ពិតជាគួរឲ្យសោកស្ដាយ និងមានការព្រួយបារម្ភខ្លាំងណាស់ចំពោះការប្រើប្រាស់អក្សរខ្មែរនៅក្នុងស្ថាប័នកំពូលរបស់រដ្ឋ មានការខុសឆ្គងក្រោមរូបភាព « ស្តង់ដារពីរខុសគ្នា » ឬមិនឯកភាពគ្នា នៅពេលមន្ដ្រីរាជការក្រោមឱវាទតាក់តែងអនុក្រឹត្យដោយសរសេរអក្សរខ្មែរខុសឆ្គងអក្ខរាវិរុទ្ធ ជូននាយករដ្ឋមន្ដ្រី ដែលជាប្រមុខរាជរដ្ឋាភិបាល ចុះហត្ថលេខានៅលើអនុក្រឹត្យជាផ្លូវការទាំងខុសឆ្គង និងក្លាយជាគំរូអាក្រក់ ។
ព័ស្ដុតាងជាក់ស្ដែងបានបង្ហាញ ដូចតទៅ ៖
១-អនុក្រឹត្យលេខ ១១៥៦អនក្រ.តត ចុះថ្ងៃទី១២ ខែតុលា ឆ្នាំ២០១៧ ស្ដីពីការដំឡើងឋានន្តរស័ក្ដិ ថ្នាក់វរសេនីយ៍ឯក ជូនលោកវរសេនីយ៍ទោ ក្រិន សមាធិបញ្ញា នាយនគរបាលជាន់ខ្ពស់ ក្របខ័ណ្ឌមន្ដ្រីនគរបាលជាតិកម្ពុជា នៃក្រសួងមហាផ្ទៃ អត្តលេខ ២៥៨៣៦ គឺបានសរសេរអក្សរថា « តម្លើង » ខណៈអនុក្រឹត្យលេខ ១១៥៧អនក្រ.តត ចុះថ្ងៃទី១២ ខែតុលា ឆ្នាំ២០១៧ ស្ដីពីការដំឡើងឋានន្តរស័ក្ដិ វរសេនីយ៍ឯក ជូនលោកវរសេនីយ៍ទោ រស់ ឌីណែត នាយនគរបាលជាន់ខ្ពស់ ក្របខ័ណ្ឌមន្ដ្រីនគរបាលជាតិកម្ពុជា នៃក្រសួងមហាផ្ទៃ អត្តលេខ ៧៣៥៣៣ គឺបានសរសេរអក្សរថា « ដំឡើង » ។
២-អនុក្រឹត្យលេខ ៣៣៩អនក្រ.តត ចុះថ្ងៃទី២២ ខែមីនា ឆ្នាំ២០១៧ ស្ដីពីការបញ្ចប់មុខតំណែងលោកស្រី ប៉ោ ចិន្ថា ពីសមាជិកក្រុមលេខាសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រី នៃព្រះរាជាណាចក្រកម្ពុជា គឺបានសរសេរអក្សរថា « មុខដំណែង » ខណៈអនុក្រឹត្យលេខ ១៣០អនក្រ.តត ចុះថ្ងៃទី០៧ ខែកុម្ភៈ ឆ្នាំ២០១៨ ស្ដីពីការផ្ទេរ និងតែងតាំងមុខតំណែងលោកឧត្តមសេនីយ៍ទោ ផេង ធី អត្តលេខ ១២៣១៣ ពីអនុប្រធាននាយកដ្ឋាននគរបាលការពារព្រំដែនគោក ទៅជាអនុប្រធាននាយកដ្ឋានកណ្ដាលនគរបាលព្រំដែន គឺបានសរសេរអក្សរថា « មុខតំណែង » ។
ស្មារតីព្រះរាជក្រឹត្យលេខ នស/រកត/០៨១៧/៦៤១ ចុះថ្ងៃទី២៨ ខែសីហា ឆ្នាំ២០១៧ គឺត្រូវបានផ្ទេរក្រុមប្រឹក្សាជាតិភាសាខ្មែរ សរសេរកាត់ថា « ក.ជ.ភ.ខ » ឲ្យស្ថិតនៅក្រោមសមត្ថកិច្ច និងការទទួលខុសត្រូវរបស់រាជបណ្ឌិត្យសភាកម្ពុជា ខណៈរាជបណ្ឌិត្យសភាកម្ពុជា បច្ចុប្បន្ន មានឯកឧត្តមបណ្ឌិតសភាចារ្យ សុខ ទូច ជាប្រធាន និងក្រុមប្រឹក្សាជាតិភាសាខ្មែរ បច្ចុប្បន្ន មានឯកឧត្តមបណ្ឌិត ហ៊ាន សុខុម ជាប្រធាន ។
មាត្រា១២ នៃស្មារតីអនុក្រឹត្យលេខ ១៤៦អនក្រ.បក ចុះថ្ងៃទី៣១ ខែសីហា ឆ្នាំ២០១៧ ស្ដីពីការរៀបចំ និងការប្រព្រឹត្តទៅ នៃក្រុមប្រឹក្សាជាតិភាសាខ្មែរ គឺបានតម្រូវឲ្យ ក.ជ.ភ.ខ ត្រូវប្រើវចនានុក្រមខ្មែរ រៀបរៀងដោយសម្ដេចព្រះសង្ឃរាជ ជួន ណាត ដែលបានបោះពុម្ពផ្សាយដោយវិទ្យាស្ថានពុទ្ធសាសនបណ្ឌិត្យ គ្រាទី៥ ឆ្នាំ១៩៦៧ ជាគោល ។
ដូច្នេះ អនុលោមតាមវចនានុក្រមខ្មែរ រៀបរៀងដោយសម្ដេចព្រះសង្ឃរាជ ជួន ណាត គឺការសរសេរអក្សរខ្មែរថា « មុខដំណែង » និង « តម្លើង » នៅក្នុងអនុក្រឹត្យរបស់រាជរដ្ឋាភិបាលកម្ពុជា នោះ មិនត្រឹមត្រូវតាមអក្ខរាវិរុទ្ធ ឡើយ ៕