Views: 4
ប្រែសម្រួល : កញ្ញាដាលីស (ដេល្លីម៉េល) ៖ រញ្ជួយដីកម្រិត ៦,៥ រិច្ឆទ័របានវាយប្រហារផ្នែកភាគច្រើននៃប្រទេសប៉ាគីស្ថាននិងអាហ្វហ្គានីស្ថានកាលពីថ្ងៃអង្គារទី២១មីនាដោយនាំឱ្យអ្នកស្រុកដែលភ័យស្លន់ស្លោរត់ចេញពីផ្ទះនិងការិយាល័យ និងបណ្តាលឱ្យមនុស្សម្នាមានការភ័យខ្លាចនៅតាមភូមិដាច់ស្រយាល។ យ៉ាងហោចណាស់មនុស្ស ១១ នាក់បានស្លាប់នៅក្នុងប្រទេសទាំងពីរ។
លោក ប៊ីឡាល់ ហ្វៃហ្ស៊ី (Bilal Faizi) អ្នកនាំពាក្យសេវាសង្គ្រោះបន្ទាន់របស់ប៉ាគីស្ថានបានប្រាប់ទីភ្នាក់ងារសារព័ត៌មានAPថា មនុស្សជាង ១០០នាក់ត្រូវបាននាំយកទៅមន្ទីរពេទ្យនៅតំបន់ជ្រលងស្វាត (Swat) នៃខេត្តឃីបឺប៉ាក់ទុនក្វា (Khyber Pakhtunkhwa) ភាគពាយព្យប្រទេសប៉ាគីស្ថានក្នុងស្ថានភាពតក់ស្លុត។
លោកបានបន្តថា “មនុស្សម្នាដែលរន្ធត់ទាំងនេះបានដួលសន្លប់ ហើយខ្លះទៀតដួលដោយសាររញ្ជួយដី”។ លោកហ្វៃហ្ស៊ីបាននិយាយថា មនុស្សភាគច្រើនត្រូវបានរំសាយចេញពីមន្ទីរពេទ្យអស់ហើយ។
លោកហ្វៃហ្ស៊ីនិងមន្ត្រីផ្សេងទៀតបាននិយាយថា មនុស្សប្រាំបួននាក់បានស្លាប់នៅពេលដំបូលបាក់រលំនៅក្នុងផ្នែកផ្សេងៗនៃភាគពាយព្យប៉ាគីស្ថាន។មនុស្សរាប់សិបនាក់ផ្សេងទៀតបានរងរបួសនៅក្នុងរញ្ជួយដីនេះ ដែលស្ថិតនៅកណ្តាលប្រទេសអាហ្វហ្គានីស្ថាន និងមានរំញ័រដល់ព្រំដែនជាប់ប្រទេសតាជីគីស្ថានផងដែរ។
រញ្ជួយដីបានបង្កឱ្យមានការបាក់ដីនៅតំបន់ភ្នំមួយចំនួន ដែលរំខានដល់ការធ្វើចរាចរណ៍។
លោក តៃមួ ខាន់ (Taimoor Khan) អ្នកនាំពាក្យអាជ្ញាធរគ្រប់គ្រងគ្រោះមហន្តរាយខេត្តនៅភាគពាយព្យនេះ បាននិយាយថា យ៉ាងហោចណាស់ផ្ទះសង់ពីឥដ្ឋចំនួន ១៩ខ្នងបានដួលរលំនៅក្នុងតំបន់ដាច់ស្រយាល។ លោកបាននិយាយថា “យើងកំពុងតែប្រមូលទិន្នន័យអំពីការខូចខាត”។
រញ្ជួយដ៏ខ្លាំងក្លានេះបាននាំឱ្យមនុស្សភាគច្រើនភៀសខ្លួនចេញពីផ្ទះនិងការិយាល័យរបស់ពួកគេនៅក្នុងរដ្ឋធានីអ៊ីស្លាម៉ាបាដរបស់ប៉ាគីស្ថាន ដោយខ្លះសូត្រតាមគម្ពីរកូអាន។ របាយការណ៍ប្រព័ន្ធផ្សព្វផ្សាយបានលើកឡើងថា ស្នាមប្រេះបានលេចឡើងនៅតាមអគារផ្ទះល្វែងមួយចំនួនក្នុងទីក្រុង៕
បុគ្គលិកពេទ្យប៉ាគីស្ថានដឹកអ្នករបួសមកមន្ទីរពេទ្យនៅតំបន់ជ្រលងស្វាត
អ្នកស្រុកដែលភ័យស្លន់ស្លោរត់ចេញពីផ្ទះនិងការិយាល័យ