Views: 13
ដោយៈសុផល/ភ្នំពេញ៖មកដល់ឆ្នាំ២០២២នេះចំនួនអ្នកប្រើប្រាស់កម្ចី មានចំនួន៤.៦៧លាននាក់ក្នុងនោះស្ត្រី ២.៤៨លាននាក់ ស្មើ ៥៣% និងបុរស ២.១៩លាននាក់ ស្មើ ៤៧%។នេះបើតាមរបាយការណ៍របស់ក្រេឌីត ប្យួរ៉ូ ខេមបូឌា (CBC) ។
ក្នុងកម្មវិធីអបអរសាទរខួប១០ឆ្នាំនៃការបង្កើតប្រព័ន្ធចែករំលែកព័ត៌មានឥណទាន ក្នុងព្រះរាជាណាចក្រកម្ពុជាកាលពីពេលថ្មីៗនេះ លោក អឿ សុធារ័ត្ន នាយកប្រតិបត្តិ CBC បានថ្លែងថា ១០ឆ្នាំមកនេះ ស៊ីប៊ីស៊ី បានខិតខំបង្កើតជាថ្នាល ក្នុងការគ្រប់គ្រងទិន្នន័យឥណទាននៅកម្ពុជានិងបានជួយ ដល់ស្ថាប័នហិរញ្ញវត្ថុ ជាសមាជិករបស់ CBC ចំនួន១៨១ស្ថាប័ន ដោយបានចាត់ទុកថា ការលើកកម្ពស់ការយល់ដឹងពីសុខភាពហិរញ្ញវត្ថុរបស់អតិថិជន ជាកត្តាអាទិភាពផងដែរ។
លោកបានបន្ថែមថា៖«របាយការណ៍ឥណទាន បានដើរតួនាទីយ៉ាងសំខាន់ ក្នុងការផ្សារភ្ជាប់គម្លាតព័ត៌មានរវាងអ្នកផ្ដល់កម្ចី និងអ្នកប្រើប្រាស់កម្ចីដើម្បីវាយតម្លៃហានិភ័យឥណទានយ៉ាងឆាប់រហ័ស និងធ្វើការសម្រេចចិត្តលើប្រាក់កម្ចីដែលជាការម្រួលដល់ការទទួលបានហិរញ្ញវត្ថុ»។
លោកស្រី ជា សិរី ប្រធានក្រុមប្រឹក្សាភិបាល CBC បានលើកឡើងថា បច្ចុប្បន្ននេះ CBC កំពុងមានអំរែកយ៉ាងធំ និងធ្ងន់មួយ គឺការបម្រើសេវាហិរញ្ញវត្ថុនៅកម្ពុជាដើម្បីធ្វើយ៉ាងណាឆ្ពោះទៅចាប់យកឌីជីថលរូបីយកម្ម និងការវិភាគទិន្នន័យកម្រិតខ្ពស់។វត្តមានរបស់ CBC រយៈពេល១០ឆ្នាំមកនេះ បានរួមចំណែកជួយឲ្យវិស័យហិរញ្ញវត្ថុនិងទីផ្សារឥណទាន មានការរីកចម្រើនគួរឲ្យកត់សំគាល់ មិនតែប៉ុណ្ណោះបានជួយឲ្យប្រជាជនកម្ពុជា មានលទ្ធភាពទទួលបានឥណទានកាន់តែទូលំទូលាយនិងមានកំណើនជារៀងរាល់ឆ្នាំ។
លោកស្រីបានបញ្ជាក់ថា ក្នុងរយៈពេលដ៏ខ្លី CBC បានពង្រីកខ្លួនជាប្រព័ន្ធចែករំលែកព័ត៌មានទំនើប និងអភិវឌ្ឍន៍ពេញលេញ ក្នុងការចែករំលែកព័ត៌មានឥណទាននិងផ្ដល់សេវាកម្មបន្ថែមជាច្រើន។ បន្ថែមពីនេះ CBC មិនត្រឹមរក្សាទុកប្រវត្តិព័ត៌មានអវិជ្ជមានប៉ុណ្ណោះទេ តែថែមទាំងមានព័ត៌មានវិជ្ជមានជាច្រើនក្នុងគោលបំណងលើកទឹកចិត្ត ការប្រើប្រាស់ឥណទានប្រកបដោយភាពទទួលខុសត្រូវរបស់អ្នកខ្ចី។
លោកស្រីកិត្ដិបណ្ឌិត អ៊ុក ម៉ាលី ទេសាភិបាលរងធនាគារជាតិ នៃកម្ពុជា បានមានប្រសាសន៍ថា៖ធនាគារជាតិនៃកម្ពុជា បានប្រគល់ប័ណ្ណសរសើរ ជូនដល់ស៊ីប៊ីស៊ី សម្រាប់ការចូលរួមចំណែករបស់ខ្លួន ក្នុងការគ្រប់គ្រងហានិភ័យឥណទាន តម្លាភាពទីផ្សារឥណទាន និងបរិយាបន្នហិរញ្ញវត្ថុ។
