Views: 1
ប្រែសម្រួលៈបំណង(ឆាណែលញូវអេសៀ)៖ប៉ូលិសបាននិយាយកាលពីថ្ងៃពុធទី២៨កញ្ញាថា ប៉ូលិសសិង្ហបុរីបានចាប់ខ្លួនបុរសអាយុ៣៧ឆ្នាំម្នាក់ក្នុងយន្តហោះដឹកអ្នកដំណើរមួយនៃក្រុមហ៊ុនអាកាសចរណ៍Singapore Airlinesបន្ទាប់ពីជននេះវាយបុគ្គលិកហោះហើរនិងអះអាងថា រូបគេមានគ្រាប់បែកមួយក្នុងកាបូបយួរ ។
ក្នុងការឆ្លើយតបចំពោះសំណួរអ្នកសារព័ត៌មាន ប៉ូលិសបាននិយាយថាខ្លួនទទួលបានការព្រមាននៅម៉ោងប្រមាណ២និង៤០នាទីរំលងអធ្រាតអំពីការគំរាមបំផ្ទុះគ្រាប់បែកនៅលើយន្តហោះនៃជើងហោះហើរSQ33ពីទីក្រុងសាន់ ហ្វ្រានស៊ីស្កូ មកកាន់សិង្ហបុរី។
ជននេះត្រូវបានបុគ្គលិកបំរើការលើយន្តហោះចាប់ទុកនិងក្រោយមកប្រគល់អោយប៉ូលិសចំពោះការគំរាមភេរវកម្មក្លែងក្លាយនិងសង្ស័យប្រើថ្នាំ។
Singapore Airlinesបាននិយាយថា អ្នកដំណើរគ្មានវិន័យម្នាក់បានវាយសមាជិកអ្នកបើកបរម្នាក់។យន្តហោះបានចុះចតដោយសុវត្ថិភាពនៅម៉ោងប្រមាណ៥និង៥០នាទីព្រឹកថ្ងៃពុធ ក្រោមការអមដំណើរការពារពីសំណាក់យន្តហោះF-16C/D របស់កងទ័ពអាកាសសិង្ហបុរី។បុគ្គលិកទៅពីប៉ូលិសអាកាសយាន ក្រុមអាវុធគីមី ជីវសាស្ត្រនិងវិទ្យុសកម្មរបស់កងទ័ព ព្រមទាំងក្រុមការពារគ្រឿងផ្ទុះបាននៅត្រៀមរង់ចាំជាស្រេច ដើម្បីដោះស្រាយការគំរាមរបស់អ្នកដំណើរ។
យន្តហោះកើតហេតុបន្ទាប់មកត្រូវបានអូសទៅចុងអាកាសយានដើម្បីត្រួតពិនិត្យសន្តិសុខហើយអ្នកដំណើរបង្កហេតុត្រូវបានប្រគល់អោយប៉ូលិស។ក្រោយការត្រួតពិនិត្យចប់សព្វគ្រប់ ប៉ូលិសបានបញ្ជាក់ថាមិនមានគ្រាប់បែកដូចការគំរាមទេ ហើយក្រសួងការពារជាតិបញ្ជាក់ថា វាជាការគំរាមក្លែងក្លាយ៕
យន្តហោះF-16C/D របស់កងទ័ពអាកាសសិង្ហបុរីហោះអមការពារយន្តហោះដឹកអ្នកដំណើរ និងជនល្មើសត្រូវបានបុគ្គលិកយន្តហោះប្រគល់អោយប៉ូលិស
ប៉ូលិសនិងផ្នែកអាវុធជាតិផ្ទុះនៅរង់ចាំយន្តហោះរួចជាស្រេចនៅអាកាសយានដ្ឋានឆាងហ្គី
អ្នកដំណើរអាចចាកចេញនៅម៉ោង៩និង៤០នាទីព្រឹកក្នុងថ្ងៃ២៨កញ្ញាដដែលក្រោយការត្រួតពិនិត្យចប់សព្វគ្រប់