Views: 1
ប្រែសម្រួល : កញ្ញាដាលីស (VnExpress) ៖ អ្នកជំនាញសុខភាពបាននិយាយថា ត្បិតទូទៅជាផ្លែឈើដែលមានសុខភាពល្អក៏ពិតមែន ប៉ុន្តែផ្លែបឺរគួរតែញ៉ាំក្នុងកម្រិតមួយសម្រាប់ក្រុមមនុស្សមួយចំនួន។
យោងតាមលោកវេជ្ជបណ្ឌិត វិញ តាន់ វូ (Huynh Tan Vu) នៅមន្ទីរពេទ្យវេជ្ជសាស្ត្រនិងឱសថក្រុងហូជីមិញបានឱ្យដឹងថា ផ្លែបឺរសម្បូរទៅដោយសារធាតុចិញ្ចឹមជាច្រើន ព្រោះវាជាប្រភពដ៏ល្អនៃកាបូអ៊ីដ្រាត ប្រូតេអ៊ីន ប៉ូតាស្យូម កាកសរសៃហ្វៃបឺ វីតាមីន B វីតាមីន E វីតាមីន C និង វីតាមីន K។
ដោយសារតែហេតុនេះ ផ្លែឈើនេះអាចធ្វើឱ្យប្រសើរឡើងចំពោះភ្នែក សរសៃឈាមបេះដូង និងប្រព័ន្ធរំលាយអាហារ ក៏ដូចជាការពារជំងឺពុកឆ្អឹងនិងមហារីក។
ទោះយ៉ាងណា អត្ថប្រយោជន៍ទាំងនោះមិនមានន័យថាមនុស្សគ្រប់គ្នាសុទ្ធតែអាចបរិភោគផ្លែឈើនេះតាមចិត្តចង់នោះទេ។ ខាងក្រោមនេះគឺជាមនុស្ស៦ប្រភេទដែលត្រូវបានណែនាំឱ្យកម្រិតឬចៀសវាងការទទួលទានផ្លែឈើនេះ។
– ម្តាយបំបៅដោះកូន
ការទទួលទានផ្លែបឺរច្រើនពេកអាចនាំឱ្យថយចុះការផលិតទឹកដោះសម្រាប់ម្តាយដែលបំបៅដោះ។ ដូច្នេះ មនុស្សមួយក្រុមនេះត្រូវបានណែនាំឱ្យកម្រិតការទទួលទានផ្លែបឺរ។
– អ្នកជំងឺដែលមានបញ្ហាពោះវៀន
ការទទួលទានផ្លែបឺរអាចនាំឱ្យមានជំងឺ Dyspepsia (ឈឺពោះផងពិបាករំលាយអាហារផង) ហើមពោះ និងរាគចំពោះមនុស្សទាំងនេះ។
ដើម្បីចៀសវាងបញ្ហាទាំងនោះ អ្នកដែលមានបញ្ហាពោះវៀនត្រូវបានស្នើឱ្យញ៉ាំផ្លែបឺរពាក់កណ្តាលក្នុងមួយថ្ងៃតែប៉ុណ្ណោះ។
– មនុស្សអាឡែស៊ីទៅនឹងសមាសធាតុនៅក្នុងផ្លែបឺរ
អ្នក ដែលងាយនឹងមានអាឡែស៊ី អាចនឹងមានរោគសញ្ញានានា រួមមាន ចង្អោរ ឈឺក្បាល ឬថប់ដង្ហើម បន្ទាប់ពីទទួលទានផ្លែបឺរ ដោយសារប្រតិកម្មរបស់រាងកាយរបស់ពួកគេ។
– អ្នកដែលមានបញ្ហាថ្លើម
ផ្លែបឺរមានផ្ទុកនូវបរិមាណកូឡាជែនខ្ពស់ ដែលអាចប៉ះពាល់ដល់កោសិកាថ្លើម ប្រសិនបើមិនត្រូវបានរំលាយទាំងស្រុង។ ដូច្នេះហើយ អ្នកដែលមានបញ្ហាថ្លើម ចាំបាច់ត្រូវកម្រិតការទទួលទានផ្លែបឺរ។
– មនុស្ស ដែលស្ថិតក្រោមការព្យាបាលដោយប្រើថ្នាំ
ប្រភេទថ្នាំមួយចំនួន ឧទាហរណ៍ថ្នាំប្រឆាំងនឹងការកកឈាម ឬ ថ្នាំប្រឆាំងនឹងការរលាក ដែលមិនមែនជាស្តេរ៉ូអ៊ីត (Nonsteroidal) អាចបាត់បង់ប្រសិទ្ធភាពរបស់វា នៅពេលដែលត្រូវបានលេបនិងប្រតិកម្មទៅនឹងផ្លែបឺរ។
ផ្លែបឺរក៏អាចបង្កើនលទ្ធភាពនៃផលប៉ះពាល់សម្រាប់អ្នកដែលប្រើថ្នាំបញ្ចុះកូឡេស្តេរ៉ុលផងដែរ។ អ្នកដែលស្ថិតក្រោមការព្យាបាលដោយថ្នាំគួរពិគ្រោះជាមួយគ្រូពេទ្យប្រសិនបើពួកគេចង់ទទួលទានផ្លែឈើ។
– អ្នកជំងឺធាត់ឬអ្នកដែលចង់សម្រកទម្ងន់
ផ្លែបឺរសម្បូរទៅដោយជាតិខ្លាញ់ ដូច្នេះការទទួលទានផ្លែឈើនេះច្រើនពេកអាចបណ្តាលឱ្យឡើងទម្ងន់ដែលមិនអាចគ្រប់គ្រងបាន។ ដោយសារតែហេតុនេះ គេបានណែនាំឱ្យកាត់បន្ថយបរិមាណផ្លែបឺរនៅក្នុងអាហារប្រចាំថ្ងៃរបស់អ្នក ប្រសិនបើអ្នកមានបំណងស្រកទម្ងន់ដែលលើស៕
