Views: 1
ប្រែសម្រួលៈបំណង(ដេល្លីម៉េល)៖ប៉ូលិសថៃកាលពីថ្ងៃចន្ទទី២៥កញ្ញាបានឆ្មក់ចូលឆែកឆេរផ្ទះនៅក្រុងបាងកករបស់ស្នងការរងប៉ូលិសជាតិថៃម្នាក់ ជាចំណាត់ការមួយដែលមេប៉ូលិសរូបនេះអះអាងថាមានបំណងបង្ខូចឈ្មោះរបស់លោក ដោយសារតែ«នយោបាយក្នុងប៉ូលិសថៃ»។
ឧត្តមសេនីយ៍ប៉ូលិសលោក ស៊ូរ៉ាឆាត ហាក់ផាន( Surachate Hakparn )ជាបេក្ខជនម្នាក់ដើម្បីក្លាយជាមេប៉ូលិសជាតិថៃ ហើយកងកម្លាំងប៉ូលិសថៃមានប្រពៃណីតស៊ូនយោបាយផ្ទៃក្នុងដ៏ខ្លាំងក៏ដូចជាមានឈ្មោះអាស្រូវខាងពុករលួយនៅគ្រប់កំរិតផងដែរ។
តែលោក ត្រៃរ៉ុង ភីវផាន(Trairong Phiwpan)មេបញ្ជាការប៉ូលិសនៅក្នុងការិយាល័យកិច្ចការច្បាប់និងបណ្តឹង បាននិយាយថាការឆែកឆេរនៅផ្ទះលោកស៊ូរ៉ាឆាតជាផ្នែកនៃការស៊ើបអង្កេតមួយក្រោយការបង្ក្រាបបណ្តាញប្រតិបត្តិការល្បែងអនឡាញខុសច្បាប់ធំមួយ។
លោក ត្រៃរ៉ុង បាននិយាយថាមនុស្សបួននាក់ត្រូវបានចាប់ឃាត់ខ្លួនកាលពីខែមិថុនានិងកក្កដាពាក់ព័ន្ធនឹងករណីនេះ។ដីកាចាប់ខ្លួនក៏ត្រូវបានចេញសំរាប់មនុស្ស២៣នាក់ទៀត រួមមាននាយប៉ូលិសប្រាំបីនាក់ដែលត្រូវបានចាប់ខ្លួនកាលពីថ្ងៃចន្ទនិងសុទ្ធតែជាកូនចៅរបស់លោកស៊ូរ៉ាឆាត តែលោកស៊ូរ៉ាឆាតមិនមានឈ្មោះក្នុងដីកាចាប់ខ្លួនទេនិងក៏មិនត្រូវបានឃាត់ខ្លួនដែរ។
បើតាមលោក ត្រៃរ៉ុង នាយប៉ូលិសដែលត្រូវបានចាប់ខ្លួនខ្លះបានជាប់ពាក់ព័ន្ធនឹង«ការគ្រប់គ្រងនិងចាត់ចែង»វេបសាយចំនួន១២របស់បណ្តាញល្បែងអនឡាញ។សរុបមនុស្ស១៧នាក់ត្រូវបានចាប់ខ្លួនក្នុងអំឡុងពេលឆ្មក់ឆែកឆេរកាលពីថ្ងៃចន្ទនៅទីតាំង៣០ផ្សេងគ្នានៅទូទាំងប្រទេស។
លោក ស៊ូរ៉ាឆាត បានប្រាប់អ្នកយកព័ត៌មាននៅក្រោយការចូលឆែកឆេរថា លោកជាជនស្លូតត្រង់ដោយមិនបានប្រព្រឹត្តកំហុសអ្វីមួយទេ។លោកមានជំនឿទៅលើសមាជិកក្រុមរបស់លោក តែក៏បាននិយាយថាលោកនឹងមិនជួយនរណាដែលពាក់ព័ន្ធនឹងសកម្មភាពខុសច្បាប់ទេ។
ស៊ូរ៉ាឆាត ហាក់ផាន ស្នងការរងប៉ូលិសជាតិថៃ កំពុងបាក់មុខខ្លាំងក្រោយប៉ូលិសប្រឆាំងឧក្រិដ្ឋកម្មអ៊ីនធឺណិតចូលឆែកផ្ទះរបស់លោក ក្រោយពីកូនចៅរបស់លោកមានជាប់ពាក់ព័ន្ធនឹងបណ្តាញពុករលួយនៃប្រតិបត្តិការល្បែងអនឡាញខុសច្បាប់
