Views: 3
ប្រែសម្រួលៈបំណង(ស្ត្រេតថែមស៍)៖ ប្រធានាធិបតីចិន លោកស៊ី ជីនភីង បានបន្ទោសការតវ៉ាប្រឆាំងនៅក្នុងទីក្រុងចិនមួយចំនួនកាលពីចុងសប្តាហ៍ទៅលើពួកយុវជនដែលធុញទ្រាន់មួម៉ៅនឹងការឹតបន្តឹងវិធានការប្រឆាំងកូវីដ១៩ដែលរហូតដល់ពេលនេះមានរយៈពេលបីឆ្នាំ តែបានបញ្ជាក់ប្រាប់ប្រតិភូអឺរ៉ុបថា វីរុសអូមីក្រុងស្លូតៗដែលកំពុងចម្លងរាតត្បាតនៅក្នុងប្រទេសចិននាពេលឥឡូវបើកផ្លូវអោយអាជ្ញាធរបន្ធូរបន្ថយការរឹតបន្តឹង។
ពួកមន្ត្រីសហភាពអឺរ៉ុបដែលសុំមិនបញ្ចេញឈ្មោះបានរំលឹកចំណុចសំខាន់ៗនៃដំណើរទស្សនកិច្ចរបស់ប្រធានសហភាពអឺរ៉ុប(EU)លោក ឆាល មីសែល ទៅកាន់ទីក្រុងប៉េកាំងដែលបានជួបពិភាក្សាជាមួយលោកស៊ី កាលពីថ្ងៃព្រហស្បតិ៍។
បើតាមមន្ត្រីអឺរ៉ុបដែលបានស្ថិតក្នុងក្រុមប្រតិភូ ការដោះស្រាយជំងឺឆ្លងកូវីដ១៩និងការប្រឆាំងតវ៉ាទៅនឹងវិធានការគ្រប់គ្រងជំងឺនៅប៉ុន្មានថ្ងៃមុននៅជាង២០ទីក្រុងចិន ស្ថិតចំណោមប្រធានបទដែលត្រូវបានលើកមកពិភាក្សា ។
មន្ត្រីជាន់ខ្ពស់អឺរ៉ុបម្នាក់បាននិយាយថាចម្លើយតបដែលយើងបានទទួលពីប្រធានាធិបតីគឺថា «ដោយសារតែការកើតមានជំងឺឆ្លងអស់បីឆ្នាំ ប្រជាជនធុញទ្រាន់ ជាពិសេសក្នុងចំណោមក្រុមនិស្សិតនិងពួកយុវជន។ខ្ញុំគិតថាមានផ្លូវចេញមួយ….»។
បើតាមលោកស៊ី កូវីដ១៩នៅចិនឥឡូវបង្កឡើងដោយវីរុសអូមីក្រុង ។វីរុសដែលតាដែលសម្លាប់មនុស្សខ្លាំងជាងបានមានពីមុនរីឯអូមីក្រុងឥឡូវស្លូតជាង។ប្រការនេះបើកផ្លូវអោយមានការបើកចំហធំឡើងជាមួយនឹងការបន្ធូរបន្ថយការរឹតបន្តឹង ជាអ្វីដែលយើងកំពុងឃើញនៅតំបន់មួយចំនួនក្នុងប្រទេសចិន»។
មន្ត្រីEU បាននិយាយថាលោកមីសែលបានប្រាប់លោកស៊ីថា នៅអឺរ៉ុបពេលផ្ទុះកូវីដដំបូង អាជ្ញាធរផ្តោតលើចត្តាឡីស័កនិងដាក់ខ្លួននៅដាច់ពីគេ ព្រមទាំងការធ្វើតេស្តិ៍រកមេរោគ តែក្រោយមកផ្តោតលើការចាក់វ៉ាក់សាំង។«តាមការយល់ឃើញរបស់ខ្ញុំ ចិនគួរលើកទឹកចិត្តអោយប្រជាជនចាក់វ៉ាក់សាំង…»។
ចិនបានរាយការណ៍ចំនួនឆ្លងកូវីដថ្មី៣៣.០៧៣នាក់សំរាប់ថ្ងៃ០២ធ្នូ ក្រោយឆ្លង៣៤.៩៨០នាក់កាលពីមួយថ្ងៃមុន។ទីក្រុងប៉េកាំងបានមានអ្នកឆ្លងថ្មី៣.៣១៣នាក់ ក្រុងសៀងហៃ២៩១នាក់ ក្រុងក្វាងចូវ៤.៩២២នាក់និងចុងឈីញ ៥.៨៤៥នាក់៕
ប្រធានាធិបតីចិន លោកស៊ី ជីនភីង ជួបពិភាក្សាជាមួយប្រធានEUលោកឆាល មីសែល នៅក្រុងប៉េកាំងកាលពីថ្ងៃព្រហស្បតិ៍
