Views: 1
ប្រែសម្រួល : កញ្ញាដាលីស (ស្ត្រេតថែមស៍) ៖ សាកសពទាហានឥណ្ឌាម្នាក់ ដែលបានបាត់ខ្លួនកាលពី ៣៨ ឆ្នាំមុននៅលើផ្ទាំងទឹកកកមួយនៅព្រំដែនជម្លោះជាមួយប៉ាគីស្ថាន ត្រូវបានរកឃើញ។
អង្គភាពមួយនៃកងទ័ពឥណ្ឌាបានបង្ហោះរូបភាពមឈូសរបស់លោក ឆានដឺ សេខា (Chander Shekhar) រុំដោយទង់ជាតិឥណ្ឌានៅព្រឹកថ្ងៃពុធ ទី១៧ សីហា ពីរថ្ងៃបន្ទាប់ពីឥណ្ឌាប្រារព្ធខួបលើកទី ៧៥ នៃឯករាជ្យរបស់ខ្លួន។
កងទ័ពបាននិយាយថា លោកសេខាត្រូវបានដាក់បញ្ជូនសម្រាប់ប្រតិបត្តិការមេកឌូត (Meghdoot) ក្នុងឆ្នាំ ១៩៨៤នៅពេលដែលឥណ្ឌានិងប៉ាគីស្ថានប្រយុទ្ធគ្នារយៈពេលខ្លីដើម្បីអះអាងការគ្រប់គ្រងលើផ្ទាំងទឹកកកសៀចិន (Siachen) ដែលគេស្គាល់ថាជាសមរភូមិខ្ពស់បំផុតរបស់ពិភពលោក។
នៅកម្ពស់ ៥.៤៨៦ ម៉ែត្រជាមួយនឹងសីតុណ្ហភាពដែលអាចធ្លាក់ចុះដល់ដក ៥០ អង្សាសេ(-50C) ផ្ទាំងទឹកកកសៀចិនគឺជាទីតាំងឈរជើងរបស់យោធាដ៏លំបាកបំផុតមួយនៅក្នុងពិភពលោក។
ប្រព័ន្ធផ្សព្វផ្សាយក្នុងស្រុកបានរាយការណ៍ថា លោកសេខាគឺជាផ្នែកមួយនៃក្រុមដែលមានសមាជិក ២០ នាក់ ដែលបានជាប់នៅក្នុងព្យុះទឹកកកអំឡុងពេលដើរល្បាត។ របាយការណ៍បាននិយាយថា សាកសព ១៥ នាក់ត្រូវបានរកឃើញនៅពេលនោះ ប៉ុន្តែប្រាំនាក់ផ្សេងទៀតមិនអាចរកឃើញទេ ក្នុងនោះក៏មានលោកសេខាផងដែរ។
ពិធីបុណ្យសពចុងក្រោយរបស់គាត់ឥឡូវនេះនឹងត្រូវបានធ្វើឡើងជាមួយនឹងកិត្តិយសយោធាពេញលេញនៅក្នុងរដ្ឋអ៊ូតថារ៉ាខាន់ (Uttarakhand) ជាកន្លែងដែលគ្រួសាររបស់គាត់រស់នៅ៕
ពិធីបុណ្យសពចុងក្រោយរបស់លោកសេខានឹងត្រូវបានធ្វើឡើងជាមួយនឹងកិត្តិយសយោធាពេញលេញនៅក្នុងរដ្ឋអ៊ូតថារ៉ាខាន់
