Views: 4
ប្រែសម្រួល : កញ្ញាដាលីស (ដេល្លីម៉េល) ៖ មីស៊ីលរបស់រុស្ស៊ីកាលពីថ្ងៃសុក្របានវាយប្រហារគ្លីនិកវេជ្ជសាស្ត្រមួយនៅកណ្តាលទីក្រុងឌីនីប្រូ (Dnipro) របស់អ៊ុយក្រែន ដោយសម្លាប់មនុស្សយ៉ាងហោចពីរនាក់ ខណៈរុស្ស៊ីស្តីបន្ទោសរដ្ឋាភិបាលក្រុងគៀវចំពោះការវាយប្រហាររាប់សិបលើកលើតំបន់បែលហ្គោរ៉ូដ (Belgorod) ភាគខាងត្បូងរបស់ខ្លួន។
នៅទីក្រុងមូស្គូ រដ្ឋមន្ត្រីការបរទេសរុស្ស៊ីលោក សឺហ្គេ ឡាវរ៉ូវ (Sergei Lavrov) បានពិភាក្សាអំពីជម្លោះអ៊ុយក្រែនជាមួយបេសកជនពិសេសរបស់ចិន លោក លី ហ៊ុយ (Li Hui)ដោយស្តីបន្ទោសអ៊ុយក្រែននិងបណ្តាប្រទេសលោកខាងលិចថាបានបង្កើត “ឧបសគ្គយ៉ាងធ្ងន់ធ្ងរ” ដល់ការបន្តកិច្ចចរចាសន្តិភាព។
នៅទីក្រុងបែលហ្គោរ៉ូដភាគខាងត្បូងប្រទេសរុស្ស៊ី អភិបាលក្រុងបាននិយាយថា យោធាអ៊ុយក្រែនទទួលខុសត្រូវចំពោះការវាយប្រហារដោយកាំភ្លើងធំ កាំភ្លើងត្បាល់និងដ្រូនរាប់សិបលើកនៅទូទាំងតំបន់ទីក្រុងនេះ ប៉ុន្តែរាយការណ៍ថាមិនមានអ្នករងរបួសទេ។
ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី បានបង្ហោះវីដេអូផ្សែងហុយចេញពីអគារគ្មានដំបូលមួយដែលបង្អួចបានផ្ទុះបែកខ្ទេច បន្ទាប់ពីការវាយប្រហារដែលអាជ្ញាធរនិយាយថាបានបណ្តាលឱ្យមនុស្ស៣០នាក់រងរបួស ក្នុងនោះមានក្មេងប្រុសពីរនាក់ ដែលមានអាយុពី ៣ ទៅ ៦ឆ្នាំ។
ប្រមុខរដ្ឋបាលយោធាក្នុងតំបន់ លោក សឺហ្គី លីសាក់ (Sergiy Lysak) បាននិយាយថា រុស្ស៊ីបានវាយប្រហារតំបន់លំនៅដ្ឋានមួយដែលមានគ្លីនិកពេទ្យនិងពេទ្យសត្វ និងប្លុកអគារខ្ពស់ៗ។
លោកហ្សេលេនស្គីបាននិយាយថា តាមរយៈការវាយលុកមន្ទីរពេទ្យស៊ីវិល “ភេរវកររុស្ស៊ីជាថ្មីម្តងទៀតបានបញ្ជាក់ពីឋានៈរបស់ពួកគេជាអ្នកប្រយុទ្ធប្រឆាំងនឹងអ្វីៗទាំងអស់ រាប់ទាំងមនុស្សនិងសត្វ”។
ព្រឹទ្ធសមាជិកអាម៉េរិកលោក លីនសី ហ្គ្រាហាម (Lindsey Graham) ក្នុងដំណើរទស្សនកិច្ចលើកទីបីរបស់គាត់ទៅកាន់អ៊ុយក្រែន បានថ្កោលទោសការវាយប្រហារនេះថាជាឧក្រិដ្ឋកម្មសង្គ្រាម។
លោកបាននិយាយថា “ថ្ងៃនេះមានការបំផ្ទុះមន្ទីរពេទ្យ។ មន្ទីរពេទ្យជាង ៥០០ ត្រូវបានវាយប្រហារដោយរុស្ស៊ី។ ឧក្រិដ្ឋកម្មសង្គ្រាមត្រូវបានប្រព្រឹត្តខណៈខ្ញុំស្ថិតនៅទីនេះ គ្រាន់តែជាឧក្រិដ្ឋកម្មសង្គ្រាមមួយក្នុងចំណោមឧក្រិដ្ឋកម្មសង្គ្រាមជាច្រើនប៉ុណ្ណោះ”។
ក្រសួងការពារជាតិរុស្ស៊ីបាននិយាយថា ការវាយប្រហាររបស់ខ្លួនលើអ៊ុយក្រែនបានកំណត់គោលដៅលើឃ្លាំងអាវុធ ហើយគោលដៅដែលបានកំណត់ទាំងអស់ត្រូវបានវាយប្រហារ។
អ្នកកាសែតអ៊ុយក្រែនបានបង្ហោះវីដេអូអ្នកជួយសង្គ្រោះកំពុងជួយមនុស្សប្រឡាក់ឈាមពេញមុខ ដែលរួចជីវិតពីគ្លីនីក តាមច្រករបៀងដែលពោរពេញដោយកម្ទេចថ្ម។
ការវាយប្រហារនេះបានកើតឡើងបន្ទាប់ពីកងកម្លាំងរុស្ស៊ីកាលពីដើមសប្តាហ៍នេះបានកំណត់គោលដៅទៅលើទីក្រុងឌីនីប្រូ ក្នុងការវាយប្រហារនាពេលរាត្រីជាមួយនឹងមីស៊ីល ១៦ គ្រាប់ និងដ្រូនវាយប្រហារចំនួន ២០ គ្រឿង។
មជ្ឈមណ្ឌលឧស្សាហកម្មដែលមានប្រជាជនជិតមួយលាននាក់មុនសង្គ្រាមនេះគឺស្ថិតនៅចម្ងាយប្រហែល ១២៥ គីឡូម៉ែត្រពីសមរភូមិជួរមុខបច្ចុប្បន្ន៕
ផ្សែងហុយពីមន្ទីរពេទ្យមួយនៅទីក្រុងឌីនីប្រូ ក្រោយរុស្ស៊ីវាយប្រហារ
ភាគខាងត្បូងប្រទេសរុស្ស៊ីរងការវាយប្រហារកាត់ព្រំដែនដោយកាំភ្លើងធំ កាំភ្លើងត្បាល់ និងដ្រូនរាប់សិបលើក