ស៊ីប៊ីស៊ី បានបង្កើតឡើងនៅថ្ងៃទី១៩ ខែមីនា ឆ្នាំ២០១២ ដែលទទួលបានអាជ្ញាប័ណ្ណ ពីធនាគារជាតិនៃកម្ពុជា ក្នុងគោលបំណងធ្វើឱ្យមានភាពប្រសើរឡើងនូវការវាយតម្លៃហានិភ័យឥណទាន និងធ្វើឱ្យទីផ្សារឥណទានមានតម្លាភាព និងការគ្រប់គ្រងបានយ៉ាងល្អប្រសើរសម្រាប់ស្ថាប័នហិរញ្ញវត្ថុក្នុងប្រទេស។ស៊ីប៊ីស៊ីបាននឹងកំពុងពង្រីកខ្លួន និងបន្ដរីកចម្រើន ក្នុងរយៈពេល មួយទសវត្សចុងក្រោយនេះពីសមាជិកចំនួន ៥១ ក្នុងឆ្នាំ ២០១២ ដល់ ១៨១ ក្នុងឆ្នាំ ២០២២ នេះ។
ក្នុងឱកាសគម្រប់ខួប ១០ឆ្នាំរបស់ខ្លួន ស៊ីប៊ីស៊ី ក៏បានរៀបចំវេទិកាពិភាក្សាស្ដីពី «ហានិភ័យឥណទានក្នុងភាពមិនច្បាស់លាស់និងការរំខានផ្នែកឌីជីថល»។ បណ្តាអ្នកដឹកនាំជាន់ខ្ពស់មកពីឧស្សាហកម្មហិរញ្ញវត្ថុ បានចែករំលែកនូវ ចំណេះដឹងនិងការយល់ឃើញរបស់ពួកគេលើការវិវត្ត និងការសម្របខ្លួននៃទីផ្សារឥណទានចំពេលមានវិបត្តិ និងភាពមិនប្រាកដប្រជា នៃសេដ្ឋកិច្ចតាមរយៈការប្រើបច្ចេកវិទ្យាឈានមុខ។សព្វថ្ងៃនេះ ស៊ីប៊ីស៊ី បានបើកដំណើរការឧបករណ៍វិភាគទិន្នន័យដែជំរុញឱ្យមានប្រព័ន្ធអេកូឡូស៊ី ក្នុងការធ្វើការសម្រេចចិត្ត លើកកម្ពស់ការគ្រប់គ្រងហានិភ័យឥណទានតាមរយៈបច្ចេកវិទ្យានៃអាជីវកម្មឆ្លាតវៃ ការវិភាគទិន្នន័យនិងដំណោះស្រាយការវិភាគព្យាករណ៍ សម្រាប់ការវាយតម្លៃសំណើសុំប្រាក់កម្ចី ការត្រួតពិនិត្យផលប័ត្រ និងការវិភាគយុទ្ធសាស្ត្រ។ បន្ទាប់ពីបានបើកដំណើរការសេវាវិភាគទិន្នន័យជំនាន់ថ្មី(DAR) និង ពិន្ទុ ខេ ស្ករ (K-Score) ក្នុងឆ្នាំ ២០២០ កន្លងទៅ ស៊ីប៊ីស៊ី បានដាក់ឱ្យដំណើរការនូវដំណោះស្រាយផែនទីហានិភ័យឥណទាន ដំបូងបង្អស់នៅកម្ពុជា សម្រាប់សមាជិកទាំងអស់របស់ខ្លួន។
ជាមួយគ្នានេះ ស៊ីប៊ីស៊ី មានការប្តេជ្ញាចិត្តយ៉ាងមុតមាំចំពោះសង្គម និងប្រជាជន។ ក្នុងឱកាសគម្រប់ខួប ១០ឆ្នាំនេះ ស៊ីប៊ីស៊ី បានបើកដំណើរការកម្មវិធីអាហារូបករណ៍ស៊ីប៊ីស៊ី (CBC Scholarship Scheme) ជាកិច្ចសហការលើកដំបូងផ្នែកឧស្សាហកម្ម -វិស័យអប់រំជាមួយសាកលវិទ្យាល័យភូមិន្ទភ្នំពេញ រួមទាំងសាកលវិទ្យាល័យ ភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច ដើម្បីរៀបចំការងារនាពេលអនាគត សម្រាប់និស្សិតដែលបានបញ្ចប់ការសិក្សាផ្នែកវិទ្យាសាស្ដ្រទិន្នន័យ សេដ្ឋកិច្ច និងគ្រប់គ្រង។ លើសពីនេះ កម្មវិធីនវានុវត្ដន៍បុគ្គលិករបស់ ស៊ីប៊ីស៊ី គឺជាវេទិកាបើកចំហ ឱ្យបុគ្គលិករបស់ខ្លួនរួមចំណែកចែករំលែកគំនិត សម្រាប់ការរីកចម្រើន និងការអភិវឌ្ឍន៍របស់
ក្រុមហ៊ុន ដែលបច្ចុប្បន្នកំពុងដំណើរការក្នុងឆ្នាំទីពីរហើយ៕Ph
