Views: 1
ប្រែសម្រួល : កញ្ញាដាលីស (ដេល្លីម៉េល) ៖ សមាគមបាល់ទាត់អង់គ្លេស (FA) នឹងចាប់ផ្តើមការស៊ើបអង្កេតរបស់ខ្លួនលើអាកប្បកិរិយារបស់គ្រីស្ទាណូ រ៉ូណាល់ដូ នៅទឹកដី Everton កាលពីរដូវកាលមុន បន្ទាប់ពីខ្សែប្រយុទ្ធរូបនេះត្រូវបានប៉ូលិសព្រមានសម្រាប់ការគោះទូរស័ព្ទខ្ទាតចេញពីដៃអ្នកគាំទ្រនៅឯកីឡដ្ឋាន Goodison Park ។
កីឡាករវ័យ ៣៧ ឆ្នាំរូបនេះត្រូវបានប៉ូលិសនៅមឺសីសាយ (Merseyside) សួរនាំទាក់ទងនឹងការចោទប្រកាន់ពីបទវាយដំនិងបង្កការខូចខាតមានស្ថានទោសព្រហ្មទណ្ឌបន្ទាប់ពីឧបទ្ទវហេតុកាលពីថ្ងៃទី ៩ ខែមេសា នៅពេលដែលវីដេអូមួយបង្ហាញកីឡាករអន្តរជាតិព័រទុយហ្គាល់រូបនេះហាក់គោះទូរស័ព្ទចេញពីដៃអ្នកគាំទ្រធ្លាក់ដល់ដី ខណៈរ៉ូណាល់ដូដើរឆ្ពោះទៅផ្លូវរូងក្រោមដី បន្ទាប់ពី United ចាញ់ ១-០។
ខណៈការស៊ើបអង្កេតរបស់ប៉ូលិសបានបញ្ចប់ជាមួយនឹងការចេញការព្រមាន ទីភ្នាក់ងារសារព័ត៌មាន PAបានដឹងថា ឥឡូវនេះ FA នឹងបើកករណីរបស់ខ្លួនឡើងវិញប្រឆាំងនឹងរ៉ូណាល់ដូនិងស្វែងរកការសង្កេតលើកីឡាកររូបនេះ។
សេចក្តីថ្លែងការណ៍របស់ប៉ូលិសមឺសីសាយបាននិយាយថា “យើងអាចបញ្ជាក់បានថា បុរសអាយុ ៣៧ ឆ្នាំម្នាក់បានស្ម័គ្រចិត្តចូលរួមនិងត្រូវបានសម្ភាសន៍ក្រោមការព្រមានទាក់ទងនឹងការចោទប្រកាន់ពីបទបំពារបំពាននិងបង្កការខូចខាតមានស្ថានទោសព្រហ្មទណ្ឌ”។
“ការចោទប្រកាន់នេះគឺទាក់ទងនឹងឧបទ្ទវហេតុមួយបន្ទាប់ពីការប្រកួតបាល់ទាត់រវាង Everton និង Manchester United នៅកីឡដ្ឋាន Goodison Park កាលពីថ្ងៃសៅរ៍ទី ៩ ខែមេសា។ បញ្ហាត្រូវបានដោះស្រាយដោយការព្រមានជាប់លក្ខខណ្ឌ។ ឥឡូវនេះរឿងបានបញ្ចប់ហើយ”។
ក្រោយកើតហេតុ រ៉ូណាល់ដូបានចេញសារសុំទោសតាមបណ្តាញសង្គមសម្រាប់ “ការផ្ទុះកំហឹង” របស់គាត់ ហើយបានអញ្ជើញអ្នកគាំទ្រឱ្យមើលការប្រកួតនៅ Old Trafford”ជាសញ្ញានៃការលេងដោយយុត្តិធម៌និងភាពជាអ្នកកីឡា”៕
FA នឹងចាប់ផ្តើមការស៊ើបអង្កេតលើគ្រីស្ទាណូ រ៉ូណាល់ដូ ឆាប់ៗ