Views: 31
ប្រែសម្រួល : កញ្ញាដាលីស (ដេល្លីម៉េល) ៖ សហរដ្ឋអាម៉េរិកកំពុងឆ្ពោះទៅរកការបិទរដ្ឋាភិបាលនៅចុងសប្តាហ៍នេះ ដោយគ្មានមធ្យោបាយចាកចេញពីភាពជាប់គាំងនៅក្នុងសភានោះឡើយជុំវិញការអំពាវនាវរបស់គណបក្សសាធារណរដ្ឋដ៏រឹងរូស ដែលទាមទារឱ្យកាត់បន្ថយការចំណាយយ៉ាងជ្រាលជ្រៅ។
ឆ្នាំសារពើពន្ធថ្មីរបស់សហរដ្ឋអាម៉េរិកចាប់ផ្តើមនៅថ្ងៃទី ១ ខែតុលា ប៉ុន្តែការខ្វែងគំនិតគ្នាយ៉ាងខ្លាំងនៅក្នុងគណបក្សសាធារណរដ្ឋអំពីទំហំបំណុលសហព័ន្ធបានរារាំងការអនុម័តច្បាប់នានា ដែលត្រូវការដើម្បីឱ្យរដ្ឋាភិបាលបន្តផ្តល់មូលនិធិ និងបើកដំណើរការ។
ទីភ្នាក់ងារវាយតម្លៃឥណទាន Moody’s បានព្រមាននៅសប្តាហ៍នេះថា ការបិទរដ្ឋាភិបាលនឹងមានផល “អវិជ្ជមាន” សម្រាប់បំណុលអធិបតេយ្យភាពរបស់សហរដ្ឋអាម៉េរិក ដោយគំរាមកំហែងដល់ចំណាត់ថ្នាក់លំដាប់កំពូលរបស់ខ្លួន និង បង្កើនការរំពឹងទុកនៃការចំណាយខ្ពស់លើការខ្ចីប្រាក់។
ជាមួយនឹងពេលវេលាកាន់តែជិតអស់ ព្រឹទ្ធសភាបានចេញច្បាប់ទ្វេបក្សដ៏សាមញ្ញមួយដើម្បីពង្រីកការផ្តល់មូលនិធិនិងឱ្យពួកសមាជិកសភាពន្យារពេលឱ្យបន្ថែមទៀត។
ប៉ុន្តែដោយប្រឈមមុខនឹងការគំរាមប្រជែងតំណែងថ្នាក់ដឹកនាំពីពួកស្តាំនិយមនៃគណបក្សរបស់គាត់ ប្រធានសភាបក្សសាធារណៈរដ្ឋ លោក ខេវិន ម៉ាកកាធី (Kevin McCarthy) បានបដិសេធមិនព្រមនាំយកច្បាប់ស្រដៀងគ្នាមកដាក់លើតុជជែកដេញដោលទេ ដោយធ្វើឱ្យការបិទរដ្ឋាភិបាលកាន់តែមានលទ្ធភាពខ្ពស់។
ខាងក្រោមនេះជាអ្វីដែលទំនងជានឹងកើតឡើងនៅព្រឹកថ្ងៃអាទិត្យ ប្រសិនបើរដ្ឋាភិបាលអាម៉េរិកបិទ។
– បុគ្គលិករដ្ឋនឹងមិនទទួលបានប្រាក់ខែ
និយោជិតសហព័ន្ធរាប់សិបម៉ឺននាក់នឹងត្រូវផ្អាកបណ្តោះអាសន្នពីការងារដោយគ្មានប្រាក់ខែ ខណៈដែលសមាជិកនៃយោធានិងកម្មករនិយោជិតផ្សេងទៀតដែលចាត់ទុកថាមានសារៈសំខាន់ នឹងបន្តធ្វើការដោយគ្មានប្រាក់ឈ្នួល។