នៅពេលត្រូវបានសួរថាតើប្រតិបត្តិការឆែកឆេរនិងចាប់ខ្លួននេះអាចទាក់ទងនឹងការតែងតាំងមេប៉ូលិសថ្មីដែរឬទេ លោកស៊ូរ៉ាឆាតបានតបថា« ខ្ញុំទុកអោយអ្នកយកព័ត៌មានគិតដោយខ្លួនឯង»អំពីពេលធ្វើប្រតិបត្តិការនេះនិងការតែងតាំងមេប៉ូលិសដែលគ្រោងធ្វើនៅសប្តាហ៍នេះ។លោកក៏បាននិយាយថា ដីកាចូលឆែកឆេរផ្ទះរបស់លោកអាចបង្កប់ភាពមិនស្មោះត្រង់និងថា«អាចមកពីខ្ញុំបានធ្វើការលើករណីច្រើនដែលប៉ះពាល់មនុស្សជាច្រើន។ថ្ងៃនេះ ខ្ញុំត្រូវតែប្រឈមផលវិបាកដូចនេះ»។
ទោះជាយ៉ាងណាលោកត្រៃរ៉ុង ប្រធានការិយាល័យប៉ូលិសនីតិកម្មនិងបណ្តឹងបាននិយាយថាដីកាចូលឆែកឆេរផ្ទះលោកស៊ូរ៉ាឆាតផ្អែកលើភស្តុងតាងនិងដានលុយមកពីការស៊ើបអង្កេត។«ការឆែកឆេរផ្ទះនោះក៏បាននាំដល់ការចាប់ខ្លួនជនសង្ស័យម្នាក់។វាបញ្ជាក់ថា ក្រុមស៊ើបអង្កេតបានធ្វើការផ្អែកលើការពិតនិងភស្តុតាង»។
សូមបញ្ជាក់ថា ក្រោយការឆែកឆេរស្រាប់តែលេចចេញវីដេអូមួយបង្ហាញលោកស៊ូរ៉ាឆាតនិងកូនចៅប៉ូលិសរបស់គាត់ជប់លៀងសប្បាយជាមួយស្ត្រីម្នាក់ដែលត្រូវបានចាប់ខ្លួនកាលពីខែកក្កដានិងជាជនសង្ស័យចម្បងម្នាក់នៅក្នុងបណ្តាញល្បែងអនឡាញខុសច្បាប់។តែលោកស៊ូរ៉ាឆាតបាននិយាយថា ពិធីនោះត្រូវបានកូនចៅរបស់គាត់រៀបចំនិងលោកមិនបានស្គាល់ស្ត្រីនោះពីមុនមកទេ។
ត្រូវគេដាក់ឈ្មោះក្រៅថាBig Jokeនិងបង្ហាញមុខក្នុងសារព័ត៌មានញឹកញាប់ជាងគេ លោកស៊ូរ៉ាឆាតជាតារាកំពុងរះមួយដួងក្នុងការិយាល័យអន្តោប្រវេសន៍ថៃក្រោយលោកត្រូវបានតែងតាំងនៅឆ្នាំ២០១៨។លោកត្រូវបានដកចេញពីមុខតំណែងនិងបានមុខមួយរយៈពេលខ្លីកាលពីឆ្នាំ២០១៩។
លោកបានវិលមកកាន់ទីភ្នាក់ងារប៉ូលិសជាតិវិញនៅឆ្នាំ២០២១ក្រោយលោកប្រាយុទ្ធ ចាន់អូចា បានតែងតាំងលោកជាទីប្រឹក្សាមេប៉ូលិសជាតិ។លោកបានបន្តឡើងឋានៈនិងក្លាយជាស្នងការរងប៉ូលិសហើយបានដឹកនាំការបង្ក្រាបនិងស៊ើបអង្កេតករណីធំៗជាច្រើន៕
ទិដ្ឋភាពប៉ូលិសចូលឆែកឆេរផ្ទះលោកស៊ូរ៉ាឆាត ហាក់ផាន(អាវស)កាលពីថ្ងៃចន្ទ(រូប ដឹណេសិន)
