Views: 5
ដោយ៖តារារិទ្ធ(ភ្នំពេញ)សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជាបានក្រើនរំលឹកដល់កីឡាករ កីឡាការិនី ថា ការឈ្នះចាញ់ពីការប្រ កួតកីឡាគឺជាមេរៀននិងបទពិសោធន៍សម្រាប់កីឡាករ កីឡាការិនីម្នាក់ៗក្នុងការពង្រឹងសមត្ថភាពរបស់ខ្លួនឱ្យកាន់តែប្រសើរដើម្បីលើកកម្ពស់ជំនាញវិជ្ជាជីវៈកីឡាបន្ថែមទៀត ។ សម្តេចតេជោសង្កត់ធ្ងន់ថាផ្ទុយទៅវិញការអាក់អន់ចិត្តឬការបាក់ទឹកចិត្តដោយសារការចាញ់ក្នុងការប្រកួ តអាចធ្វើឱ្យបាត់បង់នូវការតស៊ូនិងការខិតខំប្រឹងប្រែងបន្តដើម្បី យកឈ្នះក្នុងការប្រកួតនៅពេលអនាគត ។
សម្តេចអគ្គមហាសេនាបតីតេជោ ហ៊ុន សែន ថ្លែងក្នុងពិធីបិទព្រឹត្តិការណ៍កីឡាជាតិលើកទី ៣ និងកីឡាជនពិការជាតិលើកទី ១ ឆ្នាំ ២០២២ នៅល្ងាចថ្ងៃទី ៣០ ខែ វិច្ឆិកា ២០២២ ដែលប្រារព្ធធ្វើនៅវិមានពហុកីឡាដ្ឋានជាតិមរតកតេជោ ។
សម្តេចតេជោ ហ៊ុន សែន ថ្លែងថាសម្តេចពិតជាមានមោទនភាពចំពោះការរៀបចំពិធីនិងដំណើរការនៃការប្រកួតដ៏ល្អនេះដែលបានទាក់ទាញអ្នកទស្សនាផ្ទាល់ជាង ៤ ម៉ឺននាក់និងអ្នកទស្សនាតាមប្រព័ន្ធផ្សព្វផ្សាយសង្គមរាប់លាននាក់ផងដែរ ។ឆ្លៀតក្នុងឱកាសនេះសម្តេចតេជោក៏បានកោតសរសើរដល់ថ្នាក់ដឹកនាំនិងគណៈកម្មាធិការរៀបចំការប្រកួត ជាពិសេសសិល្បករ-សិល្បការិនីនិងយោធិនបញ្ជាការដ្ឋាន-អង្គរក្សចំពោះកិច្ចខិតខំប្រឹងប្រែងហ្វឹកហាត់និងការសម្ដែងប្រកបដោយទេពកោសល្យដែលនេះបង្ហាញនូវកិច្ចសហការ ល្អក្នុងស្មារតីសាមគ្គីភាពនិងការទទួលខុសត្រូវខ្ពស់ ។
ទោះយ៉ាងណាក៏ដោយសម្ដេចតេជោ ហ៊ុន សែន បានរំលឹកដល់កីឡាករ -កីឡាការិនីថាការឈ្នះចាញ់ពីការប្រកួតកីឡាគឺជាមេរៀននិងបទពិសោធន៍សម្រាប់កីឡាករ កីឡាការិនី ម្នាក់ក្នុងការពង្រឹងសមត្ថភាពរបស់ខ្លួនឱ្យកាន់តែប្រសើរដើម្បីលើកកម្ពស់ជំនាញវិជ្ជាជីវៈកីឡាបន្ថែមទៀត ។ ផ្ទុយទៅវិញការអាក់អន់ចិត្តឬការបាក់ទឹកចិត្តដោយសារការចាញ់ ក្នុងការប្រកួតអាចធ្វើឱ្យបាត់បង់នូវការតស៊ូនិងការខិតខំប្រឹងប្រែងបន្តដើម្បីយកឈ្នះក្នុងការប្រកួតនៅពេ លអនាគត ។ ចំពោះអ្នកឈ្នះត្រូវបន្តការខិតខំប្រឹងប្រែងបន្ថែម ទៀតដើម្បីរក្សាគុណផលកីឡារបស់ខ្លួនសម្រាប់ឈានដល់ការដណ្តើមបានជ័យជំនះជូនជាតិមាតុភូមិក្នុងការប្រកួតកម្រិតអន្តរជាតិ ។
សម្តេចតេជោមានសុទិដ្ឋិនិយមនិងសូមអបអរសាទរចំពោះក្រុមកីឡាករ-កីឡាការិនីក្រសួងស្ថាប័ននិងរាជធានី-ខេត្តដែលបានទទួលចំណាត់ថ្នាក់ល្អ និងមេដាយច្រើនជាងគេ ។ សម្តេចសូមលើកទឹកចិត្តឱ្យបន្តយកចិត្តទុកដាក់ពង្រឹងសមត្ថភាពជំនាញកីឡានិងបំផុសចលនាកីឡាក្នុងដែនសមត្ថកិច្ចគ្រប់គ្រងរបស់ខ្លួនឱ្យកាន់តែរីកចម្រើនថែមទៀត ។ ចំពោះក្រសួងស្ថាប័នរាជធានី-ខេត្តដែលទទួលបានលទ្ធផលមិនល្អសូមបន្តយកចិត្តទុកដាក់កែលម្អនិងខិតខំប្រឹងប្រែងបន្ថែមដើម្បីសម្រេចបានលទ្ធផលល្អក្នុងការប្រកួតកីឡា ជាតិលើកទី ៤ និងកីឡាជាតិជនពិការលើកទី ២ នៅឆ្នាំ ២០២៤ ខាងមុខ ។ ជាមួយនេះសម្តេចតេជោ ហ៊ុន សែន ក៏បានប្រកាសថានៅនៅក្នុងព្រឹត្តិការណ៍កីឡាជាតិឆ្នាំ ២០២៤ សម្តេចនឹងចូលរួមប្រកួតក្នុងកីឡាអ៊ុកផងដែរ ។
សម្តេចតេជោ ហ៊ុន សែន បានថ្លែងបន្តទៀតថាដូចសម្តេចបានលើកឡើងជាញឹកញាប់នៅក្នុងព្រិត្តិការណ៍កីឡាវិស័យកីឡាដើរតួនាទីយ៉ាងសំខាន់ក្នុងការពង្រឹងទំនាក់ទំនងការ បង្កើនសាមគ្គីភាពនិងការលើកកម្ពស់មូលធនសង្គមដែលទាំងនេះគឺជាកត្តាកំណត់ដ៏សំខាន់ក្នុងការអនុវត្តការងារប្រកបដោយប្រសិទ្ធផលខ្ពស់ ។ការរៀបចំនិងការចូលរួមក្នុង ការប្រកួតកីឡាបង្កើនការរឹតចំណងមិត្តភាពនិងកិច្ចសហប្រតិបត្តិការកាន់តែជិតស្និទ្ធរវាងកីឡាករ-កីឡាការិនីក៏ដូចជាក្រសួង ស្ថាប័ន និងរាជធានី-ខេត្តដែលបានចូលរួមក្នុង ការប្រកួតទាំងអស់ ។ ជាងនេះទៀតកីឡាក៏រួមចំណែកដល់ការកាត់បន្ថយភាពតានតឹងក្នុងអារម្មណ៍បញ្ចៀសបាននូវការប្រព្រឹត្តិបញ្ហាសង្គមនានាដូចជាការប្រើប្រាស់ថ្នាំញៀន និងអំពើហិង្សា រក្សាបាននូវកម្លាំងកាយរឹងមាំនិងការលើកកម្ពស់ សុខភាពល្អដែលជាកត្តាកំណត់ដ៏សំខាន់សម្រាប់បង្កើនផលិតភាពពលកម្ម និង ភាពរឹងមាំនៃ សេដ្ឋកិច្ចជាតិ ។ ជារួម កីឡាជួយពង្រឹងសុខភាពផ្លូវកាយរឹងមាំ លើកកម្ពស់សុខភាពផ្លូវចិត្ត បង្កើនផលិតភាពការងារ បង្កើនបញ្ញាឈ្លាសវៃលើកកម្ពស់គុណភាពជីវិតនិងមានសុភមង្គល ក្នុងក្រុម គ្រួសារ ព្រមទាំងលើកកម្ពស់សុខដុមនីយកម្មក្នុងសង្គមទាំងមូល ។
