៊ីលបោះអនុប្បវាទ។
ក្រោយកិច្ចប្រជុំ លោកស្រី ថូម៉ាស-ហ្គ្រីនហ្វៀលដ៍ បានប្រាប់អ្នកយកព័ត៌មានថា« មិនមានប្រទេសណាមួយ សូម្បីតែមួយគាំទ្ររុស្ស៊ី ។ច្បាស់ណាស់មិនមានអ្នកការពាររុស្ស៊ីទេ។សហរដ្ឋអាម៉េរិកនឹងងាកទៅរកមហាសន្និបាតអង្គការសហប្រជាជាតិដែលមានសមាជិក១៩៣ប្រទេសដើម្បីថ្កោលទោសអំពើរបស់រុស្ស៊ី»។
ឯកអគ្គរដ្ឋទូតរុស្ស៊ីប្រចាំអង្គការសហប្រជាជាតិលោក វ៉ាសស៊ីលី ណេបេនហ្សៀ(Vassily Nebenzia) ដែលបានលើកដៃតែឯងប្រឆាំងសេចក្តីសំរេចចិត្តបាននិយាយថាតំបន់ដែលរុស្ស៊ីចាប់យកដោយកំលាំង បានជ្រើសយកការនៅជាមួយនិងក្លាយជាផ្នែករបស់រុស្ស៊ីក្នុងការបោះប្រជាមតិកាលពីសប្តាហ៍មុន។«មិនបានការថយក្រោយទេទោះជាសេចក្តីសំរេចចិត្តនៅថ្ងៃនេះព្យាយាមប្រឆាំង»។
ចិនបានបោះអនុប្បវាទ បានន័យថានៅកណ្តាលចំពោះសេចក្តីសំរេចចិត្តនេះ តែបានសម្តែងការព្រួយបារម្ភអំពី«វិបត្តិអូសបន្លាយនិងកាន់តែរីកធំ»។
ឯកអគ្គរដ្ឋទូតចិនប្រចាំអង្គការសហប្រជាជាតិលោក ចាង ជុន(Zhang Jun)បាននិយាយថា នៅពេល«អធិបតេយ្យភាពនិងបូរណភាពទឹកដីរបស់គ្រប់ប្រទេសគួរត្រូវការពារ ការព្រួយបារម្ភអំពីសន្តិសុខស្របច្បាប់»របស់ប្រទេសនានាក៏គួរតែយកចិត្តទុកដាក់ខ្លាំងក្លាផងដែរ៕
ពូទីន និងមេដឹកនាំផ្តាច់ខ្លួនទាំងបួនអបអរការកាត់តំបន់ទាំងបួនរបស់គេទៅជាផ្នែកមួយរបស់រុស្ស៊ីនិងពិធីធំមួយនៅក្រុងមូស្គូកាលពីថ្ងៃ៣០កញ្ញា
ប្រជាជនរុស្ស៊ីអបអរព្រឹត្តិការណ៍ជាប្រវត្តិសាស្ត្រមួយទៀតដែលលោកខាងលិចថ្កោលទោសនិងមិនទទួលស្គាល់