Views: 4
ដោយៈមុនីរ័ត្ន/ភ្នំពេញ៖នៅរសៀលថ្ងៃទី៦ ខែមិថុនាឆ្នាំ២០២២នៅលើបណ្តាញសង្គមពិសេស សិល្បករ
សិល្បការិនី ជាច្រើនបានសម្ដែងនូវការសោកស្តាយ រួមជាមួយសាររំលែកទុក្ខតារាសម្ដែង គង់ ម៉ូនីកា ដែល បានទទួលមរណភាពទាំងក្មេងវ័យ ដោយសារជំងឺគាំងបេះដូង។
គណនីហ្វេសប៊ុកផ្លូវការ របស់តារាសម្ដែងជើងចាស់ លោក សាវីន ហ្វីលីព ដោយភ្ជាប់ជាមួយរូបថតជាច្រើនសន្លឹកផងបានសរសេរថា «តារាសម្ដែង គង់ ម៉ូនីកា បានស្លាប់ដោយជំងឺគាំងបេះដូងមុននេះបន្តិច។ កញ្ញាជាតួឯកស្រីក្នុង MVដ៏ល្បីគឺបទ ជូនអូនទ្បើងផ្លូវហាយវេ របស់ផលិតកម្ម Galaxy Navatra។ សូមប្អូនស្រីបានទៅដល់ទីស្ងប់សុខ RIP …»។
សារសម្តែងការក្រៀមក្រំរបស់មិត្តសិល្បករសិល្បការិនីអ្នកគាំទ្រនាងជាច្រើនក៏ត្រូវបានបង្ហោះដោយភ្ជាប់ជាមួយរូបភាពពេលនាងទទួលមរណភាពនៅលើរថយន្តសង្គ្រោះនិងរូបភាពដ៏ស៊ិចស៊ីនៅពេលនាងសម្តែងកាលពីពេលនាងនៅមានជីវិតនៅឡើយ។
តារាសម្ដែង គង់ ម៉ូនីកា គឺជាអ្នកសិល្បការិនីវ័យក្មេងដែលមានរូបស្រស់សោភា សិចស៊ី និងមានឈ្មោះល្បីគួរសមនៅក្នុងសង្គមសិល្បៈ។ តារារូបនេះ បានចូលរួមសម្ដែងភាពយន្ត និងបទចម្រៀងជាច្រើនបទ ។ បទចម្រៀងដែលធ្វើឲ្យរូបនាងលេចធ្លោរជាងគេ គឺការចូលរួមសម្ដែងក្នុងបទ «ជូនអូនឡើងលើផ្លូវហាយវ៉េ» ដែលជាសំនៀងរបស់តារាចម្រៀង ខេម នៅក្នុងផលិតកម្ម Galaxy Navatra៕សរន
គង់ ម៉ូនីកា (រូបថត ហ្វេសប៊ុក)