ព្រឹត្តិការណ៍ប្រកួតកីឡាជាតិលើកទី៣ និងកីឡាជនពិការជាតិលើកទី១ ធ្វើឡើងក្រោមពាក្យស្លោក «កីឡានាំមកនូវសន្តិភាពនិងការអភិវឌ្ឍ»មានរយៈពេល១២ថ្ងៃគឺចាប់ពីថ្ងៃទី ១៩ដល់ថ្ងៃទី៣០ខែវិច្ឆិកា។ការប្រកួតកីឡាជាតិលើកទី៣ រៀបចំឡើងនៅរាជធានីភ្នំពេញ, ខេត្តកំពត, ព្រះសីហនុ, កែប និងខេត្តសៀមរាប លើ ៣៨ប្រភេទកីឡា, ៣៥៦វិញ្ញាសា, និងមានប្រតិភូកីឡាសរុប៤,៣៣៦នាក់។ ដោយឡែកការប្រកួតកីឡាជនពិការជាតិលើកទី១មានប្រតិភូកីឡាមកពីរាជធានី-ខេត្តចំនួន១៥ សរុប២២២នាក់,មាន ៧ប្រភេទកីឡា និង ៤៩វិញ្ញាសា រួមមានអត្តពលកម្មហែលទឹកបាល់បោះជិះរទេះ បាល់ទះអង្គុយ វាយសី វាយកូនឃ្លីលើតុ និងបូស្យា។
យោងតាមរបាយការណ៍របស់គណៈកម្មការប្រកួតបានឱ្យដឹងថាក្រោយការប្រកួតដ៏ស្វិតស្វាញរយៈប្រមាណ១២ថ្ងៃនេះ ក្រសួងមហាផ្ទៃឈរនៅចំណាត់ថ្នាក់ លេខ១ទទួលបានមេដា យសរុប ២១៤មេដាយ(មាស១០៤, ប្រាក់៦១, សំរឹទ្ធិ៤៩), ក្រសួងការពារជាតិឈរនៅចំណាត់ថ្នាក់លេខ២ទទួលបានមេដាយសរុប ១២៤ (មាស៦០, ប្រាក់៣៣, សំរឹទ្ធិ៣១),ក្រសួងសេដ្ឋ កិច្ចនិងហិរញ្ញវត្ថុឈរចំណាត់ថ្នាក់លេខ៣ទទួលបានមេដាយសរុប៧៧ (មាស២៩, ប្រាក់២៤,សំរឹទ្ធិ៧៧), លេខ៤ ខេត្តកណ្តាលមេដាយសរុប៧៧ (មាស២១ប្រាក់១៩និងសំរឹទ្ធ៣៧ ), លេខ៥ខេត្តសៀមរាបមេដាយសរុប៤៦ (មាស១៣ ប្រាក់១៩ និងសំរឹទ្ធ១៤),លេខ៦ខេត្តព្រៃ វែងមេដាយសរុប៥១ (មាស១២ ប្រាក់១៨ និងសំរឹទ្ធ២១),លេខ៧ រាជធានីភ្នំពេញមេដាយ សរុប៦៧ (មាស១០ ប្រាក់២១ និងសំរឹទ្ធ៣៦),លេខ៨ ខេត្តស្វាយរៀង មេដាយសរុប៣១ (មាស១០ ប្រាក់១៥ និងសំរឹទ្ធ៦),លេខ៩ ខេត្តកំពត មេដាយសរុប២៣ (មាស៩ ប្រាក់៦ និងសំរឹទ្ធ៨),លេខ១០ ខេត្តតាកែវ មេដាយសរុប១៥ (មាស៩ ប្រាក់២ និងសំរឹទ្ធ៤) ,លេខ១១ខេត្តកំពង់ចាមមេដាយសរុប៣៤ (មាស៨ ប្រាក់៨ និងសំរឹទ្ធ១៨ ),លេខ១២ខេត្តកំពង់ឆ្នាំងមេ ដា យសរុប៤០ (មាស៦ ប្រាក់១០ និងសំរឹទ្ធ២៤),លេខ១៣ខេត្តបាត់ដំបងមេដាយសរុប៣០ (មាស៦ ប្រាក់៨ និងសំរឹទ្ធ១៦),លេខ១៤ ខេត្តកែបមេដាយសរុប១៨ (មាស៦ ប្រាក់៦ និងសំរឹទ្ធ៦ ),លេខ១៥ ខេត្តប៉ៃលិនមេដាយសរុប៣០ (មាស៥ ប្រាក់៩ និងសំរឹត្ធ១៦),ខេត្តកំពង់ស្ពឺ មេដាយសរុប២៧ (មាស៤ ប្រាក់១០ និងសំរឹទ្ធ១៣) ,លេខ១៧ ខេត្តព្រះសីហនុ មេដាយសរុប២០ (មាស៤ ប្រាក់៨ និងសំរឹទ្ធ៨),លេខ១៨ ខេត្តក្រចេះ មេដាយសរុប៧( មាស៤ ប្រាក់៣ ),លេខ១៩ ខេត្តខេត្តស្ទឹងត្រែងមេដាយសរុប២១(មាស៣ ប្រាក់៨ និងសំរឹទ្ធ១០),លេខ២០ខេត្តពោធិ៍សាត់មេដាយសរុប១១ (មាស២ ប្រាក់៤ និងសំរឹទ្ធ៥),លេខ២១ ខេត្តកោះ កុង មេដាយសរុប១០ (មាស២ ប្រាក់៤ និងសំរឹទ្ធ៤),លេខ២២ខេត្តត្បូងឃ្មុំ មេដាយសរុប១៦ (មាស១ ប្រាក់៨ និងសំរឹទ្ធ៧),លេខ២៣ខេត្តព្រះវិហារមេដាយសរុប៣ (មាស១ ប្រាក់១ និងសំរឹទ្ធ១),លេខ២៤ខេត្តរតនគីរីមេដាយសរុប៣(មាស១ ប្រាក់១និងសំរឹទ្ធ១),លេខ ២៥ ខេត្តបន្ទាយមានជ័យមេដាយសរុប១៧ (ប្រាក់៨ និងសំរឹទ្ធ៩) ,លេខ២៦ខេត្តកំពង់ធំ មេដាយ សរុប៦ (ប្រាក់១ និងសំរឹទ្ធ៥ ),លេខ២៧ ខេត្តមណ្ឌលគីរី មេដាយសរុប៥ (ប្រាក់១ និងសំរឹទ្ធ៤ )និង លេខ២៨ខេត្តឧត្តរមានជ័យមានមេដាយប្រាក់១ ។
ដោយឡែកលទ្ធផលនៃការប្រកួតកីឡាជនពិការជាតិលើកទី១វិញចំណាត់ថ្នាក់លេខ១ បានទៅលើខេត្តកណ្តាល ទទួលបានមេដាយសរុប២៨ (មាស១៥, ប្រាក់៤, សំរឹទ្ធិ៩),ចំណាត់ ថ្នាក់លេខ២ បានទៅលើខេត្តស្វាយរៀង ទទួលបានមេដាយសរុប១៣ (មាស៧, ប្រាក់៥, សំរឹទ្ធិ១), ចំណាត់ថ្នាក់លេខ៣ បានទៅលើខេត្តកំពត ទទួលបានមេដាយសរុប៧ (មាស៤, ប្រាក់៣, សំរឹទ្ធិ០), ចំណាត់ថ្នាក់លេខ៤ បានទៅលើរាជធានីភ្នំពេញទទួលបានមេដាយសរុប២២ (មាស៣, ប្រាក់៩, សំរឹទ្ធិ១០) និងចំណាត់លេខ៥បានទៅលើខេត្តកំពង់ស្ពឺទទួលបា នមេដាយសរុប១០ (មាស៣, ប្រាក់៤, សំរឹទ្ធិ៣)។
សូមបញ្ជាក់ថាព្រឹត្តិការណ៍ប្រកួតកីឡាជាតិ ត្រូវបានរាជរដ្ឋាភិបាលកម្ពុជារៀបចំធ្វើឡើងលើកដំបូងនៅក្នុងឆ្នាំ២០១៦ ។ ព្រឹត្តិការប្រកួតកីឡាជាតិ និងកីឡាជនពិការជាតិនេះ មានក្នុងគោលដៅលើកកម្ពស់គុណភាពនៃការរៀបចំការប្រកួតកម្រិតជាតិនិងឈានទៅរកស្តង់ដានៃការប្រកួតកម្រិតតំបន់ ព្រមទាំងដើម្បីត្រៀមលក្ខណៈឱ្យបានល្អនិងដណ្តើ មមេដាយឱ្យបានច្រើន នៅក្នុងការប្រកួតកីឡាស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី១២ ឆ្នាំ២០២៣ដែលកម្ពុជាទន្ទឹងរង់ចាំអស់រយៈពេលប្រមាណ ៦៤ឆ្នាំមកហើយ។ ព្រឹត្តិការណនេះត្រូវបានរៀបចំឡើងមានលំនាំដូចនឹងការប្រកួតកីឡាស៊ីហ្គេ មតែម្តងដើម្បីពង្រឹងសមត្ថភាពគណៈកម្មការរៀបចំការប្រកួតកីឡាប្រចាំតំបន់អាស៊ីអាគ្នេយ៍មួយ នេះ។
ព្រឹត្តិការណ៍នេះក៏មានគោលបំណងផ្តល់ឱកាសដល់សហព័ន្ធកីឡាជាតិទាំងអស់អភិវឌ្ឍសមត្ថភាពមន្ត្រីបច្ចេកទេសដែលបានបណ្តុះបណ្តាលរួចហើយដោយផ្តល់ឱកាសដល់មន្ត្រីទាំងនោះបានចូលរួមក្នុងការរៀបចំនិងការកាត់សេចក្តីការប្រកួតជាក់ស្ដែងនៅលើទីលានប្រកួត ។ បន្ថែមពីលើនោះការប្រកួតនេះក៏ជាការផ្តល់ឱកាសដល់កីឡាករ កីឡាការិនី បានចូលរួមប្រកួតនិងវាស់ស្ទង់គុណផលកីឡា ព្រមទាំងទទួលបានបទពិសោធន៍នៃការប្រកួត,ផ្តល់ឱកាសដល់រាជធានី ខេត្តទាំង៥ ដើម្បីសាកល្បងរៀបចំទីតាំងសម្រាប់ការប្រ កួតកីឡាស៊ីហ្គេម និងអាស៊ានប៉ារ៉ាហ្គេម, តាមដាននិងត្រួតពិនិត្យការប្រើប្រាស់សារធាតុដូប៉ាក្នុងវិស័យកីឡា។
ព្រឹត្តិការណ៍បិទកីឡាជាតិនៅថ្ងៃនេះព្រឹត្តិការណ៍សិល្បៈជាច្រើនអមជាមួយផងដែរមិនខុសពីពេលបើកព្រឹត្តិការណ៍នោះឡើយ។ទស្សនីយភាពសិល្បៈដែលនឹងបង្ហាញក្នុងពិធីបិទព្រឹត្តិការណ៍ប្រកួតកីឡាជាតិលើកទី៣និងកីឡាជនពិការជាតិលើកទី១ មានដូចជា៖ការសម្តែងបទចម្រៀង «មហាគ្រួសារកីឡា»,ការសម្តែងឧបករណ៍តន្ត្រីបុរាណខ្មែរ«សំឡេងព្រលឹ ងតន្ត្រីបុរាណខ្មែរ»,ក្បួនដង្ហែអបអរសាទរ «គុនល្បុក្កតោ»ត្រូវបានចុះបញ្ជីបេតិកភណ្ឌអរូបិយនៃមនុស្សជាតិ,ទស្សនីយភាពចម្រៀង «ល្ខោនខោលសន្តិភាព» សម្តែងដោយ លោក ងួន ចាន់ដេវិត,ទស្សនីយភាព «ពន្លឺអនាគតតេជោសន្តិភាព»,ចម្រៀង «រស់ជាខ្លួនឯង»ដោយលោកស្រី ឱក សុគន្ធកញ្ញា, ទស្សនីយភាពចម្រៀង «Time To Rise »ដោយលោក ម៉ាន់ វណ្ណដា។ បន្ទាប់មកមានពិធីពន្លត់ភ្លើងគប់អមដោយការអុជកាំជ្រួចនិងក្បាច់រាំអន្តរជាតិ។ ព្រឹត្តិការណ៍បិទនេះ ប្រព្រឹត្តទៅយ៉ាងមហោឱឡារឹកជាទីបំផុត ដោយមានមហាជនចូលរួមសរុបជាង ៤ម៉ឺននាក់៕