សហភាពសហព័ន្ធនិយោជិតរដ្ឋាភិបាលអាម៉េរិក (AFGE) ប៉ាន់ប្រមាណថាការបិទរដ្ឋាភិបាលទាំងស្រុងនឹងមានន័យថា បុគ្គលិកសហព័ន្ធជិត ១,៨ លាននាក់នឹងមិនទទួលបានប្រាក់ខែក្នុងអំឡុងពេលបិទ។
យោងតាមគណៈកម្មាធិការទទួលខុសត្រូវថវិកាសហព័ន្ធ ដែលមិនលម្អៀងខាងគណបក្សណាមួយ បានឱ្យដឹងថា បុគ្គលិកមិនសំខាន់ប្រហែល ៨៥០.០០០ នឹងត្រូវផ្អាកពីការងារបណ្តោះអាសន្ន។
នៅពេលណាដែលកិច្ចព្រមព្រៀងផ្តល់មូលនិធិត្រូវបានសម្រេច នោះការរឹតបន្តឹងទាំងនេះនឹងត្រូវដកចេញ ហើយនិយោជិតដែលរងផលប៉ះពាល់ទាំងអស់នឹងត្រូវបានហៅឱ្យចូលធ្វើការវិញ នេះបើយោងតាម AFGE ។
– សេវាកម្មរដ្ឋាភិបាលត្រូវបញ្ឈប់
ប្រតិបត្តិការ ដែលត្រូវបានចាត់ទុកថាចាំបាច់ នឹងបន្តដំណើរការ។
នៅក្នុងការបិទរដ្ឋាភិបាលកាលពីមុន នេះមានន័យថា មូលប្បទានបត្រអត្ថប្រយោជន៍នឹងត្រូវបន្តបង់ដដែល ខណៈដែលអ្នកត្រួតពិនិត្យចរាចរណ៍ផ្លូវអាកាស ភ្នាក់ងារល្បាតព្រំដែន និងបុគ្គលិកមន្ទីរពេទ្យនៅតែធ្វើការ។
ទោះជាយ៉ាងណាក៏ដោយ សេវាកម្មជាច្រើនទំនងជានឹងរងផលប៉ះពាល់ រួមទាំងកម្មវិធីថ្មីៗសម្រាប់សន្តិសុខសង្គម និង កម្មវិធី Medicare ការត្រួតពិនិត្យទីតាំងលក់អាហារនិងបរិស្ថាន និង ឧទ្យានជាតិ។
ការបិទបន្តកាន់តែយូរ ផលប៉ះពាល់នឹងកាន់តែធំ។
– ផលប៉ះពាល់សេដ្ឋកិច្ច
អ្នកសេដ្ឋកិច្ចនៅក្រុមហ៊ុន Goldman Sachs បានប៉ាន់ប្រមាណថា ការបិទនេះនឹងប៉ះពាល់ដល់កំណើនសេដ្ឋកិច្ចក្នុងត្រីមាសទី ៤ ចំនួន ០,២ ភាគរយ សម្រាប់រាល់សប្តាហ៍ដែលវាបន្ត។
អ្នកសេដ្ឋកិច្ច Goldman បានសរសេរនៅក្នុងកំណត់ត្រាថ្មីៗនេះទៅកាន់អតិថិជនថា ការបិទអាចចំណាយពេលពី ២ ទៅ ៣ សប្តាហ៍ទើបដោះស្រាយចេញ “ដោយសារតែភាគីនៃបក្សទាំងពីរហាក់មិនធ្វើសម្បទានឱ្យគ្នាភ្លាមៗទេ”។
ពួកគេបានបន្ថែមថា “ខណៈការផ្អាកការផ្តល់មូលនិធិមួយចំនួនបានបញ្ចប់យ៉ាងឆាប់រហ័ស បរិយាកាសនយោបាយមុនឈានដល់ថ្ងៃផុតកំណត់គឺមើលទៅឱ្យគេនឹកឃើញដល់ស្ថានភាពមុនការបិទដ៏យូរកាលពីអតីតកាល”។
ដោយសន្មតថាការបិទនេះនឹងបញ្ចប់មុនពេលដាច់ឆ្នាំ ក្រុមហ៊ុន Goldman ប៉ាន់ស្មានថា កំណើននឹងកើនឡើងនៅដើមឆ្នាំក្រោយក្នុងចំនួនដូចគ្នាដែលវាបានធ្លាក់ចុះនៅក្នុងត្រីមាសទី ៤ ខណៈអ្នកស្រាវជ្រាវនៅ Oxford Economics រំពឹងថាពាក់កណ្តាលនៃការបាត់បង់នេះនឹងត្រូវបានស្តារឡើងវិញ។
ការបាត់បង់ទិន្នផលបុគ្គលិករបស់រដ្ឋាភិបាលនឹងធ្វើឱ្យខាតកំណើនសេដ្ឋកិច្ចប្រចាំឆ្នាំប្រហែល ០,១% ក្នុងមួយសប្តាហ៍ ហើយនឹងមិនអាចស្តារត្រឡប់មកវិញបានទេ នេះបើយោងតាម Oxford Economics ។
ការបិទនេះក៏អាចជះឥទ្ធិពលដោយប្រយោលដល់សេដ្ឋកិច្ចផងដែរ ព្រោះបុគ្គលិកសហព័ន្ធដែលគ្មានប្រាក់ឈ្នួលចាប់ផ្តើមកាត់បន្ថយការចំណាយរបស់ពួកគេ។
ការបិទនេះហាក់ដូចជាកំពុងជះឥទ្ធិពលលើផ្សារហ៊ុន Wall Street ដោយសន្ទស្សន៍ភាគហ៊ុនសំខាន់ៗបានបាត់បង់សន្ទុះ ខណៈថ្ងៃផុតកំណត់ខិតជិតមកដល់។
– បញ្ហាទិន្នន័យសហព័ន្ធ
សេដ្ឋវិទូបារម្ភថា ការបិទនេះក៏នឹងផ្អាកការបោះផ្សាយទិន្នន័យរបស់រដ្ឋាភិបាលសហព័ន្ធផងដែរ។
នេះគឺជាការព្រួយបារម្ភពិតប្រាកដសម្រាប់ធនាគារកណ្តាលអាម៉េរិក (Fed) ដែលបាននិយាយថា ខ្លួនត្រូវការការតម្រង់ទិសដោយទិន្នន័យនៅពេលខ្លួនសម្រេចចិត្តលើគោលនយោបាយអត្រាការប្រាក់ទៅមុខទៀត។ ថ្មីៗនេះ Fed បានបន្ថយល្បឿននៃការដំឡើងអត្រាការប្រាក់ដ៏ខ្លាំងក្លារបស់ខ្លួន ខណៈធនាគារទប់ទល់នឹងអតិផរណាដ៏រឹងរូស។
ប្រសិនបើគ្មានទិន្នន័យថ្មីទេ ធនាគារកណ្តាលនឹងត្រូវបង្ខំឱ្យធ្វើការសម្រេចចិត្តជាមួយនឹងផលប៉ះពាល់យ៉ាងធ្ងន់ធ្ងរសម្រាប់សេដ្ឋកិច្ចអាម៉េរិកដោយមិនមានរូបភាពច្បាស់លាស់អំពីអ្វីៗគ្រប់យ៉ាង។
ខណៈការបិទរយៈពេលខ្លីនឹងមានផលប៉ះពាល់រយៈពេលវែងតិចតួច វាអាចក្លាយជាបញ្ហាសំខាន់មួយ ប្រសិនបើសមាជិកសភាខកខានក្នុងការសម្រេចកិច្ចព្រមព្រៀងឱ្យបានរហ័ស៕
ប្រធានសភាលោក ខេវិន ម៉ាកកាធី មិនអាចកៀរគរគណបក្សសាធារណរដ្ឋនៅក្នុងសភាឱ្យយល់ព្រមលើកិច្ចព្រមព្រៀងផ្តល់មូលនិធិដល់រដ្ឋាភិបាល
