រូបភាពសម្ញែងសាច់ដុំខាងយោធារបស់ចិន ទៅលើកោះតៃវ៉ាន់ បានជំរុញឲ្យបណ្តាប្រទេសសម្ព័ន្ធមិត្តសហរដ្ឋអាមេរិក ស្ថិតនៅក្បែរដែនតំបន់សមុទ្រចិនខាងកើត និងខាងត្បូង ជាអាទិ៍ ប្រទេសអូស្ត្រាលី ឥណ្ឌូនេស៊ី ជប៉ុន កូរ៉េខាងត្បូង សិង្ហបុរី និងតៃវ៉ាន់…។ល។ ធ្វើការបញ្ជាទិញសព្វាវុធបន្ថែមពីសហរដ្ឋអាមេរិក នៅក្នុងឆ្នាំ២០២២នេះ ហើយក៏ទទួលបានការអនុញ្ញាតយល់ព្រមលក់សព្វាវុធពីសំណាក់សហរដ្ឋអាមេរិក ជាហូរហែផងដែរ ក្នុងគោលបំណងការពារ ពង្រឹងសន្តិសុខវិស័យការពារជាតិរបស់ប្រទេសរៀងៗខ្លួន ។
យោងតាម Defense Security Cooperation Agency បានផ្សព្វផ្សាយយដឹងថា ចាប់ ពីខែមករា មកដល់ដើមខែសីហា ឆ្នាំ២០២២នេះ សហរដ្ឋអាមេរិក បានយល់ព្រមលក់សព្វាវុធបន្ថែមទៅឲ្យប្រទេសអូស្ត្រាលី ឥណ្ឌូនេស៊ី ជប៉ុន កូរ៉េខាងត្បូង សិង្ហបុរី និងតៃវ៉ាន់ មានទំហំទឹកប្រាក់ប្រមាណជាង ១៦,១៥៤ ប៊ីលានដុល្លារអាមេរិក ដែលក្នុងនោះរួមមាន ៖
១-ប្រទេសឥណ្ឌូនេស៊ី ៖ យន្តហោះចម្បាំងធុន F-15ID ចំនួន៣៦គ្រឿង មានទំហំទឹកប្រាក់ប្រមាណ ១៣,៩ ប៊ីលានដុល្លារអាមេរិក ។
២-ប្រទេសអូស្ត្រាលី ៖ មីស៊ីលវាយប្រហារពីលើអាកាសមកផ្ទៃដី ធុន AGM ចំនួន៨០ដើម មានទំហំទឹកប្រាក់ប្រមាណ ៨៧៨លានដុល្លារអាមេរិក ។
៣-ប្រទេសសិង្ហបុរី ៖ យន្តហោះចម្បាំងធុន F-13SG រួមជាមួយនឹងគ្រាប់បែកធុន MK-82 មានទំហំទឹកប្រាក់ប្រមាណ ៦៣០លានដុល្លារអាមេរិក ។
៤-កោះតៃវ៉ាន់ ៖ រថក្រោះ និងរថពាសដែកប្រយុទ្ធ រួមទាំងបរិក្ខារយោធាផ្សេងទៀត មានទំហំទឹកប្រាក់ប្រមាណ ៤២៣លានដុល្លារអាមេរិក ។
៥-ប្រទេសជប៉ុន ៖ មីស៊ីល វាយប្រហារនៅលើអាកាសធុន AIM-120 AMRAAM ចំនួនជាង១០០ដើម សម្រាប់បំពាក់ជាមួយយន្តហោះចម្បាំងបំបាំងកាយធុន F-35 មានទំហំទឹកប្រាក់ប្រមាណ ២៩៣លានដុល្លារអាមេរិក ។
៦-ប្រទេសកូរ៉េខាងត្បូង ៖ មីស៊ីលប្រដេញលើផ្ទៃទឹកប្រឆាំងនឹងនាវាមុជទឹក និងប្រឆាំងនឹងនាវាចម្បាំង ធុន MK 54 LightWeight Torpedo ចំនួន៣១ដើម សម្រាប់បំពាក់ជាមួយនឹងឧទ្ធម្ភាគចក្រ មានទំហំទឹកប្រាក់ប្រមាណជាង ១៣០លានដុល្លារអាមេរិក ។
លើសពីនេះ ក្រៅពីការសម្ញែងសាច់ដុំយោធារបស់ចិន ទៅលើកោះតៃវ៉ាន់ គឺរួមទាំងសកម្មភាពឈ្លានពានរបស់ប្រទេសរុស្ស៊ី ទៅលើប្រទេសអ៊ុយក្រែន ក៏បានជំរុញឲ្យសហរដ្ឋអាមេរិក យល់ព្រមលក់សព្វាវុធចំនួន ៤៩ករណី គិតចាប់ពីខែមករា រហូតមកដល់ដើមខែសីហា ឆ្នាំ២០២២ ដែលមានទំហំទឹកប្រាក់សរុបប្រមាណជាង ៨១ប៊ីលានដុល្លារអាមេរិក ៕